Kumi Atu ki a Lautolu kua Lata
1 Ko e tau fakaakoaga ha Iesu ke taute aki e gahua fakamatala kua fakatoka mai e paleko ki a tautolu. Ne pehe a ia: “Ko e māga, po ke magamotu ke hohoko atu a mutolu ki ai, kia hūhū po ko hai ha i ai kua lata.” (Mata. 10:11) Mo e tau tagata he vaha nei kua tote lahi e magaaho ne fakaaoga he kaina, maeke fefe ia tautolu ke taute e kumi fakamatafeiga nei?
2 Kumikumi Hau a Matakavi: Kamata he kumikumi hau a matakavi. Magaaho fe ka liga haia e tau tagata he kaina? Moua i fe a lautolu he aho? Fai aho pauaki nakai he fahi tapu po ke magaaho he aho ka liga talia lahi e lautolu e ahi atu? He hikihiki e fekafekauaga hau ke he puhala mo e tau tutuaga he tau tagata he matakavi kua maeke ke lagomatai a koe ke moua e fua mitaki lahi.—1 Kori. 9:23, 26.
3 Tokologa e tau tagata fakailoa ne moua e kautuaga he tau magaaho tula fakaafiafi. Falu he tau tagata he kaina kua okioki mitaki mo e manako ke fanogonogo he magaaho ia. Ka gahoa e tau tula he tau aho loloa he tau mahina he vaha makalili, ko e fakamatala he telefoni (ka fakagofua) he tau magaaho afiafi kua lauia mitaki lahi ai. He gahua he matakavi pisinisi mo e fakamatala he tau matakavi tolo ko e tau puhala foki ke hokotia ke he tau tagata e tala mitaki.
4 He magahala he mahina matagahua pauaki, taha e fakapotopotoaga ne fakatu e fakamatala fakaafiafi he tau Aho Faiumu mo e tau Aho Tapu mo e fakamatala he magaaho afiafi he tau Aho Lotu mo e tau Aho Faraile. Kua fakatokatoka foki e lautolu e fakamatala he telefoni mo e fakatokatoka ke gahua he matakavi pisinisi. Ko e tau fakatokatokaaga nei ne fakatupu ai e fakamakai lahi ma e fekafekauaga ne kua fifili e fakapotopotoaga ke matutaki ki ai.
5 Fakamakutu ke Liliu Atu: Kaeke ko e paleko he matakavi hau ke moua e tau tagata he kaina ka liu ahi atu a koe, lali ke taute e maveheaga pauaki ke liu ahi atu he matahiku he tau liu ahi atu takitaha, putoia ki ai e ahi atu fakamua. Ti, kia fakamoli ke taofi ke he maveheaga. (Mata. 5:37) Ka latatonu, kia maeke ia koe ke ole ke he numera telefoni he tagata he kaina. Kua maeke foki he mena nei ke lagomatai a koe ke liu matutaki ke he tagata.
6 Ko e tau laliaga makutu ha tautolu ke kumi a lautolu ne lata mo e liu ahi atu ke he tagata fiafia kua moua e tautolu ka ha ha moli ai e fakamonuina ha Iehova.—Fakatai 21:5.