Ka Nakai Moua e Tau Tagata i Kaina
1. Ko e heigoa e lekua fa mahani he gahua he taha gutuhala ke he taha gutuhala?
1 Kua loga e matakavi ne uka fakahaga ke moua e tau tagata i kaina. He “tau aho uka” nei, tokologa kua eketaha ke gahua loa ke moua e tau mena kua lata fakatino. (2 Timo. 3:1) Ko e falu kua liga nakai nonofo he tau kaina ha kua o atu ke fakatau po ke fakafiafia. Maeke fēfē ia tautolu ke moua a lautolu ia ke tala age ki ai e tala mitaki?
2. Maeke fēfē ia tautolu ke iloa mitaki to taute e tau kaina ne nakai moua ha tagata?
2 Fakamau Fakamitaki Tumau: Ko e lakaaga fakamua ke tohi hifo a lautolu ne nakai moua i kaina. Kua aoga lahi e mena nei kaeke ko e matakavi gahua tumau ha mutolu. Kua tohi hifo nakai e koe e higoa he puhalatū, numera he matakavi, higoa haau, mo e aho? Liga fakaatā e koe taha vala he laupepa ma e falu manatu lafi ki luga ka liu atu a koe po ke taha tagata fakailoa ke taute e tau fale ne nakai moua ha tagata i kaina. Ka oti e fakamatala i ai, manatu ke age e laupepa fakamau po ke tau vala tala ke he tagata ne leveki e matakavi, ato kehe ai ka talia e ia ke taute e koe e tau kaina ne nakai moua ha tagata i ai. Fakaaoga e laupepa kehe ke fakamau e tau tagata ne fiafia ke liu a koe ki ai.
3. Ko e heigoa falu puhala ke hokotia ki a lautolu ne nakai moua i kaina?
3 Lali he Taha Magaaho Kehe: Liga ko e falu ne nakai moua i kaina he aho gahua ka kua liga haia i kaina he magaaho afiafi po ke he tau matahiku faahi tapu. Maeke nakai ia koe ke fakatokatoka e setulu haau ke liu atu he taha magaaho hagahaga mitaki? (1 Kori. 10:24) Ka nakai pihia, liga maeke ia koe ke age e tau kaina ne nakai moua ha tagata ke he tagata fakailoa ne maeke ke liu atu he taha magaaho kehe. Po ke liga tohitohi a koe ki a lautolu ia ne nakai moua i kaina po ke lali ke matutaki mo lautolu he telefoni. Ko e tau tagata fakailoa ne fakakaupā he tau lekua malolō tino a lautolu ke gahua he taha fale ke he taha fale ka liga fiafia ke lagomatai a koe ke he puhala nei.
4. Ko e heigoa ne fakatātā e aoga he aahi atu ke he tau kaina ne nakai moua ha tagata i ai?
4 Ne fakatātā he taha mena ne tupu e aoga he lali ke moua a lautolu ne nakai haia i kaina. He mole e lagaloga e o atu e tau tagata fakailoa ke he taha kaina ke he tolu e tau, ne fakahiku ti moua e tagata he kaina. Ne pu ai kua leva e fakatali e fifine nei ke he taha Fakamoli ke fina atu ke matutaki e fakaakoaga Tohi Tapu haana ne kamata ato hiki mai a ia ke he matakavi ia.
5. Magaaho fe ka lata e matakavi ke oti he gahua?
5 Taute e Matakavi ke Oti: Magaaho fe ka lata e matakavi ke oti he gahua? Fa mahani ke oti he magaaho ka lali fakamakamaka ke moua taha tagata he tau kaina takitaha. Liga hagahaga mitaki ke toka fakalotomatala e tuleke po ke taha mekasini tuai he tau kaina ne nakai moua ha tagata i ai, mua atu ke he tau matakavi ne nakai taute tumau. Kua lata e matakavi ke oti he fa e mahina. Ti lata mogoia ke liuaki ke he fekafekau leveki matakavi ke maeke ia ia ke fakafoou e tau fakamauaga haana.
6. Ko e ha kua lata ia tautolu ke lali ke hokotia ke he tau tagata oti he matakavi ha tautolu ke tala age ki ai e tala mitaki?
6 Manako a tautolu ke tokologa e tagata ka moua e magaaho ke ako ke ui ke he higoa ha Iehova mo e fakamoui ai. (Roma 10:13, 14) Kua putoia he mena nei a lautolu ne nakai moua i kaina he aahi atu a tautolu he gahua he taha fale ke he taha fale. Ke tuga e aposetolo ko Paulo, kia eke mo manako haau ‘ke talahau fakatonu atu e tala mitaki he fakaalofa noa he Atua.’—Gahua 20:24.