Puhala ke Fakamatala he Matakavi Pisinisi
1. Ko e heigoa falu mena mitaki he fakamatala he matakavi pisinisi?
1 Manako nakai a koe ke fakamatala he matakavi ne fa talia e tau tagata ahiahi mo e lavea e tau tagata ke nakai ha he tau kaina? Liga maeke ia koe ke taute pihia ke he matakavi he fakapotopotoaga hau. Fefe? He ahi atu ke he tau pisinisi ne ha ha i ai. Ko e tau tagata fakailoa ne fakamatala he taha fale koloa ke he taha fale koloa kua fa olioli ke he tau fua mitaki.
2. Puhala fe kua maeke ke fakatokatoka aki e fakamatala he matakavi pisinisi?
2 He falu fakapotopotoaga ko e tau pisinisi e taha vala he matakavi kua kotofa ki a lautolu. Ko e matakainaga tane ne leveki ke he fonua ka liga tauteute e tau laupepa mepe pauaki he tau matakavi ne putuputui e tau pisinisi i ai. Ko e tau mepe ma e matakavi nonofo tagata ne putoia e tau matakavi nei kua lata ke fakamailoga fakamahino ke nakai gahua e tau pisinisi ko e taha vala he matakavi ia. He falu matakavi, maeke e tau pisinisi ke gahua fakalataha mo e tau matakavi nonofo tagata. Kaeke nakaila taute ia a koe he ha fakamatala he matakavi pisinisi, kamata he lali ke he falu fale koloa ikiiki.
3. Ko e heigoa ka lagomatai a tautolu ke lauia mitaki ka fakamatala he taha fale koloa ke he taha fale koloa?
3 Fakaaoga e Fakafeleveia Mukamuka: Ka fakamatala he taha fale koloa ke he taha fale koloa, kua aoga ke tauteute tuga ka fano a koe he feleveiaaga he Fale he Kautu. Kua mitaki foki ke fifili e magaaho ka nakai lavelave e fale koloa. Ka maeke, hu atu ki ai ka nakai fai tagata fakatau ne fakatali. Ole ke tutala ke he takitaki po ke tagata leveki. Kia fakaku mo e fakahako ke he manatu. Ko e heigoa hau ka liga talahau?
4-6. Ko e heigoa ha tautolu ka talahau he fakamatala ke he leveki fale koloa po ke takitaki?
4 Ka tutala ke he leveki fale koloa po ke takitaki, liga talahau e koe taha mena pehe: “Ko e tau tagata pisinisi kua to lahi e lavelave e tau setulu ti lavea ke moua a lautolu he tau kaina, ti kua ahi mai a mautolu ke he gahuaaga hau. Ko e tau mekasini ha mautolu kua talahau e onoonoaga ke he tau mena tutupu mogonei he lalolagi katoa.” Ti fakakite taha manatu ku mai he taha e mekasini.
5 Po ke liga fakaaoga e koe e fakafeleveia mukamuka nei: “Tokologa e tau tagata ne manako ke iloa lahi hagaao ke he Tohi Tapu ka e tote lahi e magaaho. Kua fakamaama he tuleke nei e taha fakaholoaga fakaako nakai fai totogi ke lagomatai a koe ke kumi e tau tali ke he tau huhu faka-Tohi Tapu hau.” Ti fakakite age e lau 4-5 he tuleke Manako Nakai a Koe ke Iloa Lahi e Tohi Tapu?
6 Ka liga lavelave lahi e leveki fale koloa, liga maeke ia koe ke foaki ni e tuleke mo e pehe: “To liu mai au ka nakai lavelave lahi a koe. Manako au ke iloa ko e heigoa hau a manatu ke he tuleke nei.”
7. Maeke fefe ia tautolu ke feaki e fiafia ka moua he matakavi pisinisi?
7 Feaki e Fiafia kua Fakakite: Liga maeke foki ia koe ke taute e fakaako Tohi Tapu he matakavi pisinisi. Ko e paionia gahua pauaki ne ta atu tumau e tau mekasini ke he tagata tane pisinisi. Magaaho ne fakakite he tagata e loto fakaaue ke he tau mena ne fa e totou a ia ki ai, ne fakatata age he paionia e fakaholoaga ke fakaako e Tohi Tapu, he fakaaoga e porosua Manako. Ne kamata e fakaakoaga he kavi ia ni ne gahua ai e tagata. He manamanatu ke he tau tutuaga, ne fakakaupa he paionia ke he 10 po ke 15 e minuti he tau magaaho oti. Kia pihia foki a tautolu he matutaki ke kumi a lautolu ne kua lata he fakamatala he matakavi pisinisi.