Kaufakalataha he Faka-Kerisiano Moli—Fefe?
1 Ko e heigoa kua maeke ke fakalataha e toko ono miliona tagata mai he tau motu 234 mo e kau ke he 380 e vagahau he tau matakau? Ko e tapuakiaga ni ha Iehova ko e Atua. (Mika 2:12; 4:1-3) Kua iloa fakatagata he Tau Fakamoli a Iehova ko e kaufakalataha faka-Kerisiano moli kua kitia moolioli he vaha nei. He ‘taha e fuifui mamoe’ i lalo he ha tautolu a “leveki mamoe ne tokotaha,” hane fifili a tautolu ke kalo kehe mai he agaga mavehevehe he lalolagi.—Ioane 10:16; Efeso 2:2.
2 Ko e finagalo nakai kaumahala he Atua ko e tufugatia lotomatala oti kana hana ka fakalataha ke he tapuakiaga moli. (Fakakite. 5:13) He iloa e aoga he mena nei, ne taute e Iesu e kaufakalataha he hana tau tutaki mo matakupu he liogi fakamakai. (Ioane 17:20, 21) Maeke fefe ia tautolu takitokotaha ke lafi e kaufakalataha ke he fakapotopotoaga Kerisiano?
3 Puhala ke Moua e Kaufakalataha: He nakai fai Kupu mo e agaga he Atua, to nakai maeke ke moua e kaufakalataha faka-Kerisiano. Ko e fakaaoga e tau mena ne totou e tautolu he Tohi Tapu kua fakaata e agaga he Atua ke gahuahua mitaki he tau momoui ha tautolu. Kua fakamalolo he mena nei a tautolu “ke toto mau e loto fakalataha ha he [a]gaga ke he pipiaga he mafola.” (Efeso 4:3) Kua omoomoi a tautolu ke fefakaukaaki ke he fakaalofa. (Kolo. 3:13, 14; 1 Pete. 4:8) Fakatolomaki nakai e koe e kaufakalataha he manamanatu ke he Kupu he Atua he tau aho takitaha?
4 Ko e poakiaga ha tautolu ke fakamatala mo e taute tutaki kua fakalataha aki foki a tautolu. Ka gahua a tautolu mo e falu he fekafekauaga Kerisiano, “mo e fakamakamaka fakalataha ha ko e tua ha he vagahau mitaki,” kua eke a tautolu mo “tau lagomatai ke he kupu moli.” (Filipi 1:27; 3 Ioa. 8) He taute pihia e tautolu, ko e pipiaga fakalataha he fakaalofa i loto he fakapotopotoaga hane fakamalolo ai. Ko e ha he nakai uiina e taha tagata ne nakai la gahua fou mo koe ke o tokoua mo koe he fekafekauaga he fonua he fahi tapu nei?
5 Ko e monuina ha ia ha tautolu ke fai vala he fakamatakainaga moli hokoia he lalolagi katoa he vaha nei! (1 Pete. 5:9) Fou nei, tokoafe ne moua mua e kaufakalataha he lalolagi ke he Tau Fonoaga he Lalolagi Katoa “Kia Fakaheke Atu ke he Atua.” Kia igatia a tautolu mo e foaki ke he fakalatahaaga uho nei ha ko e totou e Kupu he Atua he tau aho takitaha, ha ko e fakamafola e tau fekehekeheaki ke he fakaalofa, mo e ha ko e fakamatala e tala mitaki “mo e loto taha.”—Roma 15:6.