Aoga Nakai ki a Koe he Fai Matakavi Fakatagata?
1. Ko e heigoa e matakavi fakatagata?
1 Ko e heigoa e matakavi fakatagata? Fai matakavi pihia e tau fakapotopotoaga ne lahi e fonua, ko e matakavi ma haau ni a ia, liga ko e matakavi ne tata ke he kaina haau. Fakamaama mai he tohi Organized, lau 103: “He fai matakavi fakatagata ne tata ki a koe to maeke ke lagomatai a koe ke fakaaoga fakalahi e tulā kua maeke ia koe ke he gahua he fonua. Liga manako foki a koe ke uiina taha tagata fakailoa ke gahua mo koe he matakavi fakatagata haau?”
2. Fakaaoga fēfē e matakavi fakatagata ke lafi ke he matakau fakamatala?
2 Ke Lafi ke he Matakau Fakamatala: Ka moua e koe e matakavi fakatagata ne tata ke he gahuaaga haau, maeke ia koe ke fakamatala i ai he magaaho kai laā haau po ke ato liu ki kaina, liga mo e taha tagata fakailoa ne gahua tata mai. Ka moua e koe e matakavi ne tata ke he kaina haau, kua mukamuka ma haau mo e magafaoa haau ke fakaaoga ai ke fakamatala he magaaho afiafi. Kaeke kua nakai fakalataha atu a koe ke he feleveiaaga ma e gahua he fonua, kua latatonu ni ke liogi ma e takitakiaga ha Iehova ato kamata a koe ke fakamatala. (Filipi 4:6) Ke lafi ki ai, kua lata ia koe ke fakalagotatai e magaaho ka gahua a koe he matakavi fakatagata mo e magaaho ka lalago e koe e tau fakaholoaga ma e gahua fakamatala he matakau he fakapotopotoaga. Mua atu he tau matahiku faahi tapu ka tokologa kua feleveia ma e gahua he fonua, kua mitaki lahi ke lalago e gahua he fonua he matakau haau.
3. Ko e heigoa e tau aoga he fai matakavi fakatagata?
3 Tau Aoga: Ka fai matakavi fakatagata a koe, kua moua e koe e matakavi ke fakamatala ai he magaaho ni kua felauaki mo e setulu haau. To lahi e magaaho haau kua maeke ke fakamatala mo e fakatote hifo e magaaho ke ō atu ki ai. Ko e lahi e fakaatāaga ke hikihiki ati maeke e falu ke paionia fakakū po ke paionia tumau. Ha kua haia ni e tau tagata ne fiafia he matakavi ne nofo ai a koe, kua mukamuka lahi ke liu atu mo e taute e tau fakaako Tohi Tapu. Tokologa ne mailoga ko e fakamatala he matakavi fakatagata kua lagomatai a lautolu ke iloa e tau tagata he tau kaina mo e feaki e mauokafua, mua atu ka gahua lagaloga ato liuaki atu ai ke maeke falu ke fakaaoga. To lagomatai nakai ki a koe mo e magafaoa haau ka gahua he matakavi fakatagata ke taute fakalahi e fekafekauaga haau he fonua?—2 Timo. 4:5.