Lahi Mahaki Kia e Fonua he Fakapotopotoaga Hau?
1 Mai he tau maaga i Iutaia ke he tau fahi tua i Kalilaia, ne fakamatala fakalaulahi a Iesu he fonua lahi mahaki i Isaraela i tuai. (Mare. 1:38, 39; Luka 23:5) Maeke foki ia tautolu ke uta e tala mitaki ke hokotia atu ke he tokologa he tau tagata. (Mare. 13:10) Pete ia, maeke e mena nei ke paleko. Ko e ha?
2 Kua loga he tau fakapotopotoaga i Niu Silani ne tutu atu ki tua e tau fonua, putoia e loga he tau kilomita. Ko e tau fakapotopotoaga vagahau kehekehe ka gahua he tau taone tokologa, ke kumi e tau tagata kua vagahau e vagahau ha lautolu. Ko e heigoa ka taute e tautolu ke lagomatai e tau tagata kua nonofo he tau matakavi pihia ke ako e kupu moli hagaao ki a Iehova, Iesu, mo e Kautu?
3 Fakatoka Fakamitaki: Kua lata e leveki fekafekau mo e fekafekau he matakavi ke leveki e tau laliaga he fakapotopotoaga ke fakakatoatoa mitaki ai. Liga setulu e tau Aho Faiumu pauaki ke maeke he tokologa ke gahua he aho katoa. Ka gahua he tau fonua mamao, fakatoka ke gahua loa he fonua ka maeke, he uta e kai ke lata ma e magaaho kai la. Liga lata ia koe ke fakalataha tuai atu ke he matakavi kua fakatoka ke feleveia ai ke maeke ke fai magaaho ke fenoga atu ke he matakavi ka gahua po ke taute e feleveiaaga fakatata ke he matakavi ia ka amanaki ke gahua ki ai. Kia fakaikiiki e tau matakau ka o he motoka ke maeke ke gahua oti. Fakatoka ke gahua e tau fahi tua he tau magahala ne mitaki e matagi mo e tau tuaga puhala tu.
4 Ko lautolu kua gahua he tau fonua vagahau kehekehe kua lata ke fakaaoga fakamitaki e tau magaaho uho he moua e tau mepe fou ne tutu ai e tau higoa mo e tau kaina i ai. Fakatokatoka e tau fonua ke maeke he matakau ahiahi atu ke o atu ke he tau fale oti he matakavi.
5 Kia mailoga ke uta fakaloga e tau tohi. Ka nakai gahua tumau e fonua, kua liga lata ke toka e tuleke po ke mekasini tuai he tau kaina nakai moua ha tagata. Ka moua e tuleke Manako Nakai a Koe ke Iloa Lahi e Tohi Tapu? ke he vagahau hau, foaki ai ke he tau tagata oti kua feleveia mo koe ti toka ai he tau kaina ne nakai fai tagata i ai.
6 Kaufakalataha Auloa: Ko e gahua he fonua lahi mahaki kua lata mo e kaufakalatahaaga he tau tagata oti he fakapotopotoaga. Ka mamao e matakavi ka o atu ki ai, maeke ia lautolu ne heke he motoka ke limalima auloa e penisini. Ko e fakailoilo mitaki kua lata ke fakagahua ka moua e koe e tau tagata he kaina kua fiafia ke tutala. Kia tokaloto e manako ke hokotia ke he matakavi katoa, ti manamanatu foki ki a lautolu kua fakatali he motoka. Ka manako a koe ke fakaloa atu e fakatutalaaga mo e tagata fiafia, kia taute e tau fakatokatokaaga ke maeke he faoa ne toe ke matutaki atu?
7 Kia taute e tau fakatokatokaaga kua mau ke liliu atu ki a lautolu kua fiafia. Ke lafi ke he numera he kaina, lali ke moua e numera telefoni he tagata fiafia ke maeke ia koe ke matutaki atu mo e fakamatala atu he telefoni. Ka nakai fai higoa po ke numera e tau fale, kia ta e mepe po ke tohi e fakamaamaaga ke maeke ke liu ahi atu ke he tagata fiafia.
8 Ko e kotofaaga ha tautolu ke taute e tau hatakiaga ha Iesu: “Ko e māga, po ke magamotu ke hohoko atu a mutolu ki ai, kia hūhū po ko hai ha i ai kua lata”! (Mata. 10:11) To fakamonuina moli e Iehova e tau laliaga hau he foaki fiafia e koe a koe ke he gahua palepale mitaki nei!