Fakaakoaga Tohi he Fakapotopotoaga—Kakano kua Lata ma Tautolu
1. Ko e heigoa e tau tamataaga fakamua he fakatokaaga he Fakaakoaga Tohi he Fakapotopotoaga?
1 He 1895, ko e tau matakau fakaako he Tau Tagata Fakaako Tohi Tapu, ko e higoa he Tau Fakamoli a Iehova he magaaho ia, ne iloa ai ko e Dawn Circles for Bible Study. Ko e tau volume he Millennial Dawn kua fakaaoga ko e matapatu ma e fakaakoaga. Nakai leva ti fakahigoa e tau feleveiaaga nei ko e Berean Circles for Bible Study. (Gahua 17:11) Ne fa mahani ke feleveia e matakau kua latatonu ni e numera ke he kaina tagata he magaaho afiafi kua hagahaga mitaki ke he matakau. Ko e tau feleveiaaga nei ko e tau tamataaga he Fakaakoaga Tohi he Fakapotopotoaga.
2. Maeke fefe ia tautolu ke foaki e ‘fefakamafanaaki e taha ke he taha ke he tua’ ke he fakaakoaga tohi?
2 Fefakamafanaaki mo e Lagomatai: Ha kua fakaikiiki pauaki e tau matakau fakaakoaga tohi, kua lahi mahaki ai e magaaho ma lautolu kua fakalataha ke fakakite e ha lautolu a tua. Ko e fua ko e ‘fefakamafanaaki e taha ke he taha ke he tua.’—Roma 1:12.
3, 4. Maeke fefe he fakatokaaga fakaakoaga tohi ke lagomatai a tautolu ke fakamoli ha tautolu a fekafekauaga?
3 Ko e kitekite ke he aga fakaako he leveki fakaakoaga tohi ka lagomatai a tautolu ke “fakatokatoka fakahako e kupu moli.” (2 Timo. 2:15) Mailoga e puhala ne peehi e ia e tau matapatu faka-Tohi Tapu he vala tala. Kaeke ke hagahaga mitaki ke he tohi hane fakaako, liga lata ia ia ke fakamaama e tau matapatu manatu he liu fakamanatu he fakaotiaga, he fakaaoga ni he Tohi Tapu. Ko e fakafifitakiaga mitaki hana ka lagomatai a tautolu ke fakatolomaki ki mua ha tautolu a fakaako ke he fekafekauaga Kerisiano.—1 Kori. 11:1.
4 He lalafi atu ke he taute e fakaakoaga he fahi tapu, kua takitaki he leveki fakaakoaga tohi e gahua fakamatala. He gahua fakalataha mo e leveki fekafekau, kua taute e ia e tau fakatokaaga kua felauaki ma e gahua he fonua. Foli a ia ke lagomatai oti a lautolu he matakau ke fakamoli ha lautolu a matagahua Kerisiano ke fakamatala e tala mitaki mo e taute tutaki.—Mata. 28:19, 20; 1 Kori. 9:16.
5. Ko e heigoa e lagomataiaga fakatagata kua moua mai he fakaakoaga tohi?
5 Ko e leveki fakaakoaga tohi kua manamanatu ke he moui fakaagaga ha lautolu takitokotaha i loto he matakau. Kua fakakite e ia e fiafia he tau feleveiaaga he fakapotopotoaga mo e gahua a ia mo e falu ke he fekafekauaga he fonua. Kua fakaaoga foki e ia e tau magaaho ka aahi atu a ia ke he tau kaina he tau matakainaga ke foaki e lagomataiaga fakaagaga. Kua lata he tau tagata ke logona hifo e fiafia ke o atu ke he leveki fakaakoaga tohi ma e lagomataiaga fakaagaga he ha magaaho ha lautolu kua lata ki ai.—Isaia 32:1, 2.
6. (a) Maeke fefe he tau matakainaga ha tautolu he falu motu ke fakamalolo fakaagaga ha ko e feleveia ke he tau matakau ikiiki? (e) Kua maeke fefe ke aoga fakatagata a koe mai he fakatokaaga fakaako tohi?
6 Fefakamaloloaki: Ke he tau motu ne kua fakakaupa e gahua he tau tagata he Atua, kua fa mahani e tau matakainaga ke feleveia ke he tau matakau ikiiki. Taha e matakainaga tane ne liu manatu: “Pete ni kua pa e tau gahua faka-Kerisiano ha mautolu, ko e ha magaaho ni kua maeke ne taute e mautolu e tau feleveiaaga fakafahitapu ke he tau matakau toko 10 ke he 15. Mai he tau feleveiaaga ne moua mai e mautolu e malolo fakaagaga, mai he ha mautolu a fakaakoaga he Tohi Tapu mo e ha mautolu a fakalataha auloa ka oti e fakaakoaga. Kua fakatatai e mautolu ha mautolu a tau mena tutupu, mo e kua lagomatai he mena nei a mautolu ke mailoga kua igatia a mautolu mo e taufetului kua tatai.” (1 Pete. 5:9) Kia pihia a tautolu, ke lagomatai e taha ke he taha he lalago e fakatokaaga Fakaakoaga Tohi he Fakapotopotoaga.—Efeso 4:16.