Matutaki Atu ke he Tau Hoa Nakai ko e Tau Fakamoli
1 Ko e mena fiafia lahi he magaaho ka fakalataha e tau tokoua mau ke he tapuakiaga moli. Ka e, kua loga e tau magafaoa ne taha ni mai he tau hoa he fakamauaga ne talia e puhala he kupu moli. Kua maeke fefe ia tautolu ke matutaki atu ke he tau hoa ne nakai ko e Tau Fakamoli mo e fakamalolo a lautolu ke tapuaki a Iehova fakalataha mo tautolu?—1 Timo. 2:1-4.
2 Maama e Manamanatuaga ha Lautolu: Pete he totoko e falu he tau hoa nakai ko e Tau Fakamoli, kua fa pihia ai ha ko e fekehekeheaki po ke nakai maama. Liga manatu e tagata kua tiaki tuai a ia po ke kua ita tafua ke he fiafia fakaagaga fou he hoa hana. “He nofo tokotaha he fale, ne logona e au e matimati,” he talahau he taha tane. “Piko au kua tiaki he hoana mo e fanau haku au,” he talahau he taha. Ne piko falu tane kua kaiha tei he lotu e magafaoa ha lautolu. (Kikite e Aokuso 15, 1990, Watchtower, lau 20-3.) Ti ko e mena a ia ne mitaki ai, ka lata, ke fakaako fakalataha e tane mo e hana hoana he kamataaga he fakaakoaga Tohi Tapu he kaina.
3 Taute Mena Fakalataha: Taha e hoa he Tau Fakamoli ne gahua tokoua ke lagomatai e tau tane mo e tau hoana ke o mai ke he kupu moli. He mole e kamata he matakainaga fifine e fakaakoaga mo e hoana, ne aahi atu e matakainaga tane ke he tane. Ti maeke ia ia ke loga e magaaho ne kamata e fakaakoaga mo e tane.
4 Kia Kapitiga mo e Fakamokoi: Maeke e tau magafaoa he fakapotopotoaga ke lagomatai he fakakapitiga atu ke he tau magafaoa ne nakaila o mai oti ia ke he tapuaki moli. Liga to lagomatai he falu ahiahi e hoa nakai ko e Fakamoli ke kitia ko e tau Kerisiano mafanatia, felevekiaki e Tau Fakamoli a Iehova mo e tokaga ke he levekiaga he tau tagata oti.
5 Mai he taha magaaho ke he taha magaaho, lata he tau motua ke liu kikite e tau laliaga kua taute ke matutaki atu ke he tau hoa nakai ko e Tau Fakamoli mo e kitia ko e heigoa foki ka taute ke ta mai a lautolu ki a Iehova.—1 Pete. 3:1, matahui tala, NW.