Maeke Nakai a Koe ke Hikihiki e Setulu Haau?
1. Ko e ha kua lata ia tautolu ke hikihiki e setulu ha tautolu ke fakamatala?
1 Ha ko e tau Kerisiano mooli, kua talia e tautolu e uiina ke eke mo “takafaga ke he tau tagata.” (Mata. 4:19) Ke tuga e tau tagata takafaga ika, to liga mitaki lahi e fua he takafaga tagata ha tautolu kaeke setulu e tautolu e magaaho ke fakamatala he tau matakavi ne ha ha ai e tau tagata. Kua aoga pauaki e mena nei he tau mahina he gahua pauaki. He pale laā po ke afiafi, kua tokologa e tagata he tau kaina. Fa mahani ai, kua fakahautoka a lautolu ti liga hihiga lahi ke tutala ke he tau tagata ahiahi. Maeke nakai ia koe ke hikihiki e setulu haau ke fakamatala he tau magaaho ia?—1 Kori. 9:23.
2. Ko e heigoa falu puhala kua maeke ia tautolu ke moua loga e tagata ke fakatutala ke he tala mitaki?
2 Fakamatala he Magaaho Afiafi: He fakatokatoka tuai ke fakamatala he tau matahola afiafi ka fakaatā a tautolu ke loga atu e tagata ka tutala ki ai ke he tala mitaki. (Fakatai 21:5) Liga maeke e tau fuata mui ke fakamatala ka hili e aoga. Liga maeke falu ke taute pihia ka hili e gahua. Ko e falu matakau fakaakoaga tohi kua liga maeke ke fakatokatoka ke fakamatala ke taha e tulā ato kamata e fakaakoaga tohi he faahi tapu.
3. Ko e heigoa e tau puhala kua maeke ia koe ke fakamatala he pale laā mo e magaaho afiafi he fonua haau?
3 Ko e fakamatala ke he taha fale mo e taha fale he pale laā mo e magaaho afiafi kua liga maeke ke tutala ki a lautolu ne nakai fa moua he tau kaina. Ke he loga he tau matakavi, ko e gahua ke he puhalatū mo e falu puhala fakamatala ke he toloaga tagata kua maeke ke taute he magaaho afiafi. Ti tokologa ne mailoga e tau magaaho afiafi ko e magaaho mitaki lahi ke taute e tau liu aahi atu mo e kamata e tau fakaakoaga Tohi Tapu.
4. Ko e ha kua aoga lahi ke fakakite e fifili fakamitaki mo e manamanatu ka fakalataha ke fakamatala ke he magaaho afiafi?
4 Lata ke Fifili Fakamitaki: Kua lata ke fifili fakamitaki ka fakalataha ke he fakamatala he magaaho afiafi. Fa mahani ai, kua mitaki lahi ke fakakaupa e fakamatala ke he magaaho afiafi ni, ke nakai ahiahi atu ka hane tauteute e tau tagata he kaina ke momohe. (Filipi 4:5) Ka nokonoko e koe e gutuhala, tu he mena ke mukamuka ke kitia, ti talahau fakamahino ko hai a koe. Fakamafiti ke tala age e kakano he ahiahi atu haau. Kaeke aahi atu a koe he magaaho ne nakai hagahaga mitaki, tuga kua hane tauteute e magafaoa ke kai, ole ke liu atu he taha magaaho foki. Kia manamanatu tumau.—Mata. 7:12.
5. Maeke fēfē ia tautolu ke kalo mai he tau tutūaga ne liga hagahaga kelea ka fakamatala?
5 Kua lata foki ia tautolu ke mataala ke he tau tutūaga hagahaga kelea. Kaeke fakamatala a koe he afiafi ke mahegihegi po ke ka pouli, kua pulotu ke o takitokoua po ke matakau. Fano he puhalatū ne maama mitaki ke nakai ogoogonoa. Fakamatala ni he tau matakavi ne logona e koe kua haohao mitaki. Kalo mai he tau matakavi ne liga hagahaga kelea ka pouli.—Fakatai 22:3.
6. Ko e heigoa e tau fua lafi ki luga ka moua he fakamatala he pale laā mo e magaaho afiafi?
6 Ko e fakamatala he pale laā mo e magaaho afiafi ka liga fakaatā a tautolu ke gahua he fekafekauaga mo e tau paionia fakakū mo e tau paionia mau. (Roma 1:12) Maeke nakai ia koe ke hiki e setulu ke fakalataha ke he vala nei he fekafekauaga?