Kua Taute Nakai e Koe e Fakamatala he Mogo Afiafi?

¹ Kua moua e tautolu oti e fiafia he fua mitaki e tau gahua ha tautolu. He taha faahi, ka nakai kitia e tautolu e tau fua mitaki, kua eke e gahua mo mena mateafu mo e uka. Ko e gahua fai kakano kua palepale fakatagata, ti ko e monuina. (Fakatatai Fakamatalaaga 3:10-13.) Maeke ia tautolu ke fakagahua e matapatu fakaakoaga nei ke he gahua fakamatala ha tautolu. Iloa e tautolu mai he tau fua ne moua ka o a tautolu he taha gutuhala ke he taha gutuhala ti tutala mo e tau tagata hagaao ke he Tohi Tapu, kua liliu a tautolu ki kaina mo e hahau fakaagaaga. Ne logona e tautolu kua fai mena mooli ne taute e tautolu.

² He falu matakavi ne kua uka lahi fakahaga ke moua e tau tagata he kaina ke he tau magaaho pauaki he aho. Ne fakakite he tau hokotaki kua loga e matakavi ne molea e 50 e pasene ne nakai fai tagata he tau kaina ka aahi tuai atu he aho. Loga e fakapotopotoaga ne fehagai ke he lekua nei he taute e tau fakaholoaga ma e fakamatala he mogo afiafi, ti moua e lautolu e tau fua mitaki. Ne hokotaki he tau tagata fakailoa ka aahi atu a lautolu fakaafiafi, tokologa e tagata i kaina, ti laulahi he tau tagata kua fa fakatotoka ti hihiga ke fanogonogo ke he ogo he Kautu. Kua taute nakai e koe e fakamatala he mogo afiafi he matakavi haau?​—Fakatatai Mareko 1:32-34.

³ Fakatoka he Tau Motua e Fakamatala he Mogo Afiafi: He falu matakavi ne feleveia ma e gahua he fonua he magaaho fakaafiafi ne mitaki e lalagoaga. Manamanatu ke he tau tagata fakailoa ikiiki ne hili e aoga he mogo afiafi mo e ke he tau tagata lalahi ne oti e gahua tupe he mogo afiafi lahi he aho. Falu tagata fakailoa ne nakai maeke ke gahua he fonua he tau matahiku vahātapu ne moua e fakamatala he mogo afiafi he faahi tapu ko e puhala aoga ma lautolu ke fakalataha tumau he gahua fakamatala.

⁴ Ha ha i ai e tau puhala kehekehe kua maeke ia koe ke fakalataha he fakamatala he mogo afiafi. Maeke ia koe ke fakamatala mai he taha fale ke he taha fale mo e tau mekasini po ke fakaaoga e tau tohi foaki ma e mahina. Ko e mogo afiafi ko e magaaho mitaki ke aahi atu ke he tau tagata ne nakai moua he kaina he aahi atu e tau tagata fakailoa he mogo pogipogi po ke matahiku vahātapu. Liga fai matakavi mitaki foki ke fakamatala he puhalatū, he maeke ia koe ke tutala mo e tau tagata he liliu mai he gahua. Tokologa ne moua ko e mogo afiafi ko e magaaho mitaki lahi ke liu aahi atu ki a lautolu ne fiafia.

⁵ Kia Mataala mo e Fakailoilo: He afiafi mahegihegi po ke pouli kua liga hagahaga kelea e falu matakavi. To liga pulotu ke ō takitokoua po ke matakau he tau puhalatū maama mitaki mo e aahi e tau kaina po ke fale tokoluga kaeke kua haohao mitaki mooli he logona e koe. Ka nokonoko e koe e gutuhala, tu he mena ke mukamuka ke kitia, ti talahau fakamahino ko hai a koe. Kia fakalotomatala. Ka mailoga e koe kua aahi atu a koe he magaaho nakai hagahaga mitaki, tuga kua kai e magafaoa, ole ke liu aahi atu he taha magaaho. Fa mitaki lahi mahaki ke fakakaupā e fakamatala haau ke he tau mogo afiafi he aho agaia, ka e nakai taute e tau aahi ne mule lahi, ka tauteute e tau tagata he kaina ke momohe.

⁶ Ko e tau afiafi he magahala mafana kua latatonu pauaki ma e fakamatala he mogo afiafi. He taute e tautolu e ‘fekafekau ke he aho mo e po’ ke he Atua, to fakamonuina e Iehova e tau laliaga ha tautolu.​—Fakakite. 7:15.