Fakamatala he Taha Fale ke he Taha Fale
1. Ko e heigoa e huhū ne tupu mai hagaao ke he fekafekauaga he taha fale ke he taha fale, mo e ko e ha?
1 “Ko lautolu ne iloa mitaki e tau puhala kehekehe he fakapuloa e Kupu Mooli to talia ko e fakamatala he taha fale ke he taha fale he fakaaoga e MILLENNIAL DAWN, he magahala nei, ko e puhala kua mua atu e lauia mitaki ke fakamatala e Kupu Mooli.” Ko e talahauaga ia mai he fufuta he Iulai 1, 1893, he Zion’s Watch Tower ne fakamaama e kakano he fekafekauaga he taha fale ke he taha fale. Kua iloa he tau tagata he lalolagi katoa ko e fakamailoga a ia he Tau Fakamoli a Iehova. Kua aoga agaia nakai e puhala ia he vahā nei, ha kua uka fakahaga ke moua e tau tagata he tau kaina he falu motu?
2. Ko e heigoa e fakaveaga faka-Tohi Tapu ma e fakamatala he taha fale ke he taha fale?
2 Faka-Tohi Tapu mo e kua Aoga: Ko e gahua fakamatala he taha fale ke he taha fale kua ha ha i ai e fakaveaga faka-Tohi Tapu. Ne tala age a Iesu ke he tau tutaki toko 70 ke o atu takitokoua ke he tau fale he tau tagata. (Luka 10:5-7) Nakai leva e mate ha Iesu, ne pehē e Tohi Tapu hagaao ke he tau tutaki haana: “Kua nakai oki foki e tau aho oti he fakaako atu e lautolu, mo e fakamatala atu ke he faituga, ke he taha fale foki mo e taha fale, e tala mitaki.” (Gahua 5:42) Ne fakaako fakamakutu foki e aposetolo ko Paulo he taha fale ke he taha fale.—Gahua 20:20.
3. Ko e heigoa falu mena mitaki he fakamatala he taha fale ke he taha fale?
3 Kua aoga agaia e fakamatala he taha fale ke he taha fale ke fakapuloa e tala mitaki he vahā nei. Kua maeke ia tautolu ke ‘hūhū ki ai’ po ko hai kua lata, he puhala kua taute tumau mo e maopoopo. (Mata. 10:11) Kua fa fakatotoka e tau tagata ka haia i kaina. He tutala mo lautolu—logona e tau leo ha lautolu, kitia e foliga he tau fofoga ha lautolu, mo e kitia e tau takatakaiaga ha lautolu—ati maeke ia tautolu ke mailoga e tau mena kua fiafia mo e tupetupe ai a lautolu. Kua fa moua e tautolu e magaaho mitaki lahi ke loaloa e fakatutalaaga.
4. Maeke fēfē ia tautolu ke lahi e fua mitaki he fakamatala he taha fale ke he taha fale?
4 Taute e Tau Hikiaga Fakatagata: Ne makai e aposetolo ko Paulo ke taute e tau hikiaga fakatagata “ha ko e vagahau mitaki.” (1 Kori. 9:23) Liga maeke ke hiki e setulu ha tautolu ke fakamatala he magaaho ka liga tokologa e tau tagata i kaina, he o fakaafiafi, he tau matahiku faahi tapu, po ke he tau aho okioki. Fakamau hifo e tau kaina ne nakai fai tagata i ai, ti liu ki ai he taha aho kehe he faahi tapu po ke taha magaaho kehe he aho.
5. Fakalataha fēfē a lautolu ia ne fakakaupā e tau malolō tino ke gahua he taha fale ke he taha fale?
5 Maeke foki a lautolu ne fakakaupā e tau malolō tino ke gahua fakamatala he taha fale ke he taha fale. Liga maeke ia tautolu ke pulega ke o atu mo lautolu ia ke he tau kaina ne mukamuka ke hoko ki ai, he fakaatā a lautolu ke gahua he fakaholoaga kua hagahaga mitaki ki a lautolu. Taha e matakainaga fifine ne fa otioti e fafagu, ne kua maeke ai ke taute taha e fale he tau hafa tula oti. Ka e, ko e fiafia mo e makona ha ia haana he putoia ke he matakau!
6. Ko e ha kua lata ia tautolu ke taute e fakamatala he taha fale ke he taha fale mo vala tumau he fekafekauaga ha tautolu?
6 Tokologa agaia a lautolu ne loto tuga e tau mamoe kua moua he gahua ke he taha fale mo e taha fale. Ne tala age ke he taha tagata fakailoa ne nokonoko e gutuhala: “Hau ki fale. Iloa e au a koe. Hane liogi au ke he Atua ke fakafano mai taha tagata ke lagomatai au, ti logona e au e nokonoko he gutuhala. Kua logona e ia au ti fakafano mai a koe.” Kua fakakite he tau fua ne moua kua fakamonuina agaia e Iehova e puhala fakamatala nei. (Mata. 11:19) Kia taute e fakamatala he taha fale ke he taha fale mo vala tumau he fekafekauaga haau.