Puhala ke Fakakite he Tau Leveki Fakaakoaga Tohi he Fakapotopotoaga e Fiafia Fakatagata

¹ Ko e Fakaakoaga Tohi he Fakapotopotoaga kua taute ke “maeke ke foaki e onoono fakamatafeiga ke he tupu fakaagaga he tau tagata takitokotaha. . . . Hanai e fakaata he fakaalofa totonu mo e hofihofi ha Iehova ke he hana tau tagata.” (om lau 75; Isaia 40:11) Ko e leveki fakaakoaga tohi kua lago ki ai e feua aoga lahi ke foaki e onoonoaga fakamatafeiga fakatagata pihia.

² Ke he Fakaakoaga Tohi: Ha kua fakaikiiki pauaki e tau veveheaga matakau fakaakoaga tohi, kua maeke e leveki fakaakoaga tohi ke iloa mitaki e ia e tau tagata he matakau hana. (Fakatai 27:23) Kua fa mahani ke loga e tau magaaho ke lafi auloa ato kamata po ke ka hili e fakaakoaga he tau fahi tapu takitaha. Ke he taha e mahina, liga kua teitei oti e tau tagata he matakau hana he tutala a ia ki ai. To lagomatai foki he mena nei e tau tagata he fakaakoaga tohi ke mafanatia ke o atu ki a ia he magaaho ka fehagai mo e tau kamatamata po ke ka manako fakamafanaaga.​—Isaia 32:2.

³ Ko e leveki fakaakoaga tohi ka lali ke fakamafana a lautolu oti he matakau ke tali he fakaakoaga. Taha puhala ka taute e ia e mena nei ko e fakaholo e fakaakoaga ke he puhala totonu mo e loto molu. (1 Tesa. 2:7, 8) To kumi e ia e tau puhala ke putoia oti ke he fakatutalaaga, pihia foki mo lautolu ne ikiiki. Ka ma falu ke tali, maeke ia ia ke foaki e lagomatai fakatagata he fakatoka tuai ke totou e lautolu e kupu tohi po ke tali pauaki he taha paratafa. Po ke maeke a ia ke fakakite ki a lautolu e puhala ke tali ni ke he tau kupu ha lautolu.

⁴ Kaeke ko e tagata lagomatai he leveki fakaakoaga tohi ko e fekafekau lagomatai, to fakatokatoka he leveki ke taute e ia e fakaakoaga lagataha he ua e mahina. Fakaata he mena nei e leveki ke kitekite ke he fekafekau lagomatai mo e foaki e tau fakatonuaga lagomatai. Ko e fakatokaaga fulufuluola ha a ia ke lagomatai e tau matakainaga tane ke tolomaki ki mua ke he puhala fakaako atu!​—Tito 1:9.

⁵ Ke he Gahua he Fonua: Ko e taha he tau matapatu gahua he leveki fakaakoaga tohi ke takitaki e gahua evagelia. (Nume. 27:16, 17) Taute e ia e tau fakatokaaga kua gahuahua ma e matakau ke fakamatala mo e eketaha ke lagomatai a lautolu oti he matakau ke moua e olioli ke he fekafekauaga ha lautolu. (Efeso 4:11, 12) Ke moua e mena nei, to taute e ia e foliaga ke gahua mo e tau tagata takitaha he matakau. Lagomatai foki e ia e leveki fekafekau ke fakatokatoka ma lautolu kua manako ke fakatolomaki ki mua falu fahi he gahua fekafekau ha lautolu ke moua e lagomataiaga mai he taha tagata fakailoa.

⁶ Ke Tuga e Leveki Mamoe Fakaalofa: Ko e leveki fakaakoaga tohi kua fiafia ki a lautolu ha ko e mai he tau tutuaga ha lautolu kua putoia agaia ke fai vala tote ke he gahua fakamatala. To mataala a ia ki a lautolu kua fai fakakaupaaga lahi ha kua motua po ke ha kua nonofo fale fakalataha mo lautolu kua fakakaupa fakaku ha kua gagao lahi po ke pakia, ke mailoga e lautolu e lagomatai ne fakaata ki a lautolu ke tuku e hokotaki he fekafekauaga ke he tau 15 minuti kaeke nakai fahia ke hokotaki katoa ke taha e tula he mahina. (Ko e Komiti Fekafekau he Fakapotopotoaga ka fifili ko hai kua lata mo e tuaga nei.) Fakakite foki e ia e fiafia ki a lautolu kua kotofa ke he matakau nukua liga lolelole, he eketaha ke lagomatai a lautolu ke liliu kamata ha lautolu a gahua mo e fakapotopotoaga.​—Luka 15:4-7.

⁷ Kua fakaaue ha a tautolu ke he tau fakaalofa fiafia kua fakakite he tau leveki fakaakoaga tohi! Ko e fiafia fakatagata ne foaki e lautolu kua lagomatai ke “hohoko atu a tautolu oti kana ke he loto fakalataha ke he tua, . . . ke he fafatiaga he loa kua lata mo e puke ha ia Keriso.”​—Efeso 4:13.