Puhala ka Aoga Mai he Haau a Matakau Gahua he Fonua
1. Ko e heigoa e tau aoga he fakaholoaga Fakaakoaga Tohi he Fakapotopotoaga ne moua agaia e tautolu he ha tautolu tau matakau gahua he fonua?
1 Liu nakai a koe manatu e falu vala he Fakaakoaga Tohi he Fakapotopotoaga? Ne ikiiki e tau matakau ti okioki mitaki e fakaholoaga. Maeke he mena nei ke mukamuka ke feaki e fakafetuiaga kapitiga ne eke mo punaaga he lalagoaga fakaagaaga. (Fakatai 18:24) Ko e leveki fakaako Tohi Tapu ne iloa mitaki e tau tuaga kehekehe ha tautolu ti maeke ke foaki e fakamafanaaga fakatagata. (Fakatai 27:23; 1 Pete. 5:2, 3) Moua agaia e tautolu e tau aoga nei he ha tautolu a tau matakau gahua he fonua.
2. Maeke fēfē ia tautolu ke fakailoilo ke feaki e tau fakafetuiaga kapitiga i loto he matakau gahua he fonua ha tautolu ne eke mo punaaga he lalagoaga fakaagaaga?
2 Kia Fakailoilo: Kua fa tatai ni e tokologa he tau matakau gahua he fonua mo e tau matakau fakaako tohi. He gahua “fakamakamaka fakalataha” mo e falu he fonua, ka fua mai e fakafetuiaga tata. (Filipi 1:27) Tokofiha he matakau haau kua gahua mo koe? Maeke nakai a koe ke ‘fakalahi e loto’ ke he mena nei? (2 Kori. 6:13) Lafi ki ai, liga uiina e tautolu he falu mogo e taha mai he matakau ha tautolu ke fakalataha mai ke he ha tautolu a Tapuakiaga Magafaoa he afiafi po ke kai auloa. He falu fakapotopotoaga, ne fakafetokaki e tau matakau gahua he fonua ke leveki e tagata ahiahi mai ke lauga. He faahi tapu ka kotofa ki ai a lautolu, ne fakapotopoto e matakau ke kai auloa mo e fefakamafanaaki pete he fakalataha atu po ke nakai e tagata lauga.
3. Ko e heigoa e falu magaaho mitaki ke moua e levekiaga mai he ha tautolu a matakau gahua he fonua?
3 Pete he lagaua ni e feleveia auloa e fakapotopotoaga he faahi tapu mogonei, nakai kakano e mena nei kua tote e levekiaga ke he tau tagata fakailoa. Kua kotofa e tau leveki matakau he tau matakau takitaha ke fakamafana mo e fakamahani e tau matakainaga mo e gahua he fonua. Ka nakaila fakatoka ia he leveki matakau ke gahua mo koe he fonua, ko e ha ne nakai ole ke gahua mo ia? Lafi ki ai, ko e leveki fekafekau kua fakalataha ke he gahua he fonua mo e tau matakau kehekehe he taha matahiku he faahi tapu he mahina. He tau fakapotopotoaga ikiiki ne gahoa ni e tau matakau gahua he fonua, to liga fakatokatoka e ia ke lagaua e ahiahi ke he matakau he tau. Fakatokatoka nakai e koe e fakaholoaga haau ke fano he gahua he fonua ka hau a ia ke he matakau haau?
4. (a) Fakatokatoka fēfē e tau feleveiaaga ma e gahua he fonua? (e) Ko e ha kua lata ke manamanatu a tautolu ke fakaatā e kaina ha tautolu ma e tau feleveiaaga he gahua he fonua?
4 Kua fa aoga ke feleveia kehekehe e tau matakau takitaha ma e gahua he fonua he tau matahiku faahi tapu. He loga e tau matakavi ke feleveia ma e gahua he fonua, ne teitei tatai e magaaho kamata, ka fakamukamuka ai ma e tau tagata fakailoa ke o atu ke he feleveiaaga ma e gahua fakamatala mo e fonua foki. Maeke e tau tagata fakailoa ke fakatokatoka fakamafiti ti kamata ke o atu ke he fonua mo e nakai fakamule. Mukamuka foki ma e leveki he matakau ke matakite lahi ki a lautolu i lalo he levekiaga haana. Pete ia, maeke he tau tuaga ke fakaatā ma e tau matakau ke lafi auloa. Ka feleveia e fakapotopotoaga katoa ma e gahua he Aho Faiumu fakamua he mahina po ke ka oti e Fakaakoaga Kolo Toko, kua fa mitaki ke nonofo auloa e tau matakau takitaha mo e leveki matakau ke fai magaaho ke fakatokatoka e matakau haana ato fakaoti e feleveiaaga ma e gahua he fonua ke he liogi.—Kikite e puha “Maeke Nakai ia Koe ke Fakaatā e Kaina Haau?”
5. Pete kua fakaoti tuai e fakaholoaga he Fakaakoaga Tohi he Fakapotopotoaga, ko e heigoa ka mauokafua ai a tautolu?
5 Pete kua fakaoti ai e fakaholoaga he Fakaakoaga Tohi he Fakapotopotoaga, kua matutaki agaia a Iehova ke foaki e tau mena oti kua lata ia tautolu ke taute aki haana finagalo. (Hepe. 13:20, 21) I lalo hifo he takitakiaga ha Iehova, nakai fai mena a tautolu ke nofogati ai. (Sala. 23:1) Loga e monuina kua puhala mai he ha tautolu a matakau gahua he fonua. Ka fakailoilo a tautolu ke ‘fakalahi e saito kua gana,’ to ‘fakalahi foki ka helehele mai.’—2 Kori. 9:6.
[Puha he lau 8]
Maeke Nakai ia Koe ke Fakaatā e Kaina Haau?
Ko e falu fakapotopotoaga kua lafi e tau matakau gahua he fonua he matahiku faahi tapu ha kua nakai loga e kaina ke feleveia i ai. Ko e feleveia ma e gahua he fonua ko e vala he fakaholoaga he fakapotopotoaga, ti ko e taute e tau feleveiaaga nei he kaina ha tautolu ko e kotofaaga lilifu mooli. Maeke nakai ia koe ke fakaatā e kaina haau? Ua mataofi ha kua nakai tokotoko mitaki e kaina haau. To manamanatu e tau motua ke he matakavi ne tu ai e kaina haau mo e falu mena foki tuga ni he mogo ne manamanatu a lautolu ke fifili e tau matakavi ma e fakaako tohi. Ka manako a koe ke fakaatā e kaina haau, fakailoa age ke he leveki matakau.