Tau Fakaholoaga Foou ma e Fakamatala ke he Toloaga Tagata
1. Ko e heigoa e fakafifitakiaga ne fakatoka he tau Kerisiano he senetenari fakamua?
1 Ko e tau Kerisiano he senetenari fakamua ne nakai fakamatala hokoia ni he taha fale ke he taha fale. Ne fakamatala foki a lautolu ke he toloaga tagata. (Gahua 20:20) Ma e fakatai, ne ō a lautolu ke he faituga, he iloa e lautolu to tokologa e tau tagata i ai. (Gahua 5:42) He haia i Atenai, ne fakamatala e aposetolo ko Paulo he tau aho oti ke he tau tagata he makete po ke tau malē. (Gahua 17:17) He vahā nei, ko e matapatu puhala ha tautolu ke folafola e tala mitaki kua matutaki agaia he gahua he fonua he taha fale ke he taha fale. Ka e o atu foki a tautolu ke he tau tutūaga motoka, tau faahi pisinisi, tau paaka, tau puhalatū lavelave, mo e falu matakavi ke fakamatala ke he tau tagata he ha mena ni kua moua ai a lautolu. He fakamalolō ke he tau tagata fakailoa oti ke fakalataha ke he gahua fakamatala ke he toloaga ka maeke, tokologa kua maeke ke fakalataha ke he ua e fakaholoaga foou ne fakalagalaga ke fakamatala ke he toloaga tagata.
2. Ko e heigoa e fakaholoaga ne taute fakataitai ne kamata ia Novema 2011?
2 Matakavi Pauaki he Taone ke Fakamatala ke he Toloaga Tagata: Fakakite mai he 2013 Yearbook, lau 16 mo e 17, ne kamata ke taute e fakaholoaga fakataitai ke fakamatala ke he toloaga tagata i New York City ia Novema 2011. Ko e tau laulau mo e tau fata tohi ne tuku ai e tau fakatino fulufuluola mo e tau tohi he tau vagahau kehekehe ne fakatutū fakamitaki he tau matakavi he taone ne tokologa e tau tagata ne ō hui ai. He tau aho takitaha ne totou afe e tau tagata ne ō ai, putoia a lautolu ne nonofo he tau fale ne ai maeke ke ō fakahanoa ki ai mo e tau tagata ne nakai nonofo tumau i kaina. Ne fiafia lahi e tau tagata. He taha e mahina ne nakaila leva ia ne 3,797 e mekasini mo e 7,986 e tohi ne foaki. Tokologa e tagata ne ō ai ne ole ke he fakaako Tohi Tapu. Kua hagaaki ai ke kamata e tau fakaako Tohi Tapu, ti ko e tau higoa ne toka hifo e lautolu ne fiafia, kua ta atu fakamafiti ai ke he tau fakapotopotoaga kua lata ke maeke ke fakakia e fiafia ia.
3. Kua fakalaulahi fēfē e fakaholoaga foou nei?
3 He mailoga e holo mitaki he fakaholoaga fakataitai nei, kua fakalaulahi atu ai ke he lalolagi katoa ke he falu matakavi he tau taone ne tokologa e tagata i ai. Ko e la ofisa he motu ka fakamailoga e tau taone ka aoga mai ai. Fa mahani, ko e tau taone nei ka tolo mai e tau tagata ma e tau tutūaga puhala ō fenoga po ke loga e tau ofisa po ke tau fale nonofo ne tokologa lahi e tau tagata ne ō hui ai. To kamata matutaki mogoia e la ofisa mo e tau fakapotopotoaga ka taute ai mo e foaki falu fakatonuaga. Fa mahani ke fakaaoga e tau paionia tumau mo e pauaki, ka e he falu matakavi kua fakaaoga foki e tau paionia fakakū.
4. Taute fēfē e fakamatala ke he toloaga tagata he tau matakavi pauaki he taone?
4 Puhala kua Taute e Fakamatala: Ko lautolu ne fakamatala ke he toloaga tagata he tau matakavi pauaki he taone, kua fakatali a lautolu ke he tau tagata ke o atu ke he laulau po ke fata tohi utafano. Ka fina atu taha tagata ki ai, kua uiina a ia ke uta ha tohi kua fiafia a ia ki ai. Kua fiafia e tau paionia ke tali mai he Tohi Tapu e tau hūhū haana. Ka fai tohi a ia ka uta, ne nakai tala age he tau paionia e fakatokaaga foaki mena fakaalofa. Kaeke ke hūhū a ia ke he puhala kua fakatupe e gahua ha tautolu, liga fakamaama he tau paionia kua maeke ke fakafano atu e tau mena fakaalofa ke he kaina ne tu i loto he tohi. Ka maeke, hūhū a lautolu: “Manako nakai a koe ke ahiahi atu taha tagata ke he kaina haau?” po ke “Iloa nakai e koe na fai fakaakoaga Tohi Tapu ne nakai totogi kua maeke ke taute foki mo e tohi ia?”
5. Palepale mitaki fēfē e taute he fakaholoaga foou nei ma e taha hoa mau?
5 Ko e taute he fakaholoaga foou nei kua moua e palepale mitaki lahi. Taha e hoa mau ne tohi: “He tutū he tapa laulau mo e kitia e tau tagata ne totou afe ne ō fano he tau aho takitaha kua iloa mitaki e maua e lahi he gahua kua taute ke hokotia ke he tau tagata he lalolagi katoa. He kitia e tau tagata tokologa nei mo e manamanatu ke he puhala kua leveki mooli e Iehova e tau tagata takitaha, kua fakamalolō a maua ke taute e gahua fakamatala mo matapatu he tau momoui ha maua. Manamanatu a maua ko Iehova hane kitekite ke he tau loto he tau tagata oti ne o fano he laulau, mo e kumi a lautolu kua latatonu. Kua logona e maua e tata lahi ke he tau agelu ne gahua mo maua.”
6. (a) Ko e heigoa e taha fakaholoaga foki ke fakamatala ke he toloaga tagata ne kua fakatokatoka he loga e tau fakapotopotoaga, ti kehe fēfē mai ai he fakamatala ke he toloaga tagata he tau matakavi pauaki he taone? (e) Kaufakalataha fēfē e tau fakapotopotoaga ka fakamatala ke he toloaga tagata?
6 Fakamatala ke he Toloaga Tagata ne Fakatoka he Fakapotopotoaga: Lafi ke he fakamatala ke he toloaga tagata he tau matakavi pauaki he taone, taha foki e fakaholoaga foou ne fakatoka he tau kau he tau motua ma e tau fakapotopotoaga ha lautolu. He fakaholoaga nei, ne fakatu he tau tagata fakailoa e laulau po ke fata tohi utafano he matakavi ne tokologa e tagata he fonua ni kua kotofa e fakapotopotoaga ki ai. Kehe e puhala nei mai he fakamatala ke he toloaga tagata he tau matakavi pauaki he taone, ne fakaaoga e tau matakainaga mai he loga e tau fakapotopotoaga ke fakamatala he tau taone ne fifili he la ofisa ne kua tokologa e tagata i ai.—Kikite e puha “Lata ke Kaufakalataha.”
7. Ka latatonu, fakatokatoka fēfē he tau motua ke fakamatala ke he toloaga tagata he matakavi?
7 Ko e tau motua ka kitekite kua fai matakavi pihia e fakapotopotoaga ne tokologa e tagata ne o hui ai ti fifili mogoia kua lata nakai ke fakatokatoka e fakamatala ke he toloaga tagata. Ko e falu matakavi mitaki ka fakatū ai e laulau po ke fata tohi utafano ko e tau tutūaga puhala ō fenoga, toloaga tagata, tau paaka, tau puhalatū lavelave, tau fale koloa lalahi, tau fale he tau tama aoga, tau malē vakalele, mo e tau toloaga ne taute lagataha he tau. Ha i ai e kakano mitaki ma e laulau ke taha ni e fakatuaga, tatai e tau aho, mo e tatai foki e tulā. Kua mailoga ko e tau laulau ne fakatutū i mua he matakavi ne loga e fale koloa kua mua e mitaki ka fakatatai ke he tau laulau i fafo he taha e fale koloa lahi ha kua fa hagaaki e tau tagata ke he fekau ha lautolu he fale koloa ia. Falu matakavi, tuga e tau hala ō hui lavelave, kua liga mitaki lahi ke fakatu ai e fata tohi utafano tote. Maeke e tau motua ke moua mai he ha tautolu a faahi Kupega Hila e tau faila pauaki ke taute aki e tau koloa ke fakatātā e tau mekasini Kolo Toko mo e Awake! mo e tohi Fakaako he Tohi Tapu. Ko e tau faila nei ne taute pauaki ke fakaaoga he puhala fakamatala nei ke he toloaga tagata. Ko lautolu ka taute e gahua nei to taute ai tuga ni e fakamatala ke he toloaga tagata he tau matakavi pauaki he taone ti lata ke muitua fakalahi ke he tau fakatokaaga he leveki fekafekau. Ka moua e lautolu e matahigoa he kaina mai he tagata ne fiafia ka e nakai nofo he matakavi ha lautolu, kua lata ni ke fakapuke fakamafiti e lautohi Please Follow Up (S-43) ti age ke he tohikupu.
8. Ka nakai fai fakatokaaga pauaki e fakapotopotoaga ma e fakamatala he toloaga tagata, ko e heigoa e tau puhala kua maeke agaia a koe ke fakamatala ke he toloaga tagata?
8 Fakamatala ke he Toloaga Tagata he Matakavi Fakatagata Haau: Falu fakapotopotoaga kua liga nakai fai matakavi ne tokologa e tagata ō hui ke maeke ke fakatu e laulau po ke fakaaoga e fata tohi utafano. Pete ia, maeke agaia e tau tagata fakailoa he tau fakapotopotoaga ia ke fakamalolō ke taute e fakamatala ke he toloaga tagata he matakavi fakatagata ha lautolu. Fai matakavi fakatau koloa nakai, fale koloa lahi, po ke fale koloa ne lavelave he matakavi ha mutolu? Fai paaka nakai po ke matakavi kua tolo ki ai e tau tagata? Fai matagahua nakai ne fa taute ma e tau tagata he matakavi? Ka fai, liga maeke agaia a koe ke taute e fakamatala ke he toloaga tagata.
9. Ko e ha kua lata ke mataala a tautolu ke fakamatala ke he tau tagata he ha matakavi kua ha ha ai a lautolu?
9 Ko e finagalo ha Iehova ke “fakamomoui e tau tagata oti kana, mo e hokotia a lautolu he maama ke he kupu moli.” (1 Timo. 2:4) Kakano ia ati lali a tautolu ke hokotia ke he tau tagata tokologa ke tala age e fekau he Kautu ato hoko mai e fakaotiaga. (Mata. 24:14) Kua loga e matakavi ne uka lahi ke moua e tau tagata i kaina. Ka e liga maeke ia tautolu ke tutala ki a lautolu ka ō a lautolu ke he tau toloaga tagata. Liga ko e fakamatala ni ke he toloaga tagata e puhala ka maeke falu ke logona e tala mitaki. Kia eketaha mogoia a tautolu ke taute ha tautolu a gahua he fonua he fakamatala ke he tau tagata he ha matakavi kua ha ha ai a lautolu.—2 Timo. 4:5.
[Puha he lau 5]
Lata ke Kaufakalataha
Kua iloa ai e tau tagata fakailoa he tau fakapotopotoaga tata mai kua fa fakamatala ke he toloaga tagata he matakavi taha ia foki he puhalatū, tutūaga motoka, mo e i mua he tau fale pisinisi po ke tau tutūaga puhala o fenoga. Ne toka he tau tagata fakailoa mai he tau fakapotopotoaga kehekehe e tau mekasini he tau matakavi taha ia tuga e poko fakatali po ke fale unu ti tatai foki e tau pisinisi ne fakamatala ki ai. Kua fakalagalaga he mena nei e tau tagata pisinisi mo e tau tagata ne nonofo tata ki ai ke hogohogo manava he falu mogo, pete foki nakai fakamatala e tau tagata fakailoa i ai he taha e mogo. Ti kua mitaki ke gahua ni ki loto he matakavi kua kotofa e fakapotopotoaga ki ai ka fakamatala ke he toloaga tagata.
Ka manako e tau tagata fakailoa ke fakamatala he fonua he fakapotopotoaga ne tata mai, kua lata ia lautolu ke tutala ke he leveki fekafekau ha lautolu. Ko e leveki fekafekau mogoia ka matutaki ke he leveki fekafekau he taha fakapotopotoaga ke moua e fakaatāaga ato maeke a lautolu he fakapotopotoaga haana ke gahua ai. Ka kotofa e tau fakapotopotoaga vagahau kehe ke fakamatala he matakavi taha ia, kua lata e tau leveki fekafekau ke fai matutakiaga neke fakahogohogo manava teao e tau tagata he matakavi. Ka kaufakalataha to “eke e tau mena oti mo e fulufuluola mo e taute fakamitaki.”—1 Kori. 14:40.
[Fakatino he lau 6]
[Fakatino he lau 6]