Tau Feleveiaaga ma e Gahua he Fonua kua Fai Kakano Mooli
1. Ko e heigoa e kakano he tau feleveiaaga ma e gahua he fonua?
1 He taha magaaho, ne feleveia a Iesu mo e toko 70 he tau tutaki haana ato ō a lautolu he matagahua fakamatala. (Luka 10:1-11) Ne tala age e ia e fakamalolōaga he fakamanatu ki a lautolu to nakai ni ko lautolu hokoia mo e kua takitaki e Iehova a lautolu ko e ‘Iki he tau saito ke helehele.’ Ne tala age foki e ia ki a lautolu e tau fakatonuaga ke lagomatai a lautolu ke taute aki e gahua, ti fakafano atu “takitokoua” e ia a lautolu. He vahā nei, ko e tau feleveiaaga ato ō a tautolu ke he gahua he fonua ne pihia foki—ke fakamalolō, lagomatai, mo e fakatokatoka a tautolu.
2. Fiha e loa he feleveiaaga kua lata ma e gahua he fonua?
2 He tau magaaho kua mole, ko e feleveiaaga ma e gahua he fonua ne katoa ke 10 ke he 15 e minuti, ne putoia ai e fakatokatoka he tau matakau, kotofa e fonua ke gahua, mo e liogi. Mogonei kua hiki tuai. Kamata ia Aperila, ko e feleveiaaga ma e gahua he fonua to katoa ke lima ke he fitu e minuti. Kaeke ke fai feleveiaaga he fakapotopotoaga kua oti laia, kua lata foki ke kū atu ha kua fitā e fai fakatutalaaga faka-Tohi Tapu kua moua e lautolu. Ko e tau feleveiaaga kū ma e gahua he fonua to maeke oti ai ke lahi e magaaho ke gahua he fonua. Lafi ki ai, ka fitā e fakamatala he tau paionia po ke tau tagata fakailoa ato ō a lautolu ke he feleveiaaga ma e gahua he fonua, to nakai lata ke lahi e tauhele ke he matagahua ha lautolu.
3. Maeke ke fakatokatoka fēfē e tau feleveiaaga ma e gahua he fonua ke lagomatai lahi ke he tau tagata fakailoa?
3 Kua lata ke fakatoka e tau feleveiaaga ma e gahua he fonua ke maeke ke lagomatai lahi ke he tau tagata fakailoa. He tau fakapotopotoaga loga ne latatonu ma e tau matakau gahua he fonua ke feleveia kehekehe ka e nakai fakalataha ke he taha e matakavi. Maeke e mena nei ke fakamukamuka ma e tau tagata fakailoa ke o atu ke he feleveiaaga ma e gahua he fonua mo e matakavi. Maeke e tau tagata fakailoa ke mafiti e fakatokatoka, ti liga mukamuka lahi ma e tau leveki he matakau ke matakite ke he tau matakainaga he matakau. Ko e kau he tau motua ka manamanatu ke he tau tuaga he matakavi ti fifili e mena kua mitaki lahi mahaki. Ato fakaoti e feleveiaaga aki e liogi kū, kua lata oti ke iloa e matakavi mo e hoa ka gahua mo lautolu.
4. Ko e ha kua nakai lata e tau feleveiaaga ma e gahua he fonua ke onoono ki ai kua nakai aoga lahi tuga e falu feleveiaaga?
4 Aoga Lahi ke Tuga e Falu Feleveiaaga he Fakapotopotoaga: Ha kua fakahoko e tau feleveiaaga ma e gahua he fonua ke lata mo lautolu ka o atu ke he fonua, to nakai fakalataha atu e fakapotopotoaga katoa. Ka e nakai kakano e mena nei kua lata ke fakateaga po ke onoono ki ai kua nakai aoga ke tuga e falu feleveiaaga he fakapotopotoaga. Tuga ni e tau feleveiaaga oti ha tautolu, ko e tau feleveiaaga ma e gahua he fonua ko e foakiaga mai ia Iehova kua fakamalolō aki a tautolu ke fakalagalaga e taha ke he taha he fakaalofa mo e tau gahua mitaki. (Hepe. 10:24, 25) Ko e mena ia, kua lata e matakainaga leveki ke tauteute fakamitaki ke maeke e fakatutalaaga ke fakaheke a Iehova mo e aoga ki a lautolu ne fakalataha atu. Ka maeke ai, ko lautolu e tau tagata fakailoa kua ō ke he fonua ka lata ke eketaha ke hohoko atu ke he feleveiaaga nei.
Tau feleveiaaga ma e gahua he fonua kua nakai lata ke uta fakateaga po ke onoono kua nakai aoga lahi ke tuga e falu feleveiaaga he fakapotopotoaga
5. (a) Ko e heigoa e matagahua he leveki fekafekau he fakatoka e tau feleveiaaga ma e gahua he fonua? (e) Taute fēfē he matakainaga fifine e feleveiaaga ma e gahua he fonua?
5 Tauteute he Matakainaga Leveki: Ke maeke e matakainaga ke tauteute fakamitaki ke taute e vala he feleveiaaga, kua lata a ia ke moua tuai e kotofaaga. Lata ke pihia foki e tau feleveiaaga ma e gahua he fonua. Mooli, ka feleveia ke he tau matakavi kehekehe he tau matakau gahua he fonua, ko e tau leveki matakau po ke ha lautolu a tau lagomatai ka taute e feleveiaaga ma e matakau ha lautolu. Kaeke ke fakalataha oti e fakapotopotoaga ke he feleveiaaga ma e gahua he fonua, to kotofa he leveki fekafekau taha ke taute ai. Falu leveki fekafekau ne age e fakaholoaga ke he tau matakainaga leveki oti ti pine hake e taha lagaki he lapa vala tala. Lata he leveki fekafekau ke fakailoilo ka kotofa e tau matakainaga leveki, he tokaloto ko e aoga he tau feleveiaaga nei to fakavē ke he lotomatala he puhala fakaako mo e fakatokatoka ha lautolu ne leveki. Ka nakai atā e motua, fekafekau lagomatai, po ke matakainaga taane papatiso ne hokotia kua kotofa ke taute e falu aho, lata e leveki fekafekau ke kotofa e matakainaga fifine papatiso ne lotomatala ke taute.—Kikite vala tala “Magaaho ka Taute he Matakainaga Fifine.”
6. Ko e ha kua aoga ma e matakainaga leveki ne fifili ke tauteute fakamitaki?
6 Ka moua e tautolu e kotofaaga ma e Aoga Fekafekau Fakateokarasi po ke Feleveiaaga Fekafekau, kua uta fakahokulo mo e tauteute fakamitaki ai e tautolu. Tokogahoa ia tautolu ka fakatali ato fenoga atu ke he feleveiaaga to kamata ke manamanatu ke he mena ka talahau e tautolu. Ko e kotofaaga ke taute e feleveiaaga ma e gahua he fonua kua lata ke taute fakamitaki. Ha kua kū lahi e feleveiaaga ma e gahua he fonua, kua aoga pauaki ke tauteute fakamitaki ke fai kakano uho mo e oti ai he magaaho fafati. Ko e tauteute mitaki foki kua putoia e moua tuai e matakavi ke gahua.
7. Ko e heigoa falu mena ka fakatutala e matakainaga leveki ki ai?
7 Mena ke Fakatutala: Ha kua kehekehe e tau tuaga he tau matakavi, ne nakai fakatoka he fekafekau fakamoli e lauga ma e tau feleveiaaga takitaha he gahua he fonua. Ko e puha “He Feleveiaaga ma e Gahua he Fonua, Liga Fakatutala a Koe” ne fakatoka mai falu puhala. To taute e feleveiaaga tuga e fakatutalaaga. He falu magaaho, to liga putoia e fakatātāaga tauteute mitaki po ke vitiō ne kua latatonu mai he jw.org. Ka tauteute e feleveiaaga ma e gahua he fonua, kua lata e matakainaga leveki ke manamanatu hagaao ke he mena ka fakamalolō mo e lagomatai a lautolu kua ō he fonua he aho ia.
Ka tauteute e feleveiaaga ma e gahua he fonua, kua lata e matakainaga leveki ke manamanatu ke he mena ke fakamalolō mo e lagomatai a lautolu kua ō he fonua he aho ia
8. Liga ko e heigoa e mena kua aoga lahi ke fakatutala he tau feleveiaaga ma e gahua he fonua he tau Aho Faiumu mo e tau Aho Tapu?
8 He tau Aho Faiumu, ma e fakatai, laulahi he tau tagata fakailoa ne foaki he Ko e Kolo Toko mo e Awake! Laulahi ne gahua he fonua he tau Aho Faiumu ne nakai ō he vahā tapu, ti liga uka a lautolu ke manatu e fakataitaiaga ne taute e lautolu he afiafi Tapuakiaga he Magafaoa. Ko e mena ia kua aoga ma e matakainaga leveki ke liu fakatutala taha he tau fakafeleveiaaga fakataitai mai i tua he Ha Tautolu a Fekafekauaga he Kautu. Putoia foki falu manatu he fakatutalaaga he lafi mai e tau tala tutupu he matakavi, tau mena tutupu, po ke aho okioki ke he fakataitaiaga he mekasini po ke puhala ke taute e fakavēaga ke lata mo e ahiahi kahau ka talia e tau mekasini. Ka fitā e falu he feleveiaaga ma e gahua he fonua he fakaaoga e tau mekasini pauaki ne foaki, maeke e matakainaga leveki ke tala age ki a lautolu ke talahau fakakū e tau manatu po ke talahau e tau mena atihake ne tutupu. He tau Aho Tapu, liga fifili he matakainaga leveki ke taute taha mena pihia hagaao ke he foaki he mahina. Ko e tau tohi fakaako, tuga e tau porosua Tala Mitaki mo e Fanogonogo ke he Atua mo e tohi Fakaako he Tohi Tapu ka foaki he ha aho, ti ko e matakainaga leveki ka taute fakakū e puhala he taha he tau tohi nei ka foaki.
9. Ko e heigoa ka fakatutala he matahiku vahā tapu ka taute e matagahua pauaki?
9 Ka taute he fakapotopotoaga e matagahua pauaki he matahiku vahā tapu, lata he matakainaga leveki ke fakatutala e puhala ke foaki e tau mekasini foou fakalataha mo e uiina po ke tuleke, po ke fakatutala a ia ke he mena ke taute ka kitia e fiafia. Ko e taha puhala foki ke talahau e tau mena tutupu ne fakamaama e uho he tau matagahua pihia.
10, 11. Ko e ha e tauteute he tau tagata fakailoa kua aoga ma e kautūaga he feleveiaaga ma e gahua he fonua?
10 Tauteute he Tau Tagata Fakailoa: Ko e tau tagata fakailoa kua fai vala foki he taute e gahua he fonua ke kautū. He tauteute tuai ma e gahua he fonua, liga he tapuakiaga he magafaoa, to fai mena a lautolu ke talahau ke he falu tagata fakailoa. Ko e tauteute mitaki kua putoia foki e moua e tau mekasini mo e tau tohi ato hau ke he feleveiaaga ma e gahua he fonua ke maeke oti ke ō he fonua ka e nakai mule teao.
11 Kua aoga foki ke fakatoka ke hoko atu fai minuti ato kamata e feleveiaaga ma e gahua he fonua. Mooli, eketaha a tautolu ke hohoko atu to kamata e tau feleveiaaga oti he fakapotopotoaga. Ka e fakatauhele pauaki ka hoko atu mule ke he feleveiaaga ma e gahua he fonua. Pihia fēfē? To tutala e matakainaga leveki ke he tau vala loga ato fakatokatoka e matakau. Ka tokogahoa ni e tagata fakailoa i ai, to fifili a ia ke fakafano e tau tagata oti ke he fonua ne fitā he fai vala kua taute. Ka ō hui e falu ke he feleveiaaga ma e gahua he fonua ti mamao e fonua, to liga tuku tokoua e ia e tau tagata fakailoa nei mo lautolu ne fai motokā. Kaeke ko e fonua he matakavi ne lahi e kolokolovao, liga kotofa e ia e tau matakainaga taane ke gahua ai po ke tata atu ke he tau matakau he tau matakainaga fifine. Liga kotofa e tau tagata fakailoa ne fai matulituli ke gahua he tau puhalatū lautatai po ke tau kaina ne nakai loga e sitepe. Liga kotofa e tau tagata fakailoa foou ke gahua mo lautolu ne kua lotomatala. Ka hohoko mule mai e tau tagata fakailoa, fa mahani ke liu fatiaki e tau fakaholoaga po ke liu taute ke lagomatai a lautolu ne o mai mule. Mooli, liga to fai kakano aoga a tautolu ati mule ai falu magaaho. Kaeke kua mule tumau a tautolu, kua lata ke hūhū hifo ki a tautolu kua pihia kia ha ko e nakai loto fakaaue ha tautolu ke he tau feleveiaaga ma e gahua he fonua po ke kua kaumahala a tautolu ke fakatokatoka tuai e tau matagahua.
12. Ka fa taute ni e koe e tau fakaholoaga haau, ko e heigoa ka manamanatu a koe ke taute?
12 Ko e tau tagata fakailoa ne feleveia ma e fonua ka fifili ke taute e tau fakaholoaga ni ha lautolu ato kamata e feleveiaaga, po ke kotofa a lautolu ke gahua mo e taha. Ka fa taute ni e koe e tau fakatokaaga haau, maeke nakai a koe ke “fakalahi” he gahua mo e tau tagata fakailoa kehekehe ka e nakai ni mo e tau kapitiga tata haau he tau magaaho takitaha? (2 Kori. 6:11-13) Maeke nakai a koe ke fakatoka he falu magaaho ke gahua mo e tagata fakailoa foou ke lagomatai a ia ke holo ki mua he puhala fakaako haana? (1 Kori. 10:24; 1 Timo. 4:13, 15) Fanogonogo fakamitaki ke he tau fakatonuaga kua tala atu ki a koe, putoia e takitakiaga he matakavi ka kamata a koe ke fakamatala. Ka fakaoti e feleveiaaga, kalo kehe he hiki e tau fakatokatokaaga ti fakamafiti ke o atu ke he fonua.
13. Ka mataala a lautolu oti ne putoia ai mo e taute e vala ha lautolu, to aoga fēfē a tautolu ke he tau feleveiaaga ma e gahua he fonua?
13 He oti e fakamatala, ne fakafano atu e Iesu e toko 70 ke he fekafekauaga, ti kua ‘liliu mai mo e fiafia.’ (Luka 10:17) Nakai fakauaua, ne feleveia a Iesu mo lautolu ato kamata e fakamatala ha lautolu ne kua lagomatai ai ke kautū. Mogonei, ko e tau feleveiaaga ma e gahua he fonua ka aoga pihia foki. Ka mataala a lautolu oti ne putoia ai mo e taute e vala ha lautolu, ko e tau feleveiaaga ma e gahua he fonua to fakamalolō, lagomatai, mo e fakatokatoka a tautolu ke taute e poakiaga ha tautolu “ke eke mo talahau ke he tau atu motu oti.”—Mata. 24:14.