Lima e Puhala ke Moua e Fakaako Tohi Tapu
1. Ka uka ke moua e fakaako Tohi Tapu he fonua ha tautolu, ko e heigoa kua lata ke taute e tautolu, mo e ko e ha?
1 Kua uka kia ia koe ke moua taha ke fakaako tokoua e Tohi Tapu? Fakatumau ke lali. Fakamonuina e Iehova a lautolu kua nakai fakalolelole he taute haana a finagalo. (Kala. 6:9) Lima e puhala i lalo ke lagomatai a koe.
2. Fakaaoga fēfē e tautolu e puhala tala age fakahako ke kamata e fakaakoaga?
2 Tala Age Fakahako: Tokologa e tagata ne iloa na foaki e tautolu Ko e Kolo Toko mo e Awake!, ka e liga nakai iloa e lautolu na foaki e tautolu e tau fakaako Tohi Tapu. He ha he tala age fakahako ka gahua he taha fale ke he taha fale? Maeke foki a koe ke hūhū ke he tau tagata fiafia ne liu aahi atu a koe ki ai kua manako nakai a lautolu ke fakaako Tohi Tapu. Ka nakai manako a lautolu, maeke ia koe ke matutaki ke toka hifo e tau tohi mo e feaki e fiafia. Taha e matakainaga taane ne fā e tau he fina atu ke he hoa mau ko e vala haana he fakaholoaga mekasini. He toka hifo e ia e tau mekasini foou, ne fuluhi a ia ke fano ka e tupu hake e manatu haana ke hūhū: “Manako nakai a mua ke fakaako Tohi Tapu?” Ne ofo a ia he tali a laua ē. Kua papatiso a laua mogonei.
3. Lata nakai ia tautolu ke tali manatu ko lautolu ne fakalataha ke he feleveiaaga kua fitā e fakaako Tohi Tapu mo e falu? Fakamaama.
3 Lautolu ne Ō ke he Feleveiaaga: Nakai tali manatu ko lautolu ne fiafia kua kitia e koe he tau feleveiaaga he fakapotopotoaga kua fitā e fakaako Tohi Tapu. Taha e matakainaga taane ne talahau: “Molea e hafa he tau fakaako haaku ne kamata mai he tutala ki a lautolu ne o mai ke he tau feleveiaaga.” Taha e matakainaga fifine ne fifili ke tutala ke he fifine mahani mā ne papatiso e tau tama fifine haana i loto he fakapotopotoaga. Ne fakalataha mai e fifine ke he tau feleveiaaga kavi ke he 15 e tau ti hau tumau a ia ke he Fale he Kautu he mogo ni ti kamata e feleveiaaga mo e fano ka oti ai. Ne talia e fifine ke fakaako ti fakahiku ne hau a ia ke he kupu mooli. Ne tohi he matakainaga fifine: “Momoko lahi au he fakatali ke 15 e tau to ole ki a ia ko e manako nakai a ia ke fakaako!”
4. Maeke fēfē ia tautolu ke moua e fakaako he ole atu foki?
4 Ole Atu Foki: Taha e matakainaga fifine ne eketaha ke fakatauō mo e falu he tau fakaako Tohi Tapu ha lautolu. He fakaatā he faiaoga, he matahiku ne hūhū a ia ke he tagata fakaako kua fai tagata nakai a ia ne iloa kua liga fiafia ke fakaako foki. Ka foaki e tohi Fakaako he Tohi Tapu ke he tagata kua fa aahi atu a koe ki ai, liga hūhū a koe: “Fai tagata nakai a koe ne iloa ka fiafia ke moua taha lagaki?” He falu mogo, kua nakai fakaatā he tau tuaga e tau tagata fakailoa mo e tau paionia ke taute e fakaakoaga mo e taha ne feleveia mo lautolu he fonua. Kia fakailoa ke he falu ne manatu a koe kua liga maeke ke taute e fakaako Tohi Tapu.
5. Ko e ha kua hūhū a tautolu ke he tau hoa nakai tua he tau matakainaga he fakapotopotoaga ko e manako nakai a lautolu ke fakaako?
5 Tau Hoa Nakai Tua: Fai tagata fakailoa nakai he fakapotopotoaga ha tautolu ne mau mo e tagata nakai talitonu? Ko e falu tagata nakai talitonu ne nakai manako ke tutala Tohi Tapu mo e hoa Kerisiano ha lautolu ka e talia e uiina ke fakaako mo e taha tagata he fakapotopotoaga. Kua fa mitaki lahi ke fakakia fakamua ke he taane po ke hoana i loto he fakapotopotoaga ke maeke ke fifili e puhala kua mua he mitaki.
6. Aoga fēfē e liogi ka lali ke moua taha fakaako?
6 Liogi: Kia nakai fakateaga e malolō he liogi. (Iako. 5:16) Mavehe mai a Iehova ke fanogonogo ke he tau ole ha tautolu ka felauaki ai mo e finagalo haana. (1 Ioa. 5:14) Taha e matakainaga taane ne lavelave lahi e fakaholoaga ne kamata ke liogi ma e fakaako Tohi Tapu. Ne manamanatu e hoana haana to fai magaaho nakai a ia ke leveki e tagata fakaako, mua atu ka loga e lekua he tagata fakaako. Ti tala age e ia e tau tupetupe nei haana ki a Iehova he mogo ne liogi a ia ke moua he taane haana e taha fakaako. Kua tali e tau liogi ha laua kavi ke he ua e faahi tapu he mole ne moua he paionia he fakapotopotoaga e tagata taane ne manako ke fakaako ti age e fakaakoaga ia ke he matakainaga taane. Ne tohi he hoana: “Ke he ha matakainaga ne logona hifo ko e taute e fakaako Tohi Tapu kua lahi mahaki ke leveki, pehē au: Kia liogi fakatonu, ti ua oti e liogi hagaao ki ai. Kua lahi atu e fiafia ha maua ke he mena kua manamanatu a maua ki ai.” Mo e fakauka, to maeke foki ia koe ke moua e fakaako Tohi Tapu ti logona hifo e fiafia he lagomatai taha tagata ke he “hala ke pu atu ke he moui.”—Mata. 7:13, 14.