Tamai he Fakamatala Fakamatakau e Olioli
1 He magaaho ne fakafano atu e tau tutaki toko 70 ke fakamatala, ne fakaako e Iesu a lautolu ke he mena ke talahau, ne fakatokatoka a lautolu ke he tau hoa takitokoua, mo e fakakite e fonua ke gahua e lautolu. Kua lafi e mena nei ke he olioli ne moua e lautolu. (Luka 10:1-17) Pihia foki he vaha nei, kua lagomatai he fakamatala fakamatakau ke mautauteute, fakatokatoka, mo e fakamalolo e tau tagata he Atua ma e gahua fakamatala.
2 Taki he Tau Motua: Lahi e matagahua he tau motua ke lagomatai e tau tagata oti ke fakalataha tumau ke he gahua fakamatala. Ko e leveki fekafekau ka taki e tauteaga he tau fakatokaaga ma e gahua he fahitapu. Kua lago ke he tau leveki fakaakoaga tohi takitaha ke fakatokatoka e matagahua ma e matakau hana, mua atu ke he tau matahiku fahitapu. He tau magaaho ka feleveia e fakapotopotoaga katoa ma e gahua he fonua, tuga ka oti e Fakaakoaga Kolo Toko, igatia e leveki fakaakoaga tohi mo e fakatokatoka e tau mena kua lata mo e matakau ni hana.
3 “Fulufuluola mo e Taute Fakamitaki”: Ko ia kua kotofa ke taute e feleveiaaga ma e gahua he fonua kua lata ke kamata he magaaho tonu mo e fakakaupa e feleveiaaga ke he 10 po ke 15 e minuti. Kua mitaki lahi ke fakatoka e ia e tau matakau fakamatala mo e kotofa age e fonua (ato kehe ai ka fakatokatoka ni he leveki fakaakoaga tohi e mena nei, tuga ne talahau fakamua) ato fakaoti aki e liogi. Kua fakatote he mena nei e lata ma e tau tagata fakailoa ke fakapotopoto he matakavi ka gahua ki ai, nukua maeke ke utakehe e lilifu he gahua ha tautolu. Kua lagotatai foki mo e tomatomaaga ha Paulo: “Kia eke e tau mena oti mo e fulufuluola mo e taute fakamitaki.” (1 Kori. 14:40) Ko lautolu ka o atu ke he tau feleveiaaga nei kua lata ke lafi ke he kautuaga he fakatokaaga he hohoko mai tuai, kaufakalataha katoatoa mo ia ne taki, ti o fakamafiti ke he fonua ka oti e fakalatahaaga.
4 Fakapotopoto Auloa he Fakalataha: Ko e tau fakatokaaga fakamatala fakamatakau kua foaki e magaaho mitaki lahi atu ma tautolu ke feiloaaki he fakapotopotoaga. He nakai fai totokoaga he fakatoka tuai ke gahua mo e taha tagata, kua taui mitaki foki ma tautolu ke o atu ke he tau feleveiaaga ma e gahua he fonua he nakai taute tuai e tau fakatokaaga. Kua liga kotofa a tautolu ke gahua mo e tagata kua nakai iloa mitaki e tautolu, ti fakamalolo a tautolu “kia fakalahi” ke he ha tautolu a fakaalofa.—2 Kori. 6:11-13.
5 Kua fakamalolo he fakamatala fakamatakau a tautolu mo e fakapotopoto auloa fakalataha a tautolu ko e “tau lagomatai ke he kupu moli.” (3 Ioane 8) Kia fakalataha katoatoa a tautolu i ai!