Lauia Mitaki e Fakamatala he Telefoni
1. Ko e ha e fakamatala he telefoni kua lata ke manamanatu ki ai ko e vala aoga he ha tautolu a gahua he fonua?
1 Ko e ha kua liga manamanatu a tautolu ke fakaaoga e fakamatala he telefoni ke he ha tautolu a gahua he fonua? Ha ko e taha puhala a ia ke lagomatai e falu ke moua e iloilo tonu ma e moui tukulagi. (2 Pete. 3:9) Pete ko e matapatu puhala ha tautolu he fakailoa e tala mitaki he Kautu he Atua ko e fakamatala he taha fale ke he taha fale, kua makai a tautolu ke fakaaoga e falu puhala ke hokotia ki a lautolu ne nakai fa moua i kaina.—Mata. 24:14; Luka 10:1-7; Fakakite. 14:6.
2. Fakatoka fēfē e fakamatala he telefoni?
2 Puhala ne Fakatokatoka Aki: Mo e tau fakaholoaga he gahua he fonua he taha fale ke he taha fale, kua foaki foki ke he tau tagata fakailoa e fakatokaaga ke fakamatala he telefoni. Maeke ai ke taute tokotaha po ke matakau tote ne liga tokoua po ke tokotolu. Ko e mena po ke, poko ka fakaaoga kua lata ke felauaki mo e matagahua. Lagomatai lahi ke he tokologa ke nonofo viko he laulau ti ha ha i mua ha lautolu e tau tohi kua fa fakaaoga e lautolu ka fakamatala he taha fale ke he taha fale.
3. Ko e heigoa kua lata ke tokaloto e tautolu ka fakamatala he telefoni?
3 Puhala ke Fakamatala he Telefoni: Ka fakamatala he telefoni, kua lata e fakatutalaaga ha tautolu ke matutaki mitaki. Ko e falu ne kamata laia ka liga totou ke he tagata he kaina e fakatutalaaga ke he puhala matutaki mitaki. Ko e tau fakafeleveiaaga ne moua he Ha Tautolu a Fekafekauaga he Kautu mo e tuleke Manako Nakai a Koe ke Iloa e Kupu Mooli? ka lagomatai e mena nei. Ka taute ne koe e fakatutalaaga haau, fakamaama e matakupu, fakatū e hūhū, ti mautali ke totou falu kupu tohi gahoa ne foaki e tali. To foaki e koe e tau tohi ia ne fa foaki he taha fale ke he taha fale. Manamanatu la ke he tau fakamanatuaga nai: Fakatotoka mo e vagahau fakatekiteki. Kia totonu, fakauka, mo e fakakapitiga, ha kua maeke e mena nei ke mailoga he telefoni. Fanogonogo he talahau he tagata he kaina e tau manatu haana, ti fakatautonu mo e fakite e loto fakaaue ke he tau manatu haana. Mailoga ke nakai tala age e fakatokaaga foaki mena fakaalofa, neke iloa hehē e mena nei ko e puhala ole tupe he telefoni.
4. Ko e heigoa he fakamatala he telefoni ka lagomatai a tautolu ke taute aki e fonua ne kotofa ki a tautolu?
4 Ko e tagata ne tutala a koe ki ai he telefoni kua liga nofo fale he gagao po ke tagata ne gahua tumau ti uka ke moua a ia he fekafekauaga he taha fale ke he taha fale. Ha ha i ai falu ne nonofo he tau matakavi ne fai tagata leoleo he hala po ke tau fale tokoluga ne nakai o fakahanoa ki loto. Ko e mena ia, he eketaha ke taute katoatoa mo e fakamakutu e feua ha tautolu, manamanatu ke fakaaoga e puhala lauia mitaki he fakamatala he telefoni.