Lagomatai he Fakaholoaga he Fakaakoaga Tohi he Fakapotopotoaga a Tautolu
1. Lagomatai fēfē he ha tautolu a tau feleveiaaga ne lima he faahi tapu a tautolu?
1 Ko e ha tautolu a tau feleveiaaga takitaha ne lima he faahi tapu kua igatia mo e puhala mo e kakano. Ka kua aoga oti ke lagomatai a tautolu ke “fakalagalaga ai e fakaalofa mo e tau gahua mitaki.” (Hepe. 10:24, 25) Ko e heigoa e falu vala kehe lahi mo e aoga he fakaholoaga he Fakaakoaga Tohi he Fakapotopotoaga?
2. Ko e heigoa e tau aoga mai he tote e matakau ne feleveia he fakaakoaga tohi?
2 Lagomatai ke Holo ki Mua Fakaagaaga: Kua fa tote hifo e numera ha lautolu ne o atu he fakaakoaga tohi ke he numera ne o atu ke he falu feleveiaaga he fakapotopotoaga. Kua fakamukamuka he mena nei ke feaki e tau kapitiga ne eke mo punaaga he lalagoaga fakaagaaga. (Fakatai 18:24) Kua lali nakai a koe ke iloa a lautolu oti he matakau fakaakoaga tohi haau, liga he ole ki a lautolu takitokotaha ke gahua mo koe he fekafekauaga? Kua taute foki e fakaholoaga he fakaakoaga tohi ke maeke he leveki fakaakoaga tohi ke iloa e tau tuaga pauaki ha lautolu takitokotaha he matakau mo e foaki e fakamalolōaga fakatagata.—Fakatai 27:23.
3. Puhala fe he fakaholoaga he fakaakoaga tohi ne fakamalolō ke tali mo e o mai foki e tau tagata fakaako Tohi Tapu?
3 Kua uiina nakai e koe e tau tagata fakaako Tohi Tapu haau ke o mai mo koe he fakaakoaga tohi? Ko lautolu ne fiafia ka kua uka ke fakalataha ke he tau feleveiaaga lalahi ha tautolu to liga nakai hopoate lahi ka fakalataha ke he fakapotopotoaga tote, mua atu ke he kaina he tagata. Kua fakamukamuka he takatakai mafanatia a lautolu ne ikiiki mo lautolu ne fakalataha mai foou ke tali. Ha kua tote e matakau, ne lahi e magaaho ha tautolu ke tali mo e fakaheke a Iehova.—Sala. 111:1.
4. Ko e fakaholoaga he fakaakoaga tohi kua liga hagahaga mitaki ke he tau puhala fe?
4 Kua mahani e tau fakaakoaga tohi ke taute he tau matakavi kua hagahaga mitaki ke he matakavi katoa. Pete kua nakai maeke ke kotofa a lautolu oti ke he matakavi ne tata ki a lautolu, kua liga tata agaia ka o atu ke he fakaakoaga tohi kua kotofa a tautolu ki ai ka fakatatai mo e o atu ke he falu feleveiaaga he fakapotopotoaga. Kua maeke foki e matakavi he fakaakoaga tohi ke eke mo matakavi hagahaga mitaki ke feleveia ai ma e gahua he fonua.
5. Liga ko e puhala fe ka moua e tautolu e lagomatai ma e fekafekauaga mai he leveki fakaakoaga tohi ha tautolu?
5 Lagomatai ma e Fekafekauaga: Kua fiafia e leveki he fakaakoaga tohi ke lagomatai takitokotaha a lautolu i ai ke fai vala tumau, fai kakano, mo e fiafia he fakalataha ke he fekafekauaga. Ko e mena ia, kua eketaha a ia ke gahua mo lautolu oti he matakau, he foaki e lagomatai fakatagata ke he tau puhala kehekehe he fekafekauaga. Ka fai vala e fekafekauaga haau ne uka, tuga e taute e tau liu aahi atu, ti fakailoa ke he leveki he fakaakoaga tohi haau. Liga to fakatoka e ia a koe ke gahua mo e taha tagata fakailoa kua iloa lahi ne ha ha he matakau. To holo ki mua e lotomatala haau ke taute e tau fakaakoaga Tohi Tapu he fanogonogo fakamitaki ke he tau puhala fakaako mitaki he leveki fakaako tohi he taute e ia e fakaakoaga tohi.—1 Kori. 4:17.
6. Ko e ha kua lata ia tautolu ke eketaha ke aoga katoatoa mai he fakaholoaga he fakaakoaga tohi?
6 Ko e fakamonuinaaga mooli e Fakaakoaga Tohi he Fakapotopotoaga! Ko e fakaholoaga fakaalofa nei mai ia Iehova ka lagomatai a tautolu ke tumau mooli e mauokafua fakaagaaga ha tautolu he nonofo he tau vahā uka nei.—Sala. 26:12.