Taute e Magaaho Hau ke Aoga
1 Tatai oti ni e tau magaaho he tau tagata ne fakaaoga he tau fahitapu takitaha. Ko e vala kua foaki e tautolu ke fakapuloa e tala mitaki kua mahomo atu e uho ha ko e magaaho foaki ke he gahua fakahao moui. (Roma 1:16) Fakakite e tautolu e fakaaueaga ma e mena nei he tauteute fakamitaki ma e fekafekauaga pulega, o atu tuai ke he tau feleveiaaga ma e fekafekauaga, ti fakamafiti atu ke he matakavi. Mitaki a tautolu ke fakamatala ka e nakai fakatutuna noa. Ha kua fakaako e Iehova a tautolu “ko e mena mo e hana ni a tau ke he tau mena oti,” kua manako a tautolu ke aoga moli e magaaho kua tuku kehe e tautolu ma e fekafekauaga ha tautolu.—Fakama. 3:1.
2 Fakaaoga Fakapulotu e Magaaho Hau: Loga e tau monuina ka moua e tautolu he mauokafua a tautolu ke he setulu kua fakaata ma e fakalataha tumau ke he fekafekauaga he fonua. Pauaki ai, ko e tau fua mitaki ka moua e tautolu kua lata ke fakatokatoka ke he katoa he magaaho ne fakaaoga ke he fekafekauaga. Mo e falu hikihikiaga tote ke he fakaholoaga ha tautolu, maeke nakai ke foaki fakalahi e tautolu e magaaho ke he fekafekauaga he fonua? Ma e fakatai, ka oti e gahua mekasini he Aho Faiumu, foaki nakai e tautolu falu magaaho ke taute e falu liu ahi atu? Ka levaleva e gahua ha tautolu ke he fekafekauaga he fonua he Aho Tapu, maeke nakai ke fakaaoga e tautolu falu magaaho foki ke taute e tau liu ahi atu po ke taute e fakaakoaga Tohi Tapu? Maeke nakai ke lalafi e fakamatala he puhalatu ke he ha tautolu a gahua he taha fale ke he taha fale? He ha puhala ni, kua liga fakatolomaki e tautolu e fekafekauaga ha tautolu.
3 Kaeke ko tautolu he fekafekauaga, maeke ke galo e kakano uho he magaaho ha tautolu ka nakai fakaeneene a tautolu. Moli, ka kelea lahi mahaki e tuaga he matagi, to fakahauhau he okioki fakaku a tautolu mo e lagomatai a tautolu ke gahua loa. Kia lagotatai, ha ko e tau okioki ia kua nakai fa lata tumau.
4 He tau tau e kua mole ne tolomaki ki mua e uka ke moua e tau tagata he tau kaina. Ke fahia mai he tuaga nei, tokologa e tau tagata fakailoa ne taute e fakamatala ke he taha gutuhala ke he taha gutuhala he tau magaaho kehekehe he aho. He ha he lali ke fakamatala he pale la afiafi po ke fakaafiafi?
5 Mitaki ka nakai fakafetu a tautolu ka fakamatala he puhalatu. Ka e, tutu fakaveha ti fakafeleveia e tau tagata ke kamata e tau fakatutalaaga mo lautolu. To lauia mitaki lahi mogoia e magaaho mo e moua e olioli lahi mahaki mai he gahua.
6 Kumi Magaaho ke Fakamatala: Ka pehe e tagata he kaina nakai manako a ia, ne huhu e Fakamoli ko e fai tagata foki nakai he kaina ke liga tutala a ia ki ai. Ne takitaki he mena nei e fakatutalaaga mo e tagata tane he kaina, ne kua leva lahi mahaki e gagao mo e takoto mau ni ke he mohega. Ne fakafou he amaamanakiaga ne fakatoka mai he Kupu he Atua hana fiafia he moui. Ne nakai leva ti matike a ia mo e fina atu ke he tau feleveiaaga he Fale he Kautu, mo e talahau e amaamanakiaga fou hana ke he falu!
7 Ko e matakainaga fifine fuata mui ne fakagahua e talahauaga ke taute e fekafekauaga he fonua ke he tula ato hoko e Fakaakoaga Tohi he Fakapotopotoaga. He gutuhala fakamua hana, ne feleveia a ia mo e tama fifine 13 e tau he moui ne fanogonogo fakamitaki mo e uta e tohi. He aho hake he aoga, ne kitia he matakainaga fifine fuata e tama fifine nei. Nakai leva he mole atu, ne foaki e ia e fakaakoaga Tohi Tapu ki a ia, ti talia he tama fifine.
8 Taute ke Fai Kakano e Magaaho: He fakalataha tumau ke he fekafekauaga he fonua kua lagomatai a tautolu ke feaki e tau puhala ha tautolu ke foaki e tala mitaki. Maeke nakai ia koe ke fakalaulahi e lotomatala hau ke kamata e fakatutalaaga he gutuhala he fakaaoga e tau feleveiaaga kua lautonu? Eke nakai a koe mo faiaoga pulotu lahi ka taute e fakaakoaga Tohi Tapu he kaina? He taute pihia, to aoga moli e magaaho hau he fekafekauaga mo e to fua loga atu foki e fekafekauaga hau.—1 Timo. 4:16.
9 Ha “kua gahoa e tau aho kua toe,” kua lata e tau momoui ha tautolu ke puke he tau gahua Kerisiano. (1 Kori. 7:29) Ko e fakatoka e magaaho ma e gahua fakamatala kua lata ko e mena mua ha tautolu. Kia moua e tautolu e fakalatahaaga malolo mo e fakamakai ke he fekafekauaga. Ko e mena homo ue atu e magaaho ne tuku mai e Iehova ki a tautolu. Kia fakaaoga pulotu ai mo e taute ai ke fai aoga.
[Puha he lau 4]
Fakagahua e Tau Lagomataiaga Nei:
◼ O atu tuai ke he tau feleveiaaga ma e fekafekauaga.
◼ Kakano lahi ke fakatote tumau e tau matakau fakamatala.
◼ Ua mule he o atu ke he matakavi.
◼ Gahua e matakavi ka tokologa e tau tagata i kaina.
◼ Gahua tokotaha he falu magaaho ka haohao mitaki ke gahua.
◼ Taute e tau liu ahi atu ka tata lahi ke he matakavi gahua he taha gutuhala ke he taha gutuhala.
◼ Tumau ke lavelave ke he gahua ka mule e falu he matakau he gutuhala.
◼ Ka maeke, falanaki ni ke he tau tutuaga, kia gahua loa.