Fakamatala he Puhalatū ne Aoga Mitaki
1. Ko e heigoa e taha puhala ke fifitaki e tautolu a Iesu?
1 He vahā he haana fekafekauaga, ne nakai fakauaua a Iesu ke tutala mo e tau tagata ne feleveia mo ia he puhalatū po ke falu mena foki ne o atu ki ai e tau tagata. (Luka 9:57-61; Ioane 4:7) Ne manako a ia ke fakailoa e fekau aoga lahi haana ke he tokologa mo e tokologa e tau tagata. He vahā nei, ko e fakamatala he puhalatū ko e puhala aoga lahi ke lagomatai e tau tagata ke iloa e pulotu he Atua. (Fakatai 1:20) Ko e kautūaga ha tautolu to holo ki mua e mitaki kaeke kua taute e koe e lakaaga fakamua mo e fakaaoga e lotomatala.
2. Putoia fēfē e lakaaga fakamua ka gahua he puhalatū?
2 Taute e Lakaaga Fakamua: Kua mitaki ni kaeke kua fina atu a koe ke he taha tagata ka e nakai tu tokotaha po ke nofo he taha e mena mo e fakatali ki a lautolu kua o fano ke o mai ki a koe. Mamali, ono ke he mata, mo e moua e aga fakatotoka mo e mahani fakakapitiga. Ka fakatau gahua a koe mo e falu tagata fakailoa kua mitaki ni ke igatia mo e fakafeleveia e tau tagata. Ko e lakaaga fakamua kua latatonu foki ke liu fakakia a lautolu ne fiafia, ne feleveia mo koe. Ka mitaki, he oti e fakatutalaaga ha mua ti ole fakamolemole ke moua e puhala ke liu matutaki a koe mo e tagata. Falu he tau tagata fakailoa ne fa gahua tumau he taha e matakavi, ti maeke ke tutala tumau mo e tau tagata agaia ni ti fakatolomaki ki mua e fiafia ha lautolu.
3. Fakagahua fēfē e tautolu e lotomatala ka fakamatala he puhalatū?
3 Fakaaoga e Lotomatala: Fakaaoga e fuafuaaga mitaki ka fifili ko e mena fe ka tu ai he puhalatū mo e ko hai e tagata kua lata ke fina atu ki ai. Nakai lata ke fakamatala ke he tau tagata oti ne o fano. Kia mataala. Ka fakatai ki ai, kaeke kua fakatepetepe e tagata, liga mitaki ni ke toka a ia ke fano. Ka fakamatala i mua he taha fale gahua, kia fakailoilo ke ua fakatupetupe noa e takitaki he gahuaaga. Mua atu ni e mitaki kaeke ke fakamatala ki a lautolu kua o kehe mai he fale gahua ka e nakai he o atu ki loto he fale gahua. Fakafeleveia e tau tagata ke he puhala kua nakai fakamatakutaku po ke fakaofo ki a lautolu. Pihia foki, kia fakalotomatala ka foaki e tau tohi. Ka fiafia tote e tagata, foaki age e tuleke ka e nakai ko e tau mekasini.
4. Ko e ha ne aoga ai mo e fiafia e puahala fakamatala he tau puhalatū?
4 Kua fakaatā he gahua fakamatala a tautolu ke gana e tau tega loga he kupu mooli he magaaho ku. (Fakama. 11:6) Falu tagata ka feleveia mo tautolu liga ni ko lautolu ne nakai moua e tautolu i kaina ka gahua he taha fale ke he taha fale. Ko e ha kua nakai tauteute ke putoia ke he fakamatala he puhalatū, ko e puhala aoga mitaki mo e fiafia ke he gahua he fonua?