Maeke Nakai a Koe ke Fakalataha ke he Fakamatala he Magaaho Afiafi?
1. He talahauaga he taha tagata pulotu, magaaho fe he aposetolo ko Paulo ne fakamatala mai he taha fale ke he taha fale?
1 I loto he tohi Daily Life in Bible Times, ne fa mahani e aposetolo ko Paulo ke fakalataha ke he fekafekauaga he taha fale ke he taha fale “mai he matahola 4 he afiafi ato pouli lahi.” Kua nakai iloa e tautolu ko e fakaholoaga pauaki kia ha Paulo anei, ka e iloa e tautolu kua makai a Paulo ke “eke foki . . . e mena nai ha ko e vagahau mitaki.” (1 Kori. 9:19-23) Liga putoia foki he mena nei e fakatokatoka e tau gahua haana ke fano he taha fale ke he taha fale he magaaho ka tokologa e tagata ke tutala ki ai.
2. Ko e ha kua mitaki lahi e tau magaaho afiafi ke fakalataha ke he fekafekauaga he fonua?
2 Ko e aga mau he tau tagata fakailoa he loga e matakavi ke o atu he taha fale ke he taha fale he tau mogo pogipogi he faahi tapu. Ka e mitaki agaia nakai e magaaho ia he matakavi haau? Taha e paionia ne talahau hagaao ke he fonua haana: “Kua nakai moua ha tagata i kaina he aho. Ka e laulahi he tau tagata kua haia i kaina he magaaho afiafi.” Ko e fakamatala he magaaho afiafi kua liga ko e magaaho mitaki lahi ke moua pauaki e tau tagata taane, ke tutala ke he kupu mooli. Kua fa fakatotoka lahi e tau tagata he kaina ti makai ke tutala. Ka aoga ke taute pihia, kua lata e tau motua ke fakatokatoka e tau feleveiaaga ma e fekafekauaga he magaaho afiafi.
3. Liga fakakite fēfē e tautolu e loto manamanatu ka gahua fakamatala he magaaho afiafi?
3 Fakaaoga e Loto Manamanatu: Ka fakalataha ke he fakamatala he magaaho afiafi, kua aoga lahi ke manamanatu. Ma e fakatai, kaeke kua fina atu a koe ke he taha tagata hane lavelave, tuga he magaaho kai afiafi haana, kua mitaki ke tala age to liu atu he taha mogo. Kaeke kua pouli, tu he mena ke maeke e tagata he kaina ke kitia a koe, ti fakamafiti ke tala age ko hai a koe mo e kakano he aahi atu haau. Ko e mena fakailoilo foki ke gahua takitokoua po ke he matakau mo e ke o he puhalatū ne maama e tau molī ke nakai ni ko koe tokotaha. Ua aahi atu he magaaho kua mule lahi neke fakatauhele e koe e tau tagata he kaina hane tauteute ke momohe. (2 Kori. 6:3) Ka nakai hagahaga mitaki e matakavi ka pouli, ti fakamatala he tau matakavi pihia he mogo afiafi.—Fakatai 22:3.
4. Ko e heigoa e tau monuina ka moua mai he fakamatala he magaaho afiafi?
4 Tau Monuina: Kua mua atu e fiafia e fekafekauaga ka maeke ia tautolu ke fakamatala. Ti ka lahi e tutala ha tautolu, to loga atu foki e magaaho ka moua e tautolu ke lagomatai e falu “ke fakamomoui e tau tagata oti kana, mo e hokotia a lautolu he maama ke he kupu moli.” (1 Timo. 2:3, 4) Maeke nakai a koe ke hikihiki e setulu haau ke fakalataha ke fakamatala he magaaho afiafi?