Ko e Tohi Mai he Kau Fakatufono

Ke he Tau Matakainaga Tane mo e Fifine:

KUA lahi ha e fiafia ke tohi atu ki a mutolu! Kua nava a mautolu ki a mutolu ma e fakaalofa mo e foaki noa kua tumau a mutolu ke fakakite. To kitia e mutolu mai he tau lau he Yearbook nai kua lahi e mitaki ne moua he magahala he tau he fekafekauaga kua mole. He liu foki, ne fakaaoga e tautolu molea e pilipona tula ke he gahua fakamatala mo e fakaako atu, he fakamafana fakatonu ke he tau tagata ke fakatata ki a Iehova. Nakai kia ko e kotofaaga tokoluga a ia he eke mo taha he tau ekegahua he Atua lilifu ko e Matua he lagi?​—1 Kori. 3:9.

He onoono a tautolu ke he gahua i mua, kua mauokafua a mautolu to tumau a mutolu ke fifitaki e fakamakamaka mo e tua he tau fekafekau he Atua, tuga ne talahau mai he fakamauaga i loto he Tohi Tapu. Ko e aposetolo ko Paulo, ke fakatai, ne fakamakutu ke lauia mitaki lahi e fakatolomakiaga he Kautu. Moli ai, ko e magahala he tau fakahiku he hana nofo i Efeso ne tohi e ia e tohi fakamua hana ke he fakapotopotoaga Kerisiano i Korinito. Hagaao ke he hana tau fakatokaaga mafiti i mua, ne tohi e ia: “Ka e nofo au i Efeso ato hoko ke he Penetekoso. Ha kua hafagi kia au e pa gutuhala kua lahi mo e aoga lahi, tokologa foki a lautolu kua totoko mai.”​—1 Kori. 16:8, 9.

Ne fakatoka a Paulo ke fina atu ki Maketonia mo Korinito. Pete ia, ne mailoga e ia e magaaho mitaki ia ke taute e gahua aoga he nofo ke fai magaaho i Efeso. Ne mukamuka a Paulo ke hikihiki; ne kitia e ia e magaaho mitaki ne liga maeke ia ia ke fakatolomaki e fiafia ke he Kautu ke he matakavi ia ne nofo ai a ia, ti hiki e ia e setulu hana ke he mena ke felauaki ai. Ko e gutuhala lahi ke he gahua kua hafagi ki a ia, ti kua makutu lahi a Paulo ke fakaaoga fakamitaki e magaaho ia ke hu atu ki loto.

Kua lata ke gahua lahi ke hu atu ki ai​—ke fakamatala e tala mitaki mo e atihake e fakapotopotoaga i Efeso. Ke he tau patu he fakapotopotoaga he maaga ia, ne pehe a Paulo ki ai fakamui: “Ti nakai toka e au taha kupu aoga, neke nakai fakailoa atu kia mutolu, ti fakaako atu kia mutolu ki mua he tau tagata, katoa foki mo e taha fale mo e taha fale; Kua talahau fakatonu e au ke he tau tagata Iutaia, katoa mo e tau tagata Heleni e tokihala ke he Atua, mo e tua ke he Iki ha tautolu ko Iesu Keriso.”​—Gahua 20:20, 21.

Tatai ai, tokologa a mutolu e tau matakainaga kua fakaaoga fakamitaki e tau magaaho kua hafagi ki a mutolu. Ke he tau he fakafekauaga kua mole, ke he avelesi, ko e 798,938 nukua maeke ke fakatokatoka ha lautolu a tau gahua ke maeke ke fakalataha ke he falu vala he fekafekauaga paionia. Falu ia mutolu kua o atu ke he tau kala he lalolagi ke fekafekau ko e tau misionare. Kua fakamakamaka a mutolu ke folafola atu e tala mitaki mo e atihake e tau fakapotopotoaga. Falu ia mutolu kua ako e vagahau fou ke maeke ke lagomatai e tau tagata vagahau kehe ne nonofo tata mai. Tumau agaia ko e falu ne kua fakatokatoka ha lautolu a tau gahua ke gahua ke he tau fonua ne nakai la gahua ia po ke fekafekau he matakavi ne lahi e manako lagomatai. Ko e falu kua moua e gutuhala lahi ke he gahua ia ne kua hafagi ke he aoga, ke he gahuaaga, po ke ke he falu tutuaga ne maeke ke taute e fakamatala lauia mitaki, tuga e puhala he telefoni. Ko e tau iloaaga mai he lalolagi katoa kua fakamoli ko e tau tagata he Atua, fuata mo e momotua, hane kumi fakamakutu e tau magaaho mitaki ke foaki e iloilo he kupu moli ke he tau tagata he tau matakavi oti.

Kia mafanatia na kitia mo e hokulo e fakaaueaga ha Iehova ke he tau laliaga ha mutolu. Pehe e Tohi Tapu: “Ha ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa.” (Hepe. 6:10) Kia tumau ke mataala ke he tau magaaho mitaki ka fakaata a koe ke fakatolomaki e tapuakiaga mea. Falu ia mutolu to maeke ke fakalahi atu e fekafekauaga ha mutolu. Maeke ia tautolu oti ke foli ke taute e fekafekauaga ha tautolu ke mahomo atu e lauia mitaki.

To nakai fakakatoatoa e tautolu e kotofaaga ha tautolu ke fakamatala mo e nakai fai totokoaga. Liu ke manamanatu he oti e vagahau ha Paulo ke he gutuhala lahi he tau gahua ne kua hafagi ki a ia, ne tohi e ia: “Tokologa foki a lautolu kua totoko mai.” Ki a Paulo, ko e tau tagata totoko ne putoia ai e tau Iutaia mo e tau tagata Motu Kehe, ko e falu ne tau fakahako ki a ia mo e falu ne takahao fakahalahu ki a ia.​—Gahua 19:24-28; 20:18, 19.

Hane fehagai a tautolu mo e tuaga pihia foki he vaha nai. He gutu atu a tautolu ke he moumouaga he fakatokaaga kelea nai, to amanaki a tautolu ke tupu lahi e totokoaga. Kua puke a Satani ke he “ita lahi,” ti ko e ita ia kua mua atu e taute fakahako ki a lautolu ne fekafekau ke he Atua. (Fakakite. 12:12) Kia nakai nimo ko Satani e “iki he lalolagi nei.” Ne tala age a Iesu ke he hana tau tutaki: “Kane mai ko e tau tagata he lalolagi a mutolu po kua fakaalofa e lalolagi ke he hana tau tagata; ka e nakai ko e tau tagata he lalolagi a mutolu, ka kua fifili e au a mutolu mai he lalolagi, ko e mena ia kua fakavihia ai he lalolagi a mutolu.”​—Ioane 14:30; 15:19.

Kua mauokafua a tautolu ke nakai fakaata ha tagata ke fakalolelole ha tautolu a tua ke he Atua po ke fakamanou hifo ke he gahua fakamatala ha tautolu. Na iloa e tautolu to tumau a lautolu ke totoko mai ki a tautolu mo e taute lagatau ki a tautolu. Pete ia, kua fakatumau a tautolu ke fakamatala e tala mitaki he Kautu, he mauokafua to taholi e Iesu a Satani mo e hana matakau ke he magaaho ni ha Iehova. Ne nakai fakanono he tau tagata totoko a Paulo; ti kua nakai fakanono foki e lautolu e tau fekafekau ha Iehova he vaha nai. Pete e ita ha Satani mo e fakavihia mai he lalolagi, hane gahuahua malolo e agaga ha Iehova ke he Hana tau tagata. Kua fiafia ha ke iloa ko e numera hane fakapuloa e tala mitaki kua hoko ke he tapunu fou ko e 6,304,645!

Ko e liogi ha mautolu ke tumau a mutolu ke fakaaoga fakamitaki e tau magaaho ke fakalaulahi atu e finagalo he Kautu mua ue atu ha Iehova. Kia mafanatia ke he ha mautolu a fakaalofa fiafia ki a mutolu fakatagata he gahua a tautolu mo e “loto fakalataha” he fekafekauaga ke he Atua Mua Ue Atua, ko Iehova.​—Sefa. 3:9.

Ha mutolu a tau matakainaga,

Kau Fakatufono he Tau Fakamoli a Iehova