Ole Nakai a Koe ke Lafi Mai Foki e Falu?

Kaeke hane takitaki e koe e fakaakoaga Tohi Tapu, fēfē he hūhū ke he tagata fakaako ko e fai kapitiga, magafaoa, po ke fai tagata iloa nakai a ia kua manako ke ako e tau mena ne fakaako he Tohi Tapu? Fa mahani ke loga e higoa ka tala atu. Mo e fakaatāaga he tagata fakaako, maeke ia koe ke totoku haana higoa ka aahi atu a koe ki a lautolu ke foaki e fakaakoaga Tohi Tapu. Liga pehē a koe, “Kua fiafia a [Higoa he tagata fakaako] he fakaako e Tohi Tapu, ti manatu a ia liga manako foki a koe ke aoga mai he polokalama fakaako Tohi Tapu nakai totogi ha mautolu.” Ti fakatātā fakakū e puhala ka fakaako ai, he fakaaoga e tohi Fakaako he Tohi Tapu.

Kaeke kua holo mitaki ki mua e tagata fakaako haau, liga fakamafana ki a ia ke fakamaama e fakaholoaga he fakaakoaga ke he tau kapitiga mo e tau tagata he magafaoa kua liga fiafia. Maeke ia ia ke uiina a lautolu ke nonofo he fakaakoaga haana. Po ke ka nakai hagahaga mitaki e puhala ia, maeke ia ia ke pulega mo koe ke feleveia mo lautolu ke fakatātā e fakaholoaga he fakaakoaga. He taute pehenei ka fakamafana e tagata fakaako ke kamata folafola e iloilo faka-Tohi Tapu haana mo e falu.

Ko lautolu ne aahi tumau a koe ki ai ka liga atu ki a koe e falu higoa foki, pete he nakai la talia e lautolu e fakaakoaga Tohi Tapu tumau. Ka foaki e koe ki a lautolu e lagaki he tohi Fakaako he Tohi Tapu, maeke ia koe ke hūhū, “Iloa nakai e koe taha tagata ka fiafia ke moua e lagaki he tohi nei?”

Ha ko e mafiti lahi he tau magaaho, kua manako a tautolu ke fakaaoga e tau puhala oti kua fahia ki ai ke lagomatai e tau tagata ke logona mo e talia e tala mitaki. Ole nakai a koe ke lafi mai foki e falu?