Fai Matakavi Fakatagata Nakai a Koe?
1. Ko e heigoa e matakavi fakatagata?
1 Ko e matakavi fakatagata ko e matakavi kua kotofa ki a koe. Kua liga hagahaga mitaki he tata ke hoko vave a koe ki ai mo e fakamatala tokotaha po ke mo e taha tagata fakailoa. Pete kua aoga ke lalago e tau fakatokaaga he fakapotopotoaga ke fakamatala ko e matakau, ka felauaki, ko e moua foki he matakavi fakatagata ke gahua he falu magaaho ka lagomatai ke taute fakamatafeiga e fakamatala, mua atu ke he tau fakapotopotoaga ne lahi e matakavi.—Gahua 10:42.
2. Ko e heigoa e falu aoga he fai matakavi fakatagata?
2 Tau Aoga: Kua moua he falu e tau aoga lafi ki luga he fakamatala he matakavi fakatagata ne tata ke he gahuaaga he magaaho okioki kai laā ha lautolu po ke ka hili e gahua. Kua fiafia falu he gahua auloa ko e magafaoa he tau katofia ni ha lautolu he liga taha e tulā ato kamata e Fakaakoaga Tohi he Fakapotopotoaga. Ko e fua, ne moua ni e tau liu aahi atu mo e tau fakaakoaga Tohi Tapu he matakavi tata, ti kua fakaaoga fakamitaki ai e malolō, magaaho mo e tupe. Ha kua lahi atu e mena ka taute he magaaho kū, kua lagomatai he matakavi fakatagata e falu ke paionia fakakū he falu magaaho po ke hū ko e paionia tumau. Lafi ki ai, ka gahua he matakavi fakatagata to mahani mo e tau tagata he tau kaina ti maeke ke lagomatai a tautolu ke mauokafua ki a lautolu mo e hikihiki e fakataitaiaga ke felauaki mo e tau tupetupe ha lautolu, to mua atu e lauia mitaki he fekafekauaga ha tautolu.
3. Ko e heigoa e mena ne tupu ke he taha paionia he moua e matakavi fakatagata?
3 Taha e paionia ne fakamafana he leveki takaiaga ke moua taha matakavi fakatagata ne talahau: “Ne talia e au e fakatonuaga nei ti nakai leva kua mahani lahi mo e fiafia ke he tau tagata he tau kaina he matakavi haaku. Ne hiki e au e tau magaaho ahiahi ke felauaki mo e magaaho kua hagahaga mitaki ki a lautolu. Ko e fua, ne holo hake e tau liu aahi atu haaku he 35 ke he 80 he taha e mahina, ti fitu e fakaakoaga Tohi Tapu haaku.”
4. Maeke fēfē ia koe ke moua mo e gahua e matakavi fakatagata?
4 Puhala ke Taute Aki: Ka manako a koe ke ole ma e taha matakavi fakatagata, tutala ke he fekafekau leveki matakavi. Atāina ke uiina taha tagata fakailoa ke gahua mo koe, ti fakamau hifo e tau fale ne nakai fai tagata i kaina. Lata ia koe ke lali ke taute e matakavi ke oti he fā e mahina. Ka uka ke taute pihia, maeke ke ole ke he leveki Fakaakoaga Tohi he Fakapotopotoaga haau po ke falu ke lagomatai. He matahiku he fā e mahina, maeke ia koe ke liuaki e matakavi kua oti he gahua po ke ole ke liu gahua foki i ai. Pete ia, nakai lata ia koe ke toka hololoa e matakavi taha ia ka e liuaki ke maeke he falu ke ole ki ai. Kaeke ko koe he fakapotopotoaga ne tote e matakavi ti nakai maeke ke moua e matakavi fakatagata, liga maeke ke ole ke he taha vala he matakavi mai he leveki fakaakoaga tohi haau.
5. Ko e heigoa kua latatonu ke fakamooli aki e kotofaaga ha tautolu ke fakamatala?
5 Ko e kotofaaga ha tautolu ke fakamatala “ke he lalolagi oti” ko e matagahua lahi. (Mata. 24:14) Kua latatonu ke fakatokatoka fakamitaki e tau laliaga. He lafi ke he fakamatala ko e matakau mo e fakamatala he matakavi fakatagata ka lagomatai a tautolu ke hokotia mo e tala mitaki ke he loga e tagata.