Aoga Katoatoa Mai he Tau Feleveiaaga ma e Gahua he Fonua
1. Maeke fēfē e tau feleveiaaga ma e gahua he fonua ke lagomatai a tautolu?
1 Ko e tau feleveiaaga ne lauia mitaki kua foaki e fakamalolōaga mooli mo e tau fakaakoaga aoga ato o atu a tautolu ke he fonua. To fakamalolō ai a tautolu ke fakalataha ko e matakau ke he gahua fakamatala ke gahua auloa mo e falu ke lalago mo e fakamahani. (Fakatai 27:17; Fakama. 4:9, 10) Ko e heigoa ha tautolu ka taute ke aoga katoatoa mai he tau feleveiaaga pehenei?
2. Ko e heigoa falu mena ka liga fakatutala e tagata ne takitaki ki ai?
2 Ko e Tagata ne Takitaki: Ne nakai fai vala tala pauaki ne fa fakatoka tuai ke tutala ki ai he tau feleveiaaga nei. Ko e mena ia, kua lata ke tauteute fakamitaki tuai kaeke ko koe ka takitaki. Kia nakai fakatoka tumau ni ke taute he lauga he aho, ka e liga fifili e koe ke lafi ai ke he fakatutalaaga kaeke ke felauaki mo e gahua ke he fonua. Manamanatu ke he tau mena ka lagomatai a lautolu ka o atu ke fakamatala he aho ia. Ma e fakatai, liga manako a koe ke fakatutala po ke fakatātā e taha fakataitaiaga. Maeke ia koe ke fifili ke liu kikite ke he taha vala he tohi Reasoning, ko e Ministry School, po ke taha vala foou nei he Feleveiaaga Fekafekau. He falu magaaho, liga tutala a koe ke he puhala ke fehagai mo e paleko ka liga feleveia he fonua ha mutolu, po ke liga fakatutala ke he puhala ke feaki e fiafia mo e kamata e tau fakaakoaga Tohi Tapu, mua atu ka tokologa ka o atu ke taute e tau liu aahi atu. Ko e heigoa ni ka fakatutala ki ai, kia fakamakai mo e atihake.
3. Kua lata ke loa fēfē e feleveiaaga, mo e ko e heigoa kua lata ke taute he magaaho ia?
3 Kamata e feleveiaaga he magaaho kua kotofa, pete he iloa e koe kua fai ne nakaila hohoko mai ia. Kia manamanatu fakamitaki ka fakatokatoka e tau matakau, mo e tufa e tau matakavi ki a lautolu ne manako ki ai. Kua lata e feleveiaaga ke 10 ke he 15 ni e minuti po ke ku hifo kaeke taute ka hili e feleveiaaga he fakapotopotoaga. Ato oti e feleveiaaga, kua lata ia lautolu oti ke iloa e tau hoa ha lautolu mo e matakavi ka gahua a lautolu ki ai. Kua lata e feleveiaaga ke fakaoti aki e liogi.
4. Ko e heigoa ka lagomatai e tau tagata oti ke aoga katoatoa mai he tau feleveiaaga ma e gahua he fonua?
4 Maeke ia Koe ke Lagomatai: Ma e tau feleveiaaga he fakapotopotoaga, kua fakalilifu a tautolu ki a Iehova mo e manamanatu ke he falu he hohoko atu tuai. Kia fai vala he fakatutalaaga. Liga fakaatā e koe e tagata ne takitaki ke kotofa a koe ke gahua mo e taha, po ke liga fifili e koe ke taute tuai e tau fakatokaaga haau ato hoko e feleveiaaga. Ka manako a koe ke taute ni e koe e tau fakatokaaga haau, kia eketaha he ‘fakalahi atu’ ke gahua mo e tau tagata fakailoa kehekehe, ka e nakai gahua ni mo e tau kapitiga tata he tau magaaho oti. (2 Kori. 6:11-13) Ka oti e feleveiaaga, lali ke ua hiki e tau fakatokaaga, ti o atu fakamafiti ke he fonua.
5. Ko e heigoa e kakano he tau feleveiaaga ma e gahua he fonua?
5 Ko e kakano he feleveiaaga ma e gahua he fonua kua tatai ni mo e tau feleveiaaga he fakapotopotoaga. Ne fakatokatoka ai ke maeke ia tautolu ke “fakalagalaga ai e fakaalofa mo e tau gahua mitaki.” (Hepe. 10:24, 25) Ka eketaha a tautolu ke aoga mai he tau feleveiaaga nei, to lagomatai ai ke taute e fekafekauaga ha tautolu—ko e “gahua mitaki” mooli!