Kia Lauia Mitaki e Fekafekauaga Hau

¹ Kua pouligia e lagi, ti tupu lahi e go matakutakuina. Ti hifo mai e aolu tuga e ahua. Ko e heigoa? Ko e kautau he tau he akerisi totou miliona hane o mai ke fakaotioti e moumouaga he fonua! Ko e talahauaga nei kua fakamaama mai he perofeta ko Ioelu kua fai fakamoliaga he vaha nei ke he gahua fakamatala he tau fekafekau fakauku he Atua mo e tau hoa ha lautolu, ko e moto tagata tokologa.

² Kua fakakite mai he Ko e Kolo Toko ia Me 1, 1998, lau 19, paratafa 19: “Ko e tau kautau he akerise he Atua he vaha nei kua fakamatala katoatoa ai ke he ‘maga’ ha Kerisitenitome. (Ioelu 2:9) . . . Kua toli agaia a lautolu he tau fakalavelave oti, he huhu atu ke he tau kaina miliona, feleveia mo e tau tagata he puhala tu, tutala ki a lautolu he telefoni, mo e matutaki mo lautolu ke he ha puhala ni fa e fakapuloa e lautolu e fekau a Iehova.” Nakai kia ko e fakamonuinaaga mua ue atu a ia ke fakalataha ke he gahua nei ne kotofa he Atua?

³ Nakai tuga e tau he akerisi, ko e foliaga ni ke fagai a lautolu, ko tautolu ko e tau fekafekau a Iehova kua lahi e manamanatuaga ma e tau momoui ha lautolu kua fakamatala a tautolu ki ai. Manako a tautolu ke lagomatai e falu ke ako e tau kupu moli tokoluga ue atu he Kupu he Atua mo e ke taute e tau lakaaga ka takitaki atu a lautolu ke he moui tukulagi. (Ioane 17:3; 1 Timo. 4:16) Ti, kua manako a tautolu ke lauia mitaki e puhala kua taute e tautolu e fekafekauaga ha tautolu. Ko e ha puhala fakamatala ni kua fakaaoga e tautolu, kua lata ia tautolu ke manamanatu ki ai kua taute e tautolu he puhala mo e he magaaho ia to moua mai ai e tau fua mitaki lahi. Ha ko e “mena mole atu e mahani he lalolagi nai,” kua lata ia tautolu ke fokifoki fakamitaki e tau puhala mo e fakafeleveiaaga ha tautolu ke iloa moli kua hokotia a tautolu ke he palekoaga he moua mai e tau fua mitaki.​—1 Kori. 7:31.

⁴ Ha kua makai a tautolu ke feleveia mo e tau tagata ke he tau puhala kehekehe, ko e matapatu agaia ni e gahua he taha fale ke he taha fale he fekafekauaga ha tautolu. Fa moua kia e koe kua nakai fa fai tagata he kaina po ke momohe agaia ka ahi atu a koe? Kua fakaita ha, he nakai maeke ia koe ke tutala e fekau he tala mitaki ki a lautolu! Kautu fefe a koe he paleko nei?

⁵ Kia Hikihiki mo e Manamanatu Mitaki: I Isaraela he senetenari fakamua, ne fa futi ika e tau tagata takafaga he po. Ko e ha he po? Pete ni nakai ko e magaaho mitaki anei ma lautolu, ko e magaaho mitaki lahi a nei ke loga e tau ika ka futi. Ko e magaaho olatia anei. He talahau ke he gahua nei, ne talahau he Ko e Kolo Toko ia Iulai 1, 1992: “Kua lata foki ia tautolu ke iloa e tau matakavi ha tautolu ke maeke ia tautolu ke o ke takafaga ika ai, ke tuga a ia, ko e magaaho ne tokologa e tau tagata ka nonofo he tau kaina mo e loto fiafia.” Ko e kumikumiaga fakamitaki he tau aga ne kitia ke he loga he maaga mo e tau matakavi nonofo tagata, kua liga nonofo e tau tagata he tau kaina ka ahi atu tuai a tautolu he Aho Faiumu mo e tau pogipogi Tapu, ka e nakai fiafia ke he tau ahi ha tautolu he magaaho ia. Ka pihia e matakavi hau, maeke nakai ia koe ke hiki e magaaho he ahi atu hau he magaaho pogipogi ke he magaaho afiafi? Ko e puhala mitaki anei ke fakalaulahi e lauiaaga mitaki he fekafekauaga ha tautolu ti fakakite foki e manamanatuaga ha tautolu ke he tau katofia, ko e fakamoliaga haia he fakaalofa Kerisiano moli.​—Mata. 7:12.

⁶ Ia Filipi 4:5, kua hataki mai he aposetolo ko Paulo ki a tautolu kua lata ia tautolu ke ‘iloa ha tautolu a mahani totonu ke he tau tagata oti kana.’ He tatai mo e takitakiaga omoomoi he agaga nei, manako a tautolu ke lagotatai mo e manamanatu mitaki ke he tau puhala ha tautolu he taute e kotofaaga fakamatala ha tautolu mo e fakamakai mo e fakamalolo. Nakai manako a tautolu ke ‘toka nakai fakaako atu ki mua he tau tagata katoa mo e taha fale mo e taha fale,’ ka e manako a tautolu ke iloa oti kua taute e tautolu e fekafekauaga ha tautolu he taha fale mo e taha fale ke he tau magaaho kua talia mo e fua loga. (Gahua 20:20) Tuga e tau tagata takafaga ika ha Isaraela he senetenari fakamua, kua kapeletu lahi a tautolu mo e ‘futi ika’ ke he tau magaaho ka fua loga a tautolu, nakai ke he tau magaaho ka hagahaga mitaki ai a tautolu.

⁷ Ko e heigoa e tau hikihikiaga ka taute? Fa laulahi, ke feleveia he hola 9:00 po ke 9:30 a.m. he Aho Faiumu mo e Aho Tapu, mole mogoia ti kamata e matakau ke he gahua he gutuhala ke he taha gutuhala he matakavi. Kua fakatokatoka he tau kau he tau motua e matakau ke fakalataha ke he falu puhala foki he fekafekauaga, tuga e fakamatala ke he puhala tu, matakavi pisinisi, po ke tau liu ahi atu, ato o atu ke he tau gutuhala he tau matakavi nonofo tagata. Kua fakatoka he falu fakapotopotoaga e tau magaaho ma e fekafekauaga he fonua fakalata atu ke he magaaho pogipogi​—10:00 a.m., 11:00 a.m., po ke tupou la 12:00. Ka mole mogoia, kua o atu fakahako e matakau ke he gahua he taha gutuhala ke he taha gutuhala mo e fakaaoga katoa ai e magaaho ia ke hoko ke he magaaho afiafi. He falu matakavi, ko e magaaho afiafi, nakai ko e magaaho pogipogi, kua mitaki lahi ke feleveia ma e fekafekauaga he fonua. Ko e tau hikihikiaga pihia kua lafi ki ai e fua loga ke he gahua he taha gutuhala ke he taha gutuhala.

⁸ Kia Manamanatu mo e Fakalotomatala: He feleveia a tautolu mo e tau tagata he tau gutuhala, kua moua e tautolu e tau tutuaga kehekehe ke he fekau ha tautolu. Falu he tau tagata he kaina kua talia, ka e falu kua totoko, gahoa kua taufetoko po ke ulu mao. Ha mena ni kua tupu, he lau 7 he Reasoning From the Scriptures, kua fakamanatu mai ki a tautolu ke nakai kumi ni e tautolu ke “‘mua he taufetoko’ mo e tau tagata kua fakakite e nakai fakalilifu ma e kupu moli.” Ka ita lahi e tagata he kaina, ti mitaki ke toka a lautolu. Nakai lata ia tautolu ke totoko e tau tagata he fakakaka kia lautolu ke tutala mo tautolu po ke talia e manatu ha tautolu. Nakai peehi e tautolu e fekau ha tautolu ke he tau tagata. Nakai mitaki a ia mo e kua fakatu ai e tau mena vihi ma e falu he Tau Fakamoli mo e ke he gahua ha tautolu.

⁹ Ato kamata ke gahua e matakavi, kua pulotu ke fakakia e laupepa he matakavi ia ma e tau kaina he tau tagata ne kua ui ke nakai ahi atu. Ka fai kaina pihia, kua lata ke tala age ke he tau tagata fakailoa oti kua gahua he matakavi ia ke aua neke ahi atu ki ai. Kia nakai lata he ha tagata ke fifili ni e ia ke ahi atu ke he tau kaina nei mo e nakai fai fakaataaga mai he leveki fekafekau.​—Kikite e Our Kingdom Ministry Ianuari 1994, Puha Huhu.

¹⁰ Kua fakatolomaki ki mua e lauiaaga mitaki ha tautolu he mailoga ai he gahua a tautolu he taha fale mo e taha fale. Kia matakite he fina atu a koe ke he kaina. Kua papa oti kia e tau ufiufi fakamaama? Nakai kia fai lealea ha gahua? Kua fakakite he mena nei kua momohe e tau tagata he fale. Liga, to moua e tautolu e fakatutalaaga fua mitaki ka toka ke liu atu fakamui ke he tagata he fale. Liga mitaki ke fai magaaho to liu atu a koe ke he fale nei ka e tohi hifo e numera he fale. Kia liu a koe ke fakakia e fale to toka e koe e matakavi po ke tohi hifo ke liu ahi atu he tau tula a mui.

¹¹ Tutupu mai agaia e tau tutuaga ha kua fagumohe e tautolu taha po ke fakalavelave a ia. To kitia foki kua fakahogohogo atu mo e fakaita atu ki a ia. Fefe e tali atu ha tautolu? Fakatonu mai he Tau Fakatai 17:27: “Ko ia kua totonu foki, ko e tagata pulotu a ia.” He nakai fakamolemole a tautolu ke he fekafekauaga ha tautolu, kua maeke ia tautolu ke fakakite e fakamolemole ka ahi atu a tautolu he magaaho nakai lata. Kia huhu a tautolu to hagahaga mitaki nakai ke he taha magaaho foki ti fakatoka e liu ahi atu. Ko e fakakiteaga fakamoli he manamanatu fakatagata ke he leo totonu kua fa fakatotoka e tagata ia. (Fakatai 15:1) Ka tala mai e tagata he kaina ki a tautolu kua fa gahua po tumau a ia, kia tohi hifo he laupepa he matakavi ke lata mo e tau ahi atu i mua kua lata ke taute he tau magaaho kua lata.

¹² Ko e loto manamanatu kua latatonu foki he fakamakai a tautolu ke gahua fakamitaki e matakavi ha tautolu. Ha kua tokologa e tau tagata kua nakai nonofo i kaina he ahi atu fakamua ha tautolu, kua lata ia tautolu ke fakalahi e laliaga ke feleveia mo lautolu ke talahau e fekau he fakamouiaga ki a lautolu. (Roma 10:13) Kua fakakite mai he tau hokotakiaga kua ahi atu e tau tagata fakailoa he falu magaaho ke he kaina taha ia he tau magaaho kehekehe he aho ke lali ke moua e tau tagata he kaina. Nakai hola kehe e onoonoaga nei ke he tau katofia. Kua liga talahau kelea ai e Tau Fakamoli a Iehova kua ‘gahua tumau’ he puhala tu ha lautolu. Kalo kehe mai fefe he mena nei?

¹³ Fakalotolotomatala. Ka liu ahi atu ke he tau kaina ne nakai fai tagata, fai fakakiteaga kia kua fai tagata i kaina mogonei? Ka eaea mai e tau tohi he puha meli, liga nakai la fai tagata agaia i kaina mo e kua nakai mitaki ke fina atu ke he gutuhala he magaaho nei. Ka nakai feleveia mo e tagata he tau liu ahi atu he aho, mo e ke he magaaho afiafi, kua liga lata ke hea telefoni atu ke he tagata he kaina. Ka nakai, ti toka hifo fakagalo e tuleke po ke laupepa fakailoa he gutuhala, mua atu kaeke ko e matakavi fa gahua tumau. Liga to feleveia mo e tagata he taha magaaho ka gahua e matakavi ia.

¹⁴ Kua lata ia tautolu ke nakai tutala loa ke he tagata he gutuhala ka nakai hagahaga mitaki e matagi. Ka uiina ki fale, kia fakaeneene ke ua uta e pelapela ki fale. Kia fakailoilo ke he kuli ka ko. Ka gahua he tau fale nonofo, ki a fakaeneene mo e ua fakahoha he fakalavelave e falu tagata he fakapuloa e fina atu hau.

¹⁵ Kia Maopoopo mo e Lilifu: Ko e fakatokatokaaga mitaki kua fakamamao a tautolu mai he agaagai tokologa ke he matakavi. Kua fa fakamatakutaku e falu tagata ka loga e motoka mo e tau vene ka tutu he fahi mua he tau fale ha lautolu mo e tau tagata fakailoa tokologa. Kia nakai fakakite e tautolu kua “pule katoa” a tautolu ke he tau matakavi nonofo nei. Ko e fakatokatokaaga ke gahua e matakavi kua mitaki lahi ke taute he feleveia ma e fekafekauaga he fonua. Ko e matakau tote he tau tagata fakailoa, tuga e magafaoa, kua mua atu e matakutaku ke he tau tagata he kaina mo e kua lata ke liu fakatokatoka he oti e gahua he matakavi.

¹⁶ Ko e maopoopoaga kua lata he tau matua ke leveki e tau mahani he tau fanau ha lautolu he gahua ai ke he matakavi. Kua lata e tau fanau ke mahani mitaki ka hoa he tau fuata ke he gutuhala. Kua nakai lata e tau fanau ikiiki ke fefeua po ke o fano noa, he fakalavelave ke he tau tagata he tau kaina po ke tau tagata o fano.

¹⁷ Mitaki ke lagotatai foki e tau magaaho okioki inu kofe. Ne talahau he Our Kingdom Ministry, Iuni 1995, lau 5: “Ka o a tautolu he fekafekau he fonua, fa moumou e tautolu e tau magaaho aoga ha ko e okioki ke inu kofe. Ka hagahaga kelea lahi e matagi, ko e okioki fakaku to fakahahau a tautolu mo e lagomatai a tautolu ke fakatumau e gahua. Tokologa, kua fa gahua loa he fakamatala ke he tau tagata mo e tiaki e fakafiafiaaga mo e tau matakainaga he tau magaaho okioki inu kofe ne kua toka ma e fekafekauaga.” Pete ni kua fakamaoki ma e tau fakahauhauaga ko e fifiliaga fakatagata, kua mailoga ai falu magaaho, ko e tau matakainaga tokologa kua feleveia he fale inu kofe po ke fale kai. Mai he lahi e magaaho ne toka ke leo ke he tau mena kai, ko e tokologa he tau tagata kua fakalavelave ke he tau tagata fakatau. Falu magaaho, ko e tau mena kua tupu he fekafekauaga he fonua he magaaho pogipogi ne fakatutala fakaleo lahi ai, ti hola kehe mai e mena nei he lilifu he fekafekauaga mo e fakataumaleku e lauiaaga he fekafekauaga ha tautolu. Mo e fakalotomatala, kua lata e tau tagata fakailoa ke nakai fuhifuhi mo e nakai moumou e magaaho mai he fekafekauaga.

¹⁸ Tokologa kua moua e tau fua mitaki he o atu ke he tau tagata ke he mena fe ni kua moua e lautolu​—ke he tau puhala tu, ke he tau paaka motoka, mo e tau matakavi o tagata. Pihia foki, manako a tautolu ke taute e fakamatalaaga mitaki, nakai ni ke he tau kupu ha tautolu ka e pihia foki mo e ha tautolu a mahani mitaki. Ko e tau tagata fakailoa he tau fakapotopotoaga takitaha kua lata ke mailoga ke fakalilifu e tau katofia he matakavi ha lautolu ke nakai lofia atu ke he tau hala o hui he tau matakavi gahua po ke tau fale he tau pisinisi, tuga e tau utuaga penisini, ne kua hafagi 24 e tula. Ke mailoga e tautolu ke taute fakamitaki e fekafekauaga ha tautolu ke he puhala maopoopo mo e aga lilifu, to gahua ni a tautolu ki loto he kotofaaga ha tautolu ke he matakavi ni ha tautolu ato fai fakatokatokaaga pauaki kua taute he puhala mai he Komiti Fekafekau he Fakapotopotoaga he taha fakapotopotoaga, ke foaki ki a lautolu falu lagomataiaga.​—Fakatatai 2 Korinito 10:13-15.

¹⁹ Falu he tau fakapotopotoaga ne loga e tau matakavi ke fakamatala ai kua lata ke fakatokatoka e tau fahi nei ke he tau matakavi. Kua foaki ai e laupepa he matakavi ke he tagata fakailoa po ke matakau. Kua fakalaulahi atu he mena nei e oti katoa mo e leveki foki e gahua he tau tagata fakailoa he matakavi taha he magaaho taha, ke lagotatai mo e matapatu fakaakoaga ia 1 Korinito 14:40: “Kia eke e tau mena oti mo e fulufuluola mo e taute fakamitaki.”

²⁰ Kua lata tumau e tauteuteaga he tino ke lilifu mo e eke mo hukui he tau fekafekau kua fua e higoa a Iehova. Ti pihia foki e tau kanavaakau kua fakaaoga e tautolu. Kua fakalavelave he tau kato gahua fakamatala mahehe mo e tuai po ke tau Tohi Tapu kiva e fekau he Kautu. Kua talahau ai ko e tauteuteaga “ko e puhala mukamuka kua foaki ke he tau tagata he takatakai e vala tala hagaao ko hai mo e ko e heigoa a koe mo e lautonu a koe mo e fakatokaaga fe.” Ti, ko e tauteuteaga ha tautolu kua nakai lata ke fulufagu po ke nakai maopoopo, po ke mitaki lahi po ke molea atu, ka kua lata tumau ke ‘lata mo e vagahau mitaki.’​—Filipi 1:27; fakatatai 1 Timoteo 2:9, 10.

²¹ Ia 1 Korinito 9:26, kua tohi he aposetolo ko Paulo: “Kua poi pihia au, nakai fakahaupo; kua tau pihia au, nakai tuga e taumoto ke he matagi.” He fifitaki a Paulo, kua fifili a tautolu ke lauia mitaki ti fua loga e fekafekauaga ha tautolu. He fakalataha fakamakai a tautolu ke he gahua fakamatala ko e vala he “kautau he akerisi” ha Iehova he vaha nei, kia fakaaoga e tautolu e fakalotomatala mo e manamanatuaga Kerisiano he uta e fekau he fakamouiaga ki a lautolu oti he matakavi ha tautolu.