Tau Feleveiaaga ma e Gahua he Fonua

1. Ko e ha kua manamanatu lahi mahaki a tautolu ke ō atu ke he gahua he fonua he puhala fakatokatoka?

¹ Ne fakakite e Iesu e fakafifitakiaga he leveki e gahua fakamatala he Kautu ke he puhala fakatokatoka mo e lauia mitaki. Tuga he vahā nei, ko lautolu ne lago ki ai e matagahua fakamatala nei he Kautu ke he lalolagi katoa, kua manako lahi mahaki ke kitia kua taute pihia foki e gahua nei. Ke felauaki mo e laliaga nei, kua fakaaoga he tau fakapotopotoaga he lalolagi katoa e tau feleveiaaga ma e gahua he fonua mo taha puhala ke fakatokatoka e tau matakau he tau tagata fakamatala he Kautu ma e gahua he fonua.​—Mata. 24:45-47; 25:21; Luka 10:1-7.

2. Ko e heigoa kua amanaki ki ai he tau feleveiaaga ma e gahua he fonua?

² Ko e Fakatokaaga Mitaki: Ko e tau feleveiaaga ma e gahua he fonua kua taute ke foaki e fakamalolōaga, fakaakoaga aoga, mo e takitakiaga ma lautolu kua amanaki ke ō atu he gahua he fonua. Kua liga lata ke fakatutala fakakū ke he kupu he aho ka felauaki mooli mo e gahua he fonua. He falu magaaho, kua fakatutala ke he tau liu fakamanatu mai he Ha Tautolu a Fekafekauaga he Kautu, he tohi Reasoning, po ke liga ko e tohi Ministry School, ke maeke ia lautolu oti ne fakalataha mai ke mautauteute ma e gahua he aho ia. Kua maeke foki ke taute e fakatātā kū hagaao ke he tohi ka foaki. Ato taute e liogi fakaoti, kua lata e tau tagata oti ke iloa ko hai ka gahua mo lautolu he fonua mo e haia i fe e matakavi ka gahua ai. Nakai leva he oti e feleveiaaga nei ne nakai molea e 15 minuti, kua lata he tau tagata oti ke ō atu ke he fonua.

3. Kua lago ki a hai ke fakatokatoka e tau feleveiaaga ma e gahua he fonua?

³ Fakatokatoka Fēfē a Lautolu? Ko e leveki fekafekau ne takitaki e gahua, kua lago ki ai ke leveki e tau feleveiaaga ma e gahua he fonua. Kua lago ke he tau leveki matakau, po ke tau lagomatai ha lautolu, ke fakatauō mo e tau matakau ha lautolu ke he gahua he fonua he tau matahiku faahi tapu. Kua liga maeke he falu leveki po ke tau fekafekau lagomatai ke fakatauō mo e tau matakau ne gahua he faahi tapu. Kua gahua auloa e tau leveki matakau mo e leveki fekafekau ke maeke ke lahi e matakavi ke gahua ai e matakau ha lautolu mai he taha fale ke he taha fale he tau matahiku faahi tapu. He faahi tapu, to matakite he leveki fekafekau e tau fakatokaaga ma lautolu ka uta e tau matakau ke he gahua he fonua.

4-6. (a) Matutaki fēfē e foliaga he tau feleveiaaga ke he fonua he fakapotopotoaga? (e) Ko e heigoa ka fakatutala ki ai ke fifili e mena kua lata ma e tau feleveiaaga he gahua he fonua?

⁴ I Fe mo e Magaaho Fe Kua Lata ke Taute e Tau Feleveiaaga Nei? He nakai fakatoka ke feleveia e fakapotopotoaga katoa he taha e matakavi, kua mitaki lahi mahaki ma e tau feleveiaaga nei ke taute he tau matakavi kua latatonu, fa mahani ke he tau kaina tagata, ne haia he matakavi mo e foliaga ke lauia mitaki e gahua he fonua he fakapotopotoaga. Kua maeke foki ke fakaaoga e tau Fale he Kautu ma e matagahua nei. Loga e fakapotopotoaga ne fakaaoga e Fale he Kautu ke taute ai e feleveiaaga ma e gahua he fonua, he nakaila leva e oti e lauga ma e tau tagata mo e Fakaakoaga he Kolo Toko. Kua lata ke taute e tau laliaga ke fakatote hifo e magaaho ka fenoga atu ke he fonua. Ko e mena ia, kua maeke e tau fakatokaaga ke fokifoki he tau magaaho ke iloa mooli ko e tau matakavi ne fakaaoga mogonei, kua tumau ke hagahaga mitaki ke maeke ke gahua oti mo e fakamitaki e fonua.

⁵ Ko e magaaho mitaki lahi ke taute e tau feleveiaaga nei mo e lagafiha e taute he faahi tapu kua fakavē ni ke he tuaga he fonua. Ko e tau hūhū nā ka eke mo takitakiaga ke fifili ko e i fe mo e magaaho fe kua mitaki lahi ke taute ai e tau feleveiaaga ma e gahua he fonua.

⁶ Ha e fe e fonua ne lata ke kikite fakalahi ki ai? Ko e heigoa e magaaho mitaki lahi ke gahua mai he taha fale ke he taha fale? Kua lata kia ke setulu taha magaaho he afiafi ke gahua he taha fale ke he taha fale po ke taute e tau liu aahi atu? Kua lata e tau fakatokaaga oti ma e gahua he fonua ke tuku hake he lapa fakailoa he fakapotopotoaga. Ko e manako he tau tagata fakailoa oti he Kautu ke gahua katoa e fonua kua kotofa ki a lautolu ke maeke foki ia tautolu ke talahau tuga e aposetolo ko Paulo: “Kua nakai tuai fai mena ke nofo ai [po ke, ne toe ia] au ke he tau fahi nai.”​—Roma 15:23.

7. Ko e heigoa ne lago ke he tagata ne kotofa ke uta e matakau he gahua he fonua?

⁷ Taute e Tau Feleveiaaga ma e Gahua he Fonua: Ko ia ne kotofa ke leveki e feleveiaaga nei kua fakakite e lilifu hokulo ma e fakatokaaga fakateokarasi nei he tauteute fakamitaki. Ko e tau feleveiaaga nei kua lata ke kamata he tulā kotofa mo e lata ke atihake mo e fakakū, he 10 ke he 15 e minuti. Kua lata he tagata kua taute e feleveiaaga ke fai matakavi ke gahua ai, ato kamata e feleveiaaga. Pete kua nakai lata ke fakatali ki a lautolu ne mule mai ka oti e feleveiaaga ma e gahua he fonua, kua lagomatai lahi ke toka e fekau hagaao ke he matakavi ka gahua ai e matakau. Kua lata e tau tagata oti ke ō atu ke he matakavi ne kotofa, he nakai leva e hili e feleveiaaga. Ko e feleveiaaga ma e gahua he fonua ne fakatokatoka mitaki mo e atihake kua foaki mooli e takitakiaga kua lata ma lautolu oti ne fakalataha mai ke taute e fekafekauaga ha lautolu he aho ia.​—Fakatai 11:14.

8. Ko e tau puhala fe ka kaufakalataha a lautolu ne ō ke he tau feleveiaaga he gahua he fonua mo lautolu ne taki e gahua?

⁸ Ō ke he Tau Feleveiaaga ma e Gahua he Fonua: Kua aoga lahi mahaki e kaufakalataha. (Hepe. 13:17) Ka maeke, ko e tagata ne fakatokatoka e matakau to lagomatai ha tagata ne manako ke fai tagata ke gahua mo ia. Kua mitaki ma e tau tagata fakailoa ne fai iloaaga ke fakalataha atu ke maeke ke lagomatai e levekiaga he tau tagata fakailoa ne foou lahi mo e tote agaia e iloaaga. Ko lautolu ne makai ke kotofa ke gahua mo e taha tagata kehe, he falu magaaho, to maeke ke mitaki lahi e mena ka taute. (Fakatai 27:17; Roma 15:1, 2) Kua lata he tau tagata oti ke lali fakalahi ke hohoko tuai atu. Ko e fakalilifu ha tautolu ke he fakatokaaga fakateokarasi nei mo e manamanatu ke he tau matakainaga ne fekafekau fakalataha mo tautolu ka omoomoi a tautolu ke taute e tau hikihikiaga kua lata hagaao ke he mena nei.​—2 Kori. 6:3, 4; Filipi 2:4.

9. Ko e heigoa e tau puhala aoga lahi ka lalago he tau paionia e fakatokaaga nei?

⁹ Lalago he Paionia: He lalago he paionia e tau feleveiaaga ma e gahua he fonua, kua mua atu e aoga mo e fakamalolō lahi ke he tau tagata oti. Ka e maama ai, na loga e matagahua he tau paionia. Kehe mai he taute e tau fakaako Tohi Tapu mo e ahiahi atu, kua liga putoia ke he ha lautolu a setulu he aho e levekiaga he tau matagahua he magafaoa mo e gahua tupe. Ti, kua nakai lata he tau paionia ke logona hifo e lata ke lalago e tau feleveiaaga oti ma e gahua he fonua ne fakatoka he fakapotopotoaga, mua atu ka taute ai he tau aho takitaha. Pete ia, kua liga maeke he tau paionia ke lalago falu feleveiaaga ma e gahua he tau faahi tapu takitaha. Ke he falu tuaga, kua eke e tau feleveiaaga ma e gahua he fonua mo fakamahani, ti ko e feakiaga fakaagaaga mo e iloaaga he tau paionia kua maeke ke lagomatai lahi ke he falu. Ko e fakalataha tumau ha lautolu ke he gahua he fonua ka maeke ia lautolu ke moua e iloaaga ke he fekafekauaga. Lata ke gahua auloa ke he mena nei. Ko e fakalatahaaga makutu ha lautolu ke he fekafekauaga mo e tau feleveiaaga ma e gahua he fonua, ne taute a lautolu mo tau fakafifitakiaga ke muitua ki ai. Ti ko e fakalataha ha lautolu ke he tau feleveiaaga nei ma e gahua, kua loto fakaaue lahi ki ai.

10. Ko e ha kua latatonu he tau tagata fakailoa oti he Kautu ke lalago loto katoa e fakatokaaga nei?

¹⁰ Ke tuga ne taute e Iesu mo e tau tutaki haana, ko e vala lahi he ha tautolu a gahua fakamatala he Kautu kua taute he fakamatala mai he taha fale ke he taha fale. Ko e tau kakano ma e tau feleveiaaga he gahua he fonua ko e fefakamalolōaki mo e fakalataha lauia mitaki ke he gahua nei. Ko e tau tagata fakailoa oti he tala mitaki kua lata mo tau tagata lalago he tau fakatokaaga fakateokarasi ia ke he mena kua lata. (Gahua 5:42; 20:20) Kia lalago loto katoa e tautolu oti e fakatokaaga nei. He taute pihia, to moua mooli e tautolu e monuina lahi ha Iehova mo e maeke ke fakafiafia e loto he ha tautolu a Takitaki, ko Iesu Keriso, he fakamatala e tautolu e tala mitaki he Kautu he Atua.​—Mata. 25:34-40; 28:19, 20.