Fakaaoga Fakamitaki e Magaaho Haau he Gahua he Fonua
Ko e Tau Fakamoli a Iehova ne fakaaoga 1,945,487,604 e tulā he gahua ke he fonua he tau he fekafekauaga 2014—ko e fakamooliaga kua eketaha a tautolu ke fagahuatia tumau ke he gahua ha Iehova! (Sala. 110:3; 1 Kori. 15:58) Ha “kua gahoa e tau [maga]aho kua toe,” kua aoga kia ke fakaaoga e tau tulā uho lahi ha tautolu he gahua ke he fonua ke matutaki mo e tau tagata tokologa?—1 Kori. 7:29.
Ko e fakaaoga fakamitaki he tau magaaho ha tautolu ke he gahua he fonua kua lata ke mukamuka ke hikihiki. Tuga anei, ka taha po ke molea e tulā he fakaaoga tumau e koe e vala pauaki he gahua he fonua ka e nakai tutala ke he ha tagata, maeke nakai a koe ke taute e tau hikiaga ke moua mo e tutala ke he tau tagata tokologa foki? Kehekehe e tau tutūaga he tau matakavi. Ka e lagomatai he tau puhala ne mui mai a koe ke fakaaoga fakamitaki e magaaho haau ke kalo kehe he “taumoto ke he matagi.”—1 Kori. 9:26.
Fakamatala he Taha Fale ke he Taha Fale: Loga e tau hogofulu tau ne aga mau e tau tagata fakailoa ke kamata e aho ha lautolu he fonua ke fakamatala he taha fale ke he taha fale. Ka kua tokologa e tau tagata ne gahua tupe he aho, he ha he fakamatala he taha fale ke he taha fale he mogo afiafi po ke afiafi to pouli, ka tokologa e tagata i kaina ti kua okioki foki? He aho, ko e fakamatala he puhalatū po ke he tau pisinisi ne liga fua mitaki.
Fakamatala ke he Toloaga Tagata: Ko e tau laulau mo e tau tokaaga fakatātā utafano kua lata ke fakatū he tau matakavi ō hui he tau tagata ne katofia e fonua he fakapotopotoaga. (Kikite Ha Tautolu a Fekafekauaga he Kautu ia Iulai 2013, lau 5.) Ka nakai tokologa ne ō hui he matakavi kua kotofa ma e fakamatala ke he toloaga tagata, liga fifili e Komiti Fekafekau he Fakapotopotoaga ke liu fakatū e tokaaga fakatātā utafano po ke laulau he matakavi ne tokologa e tagata ne ō hui.
Tau Liu Aahi Atu mo e Tau Fakaako Tohi Tapu: Maeke nakai ke fakatoka ma e tau liu aahi atu mo e tau fakaako Tohi Tapu haau ke lata mo e tau magaaho ka nakai gahuahua lahi e falu puhala he fonua? Tuga anei, ka gahuahua mitaki lahi e gahua he taha fale ke he taha fale he tau pogipogi Faiumu, maeke nakai a koe ke taute e fakaako Tohi Tapu haau he pale laā afiafi po ke mogo afiafi? Ka liu aahi atu, maeke nakai e tau tagata fakailoa ke vevehe ke he tau matakau ikiiki ke maeke ke lahi e mena ka taute he gahua he fonua?
Mooli kua maeke ia tautolu ke totou e tulā ha tautolu he ha matakavi kua gahua fakamatala, kua tupu ki mua e fiafia ha tautolu ka gahuahua mitaki ai. Ka mailoga e koe kua nakai lauia mitaki lahi e taha puhala he gahua he fonua he mogo tonu ia, fakaaoga e taha puhala foki. Liogi ki a Iehova, ko e “Iki hana e tau saito ke helehele,” ma e takitakiaga haana ke maeke a koe ke fakaaoga fakamitaki e magaaho haau he gahua he fonua!—Mata. 9:38.