Fakatolomaki ki Mua e Lotomatala ha Tautolu he Fekafekauaga​—Fakamatala ke he Tagata Vagahau Kehe

Kakano kua Aoga Ai: Manamanatu a Iehova ke he malolō fakaagaaga he tau tagata he “tau motu oti kana.” (Gahua 10:34, 35) Ko e mena ia, ne fakakite e Iesu to fakamatala e tala mitaki “ke he lalolagi oti,” mo e “ke he tau atu motu oti.” (Mata. 24:14) Ne perofeta e Sakaria to talia he tau tagata “he tau vagahau oti he tau motu kehe.” (Saka. 8:23) Hagaao ke he fakakiteaga he aposetolo ko Ioane, ko lautolu kua hao he matematekelea lahi to putoia a lautolu “mai he tau motu oti, mo e tau faoa, mo e tau tagata kehekehe, mo e tau vagahau kehekehe.” (Fakakite. 7:9, 13, 14) He kitia tuai e tau mena tutupu, ka felauaki a tautolu mo e tagata he fonua ha tautolu kua vagahau kehe, lali a tautolu ke fakamatala ki a ia.