Amaamanaki he Fakamatala e Tala Mitaki
1 “Kua manako lahi au ke feleveia mo mutolu . . . Kua amaamanaki ai au, kia fakamatala atu au e tala mitaki kia mutolu.” Pihia e puhala ne fakakite he aposetolo ko Paulo he kamataaga he tohi hana ke he tau matakainaga i Roma. Ko e ha kua amaamanaki a Paulo ke ahi atu ki a lautolu? Ne pehe a ia: “Kia moua ai e au ha fua kia mutolu . . . Ha kua nakai ma au ke he tala mitaki; ha ko e mana he Atua ia ke momoui ai.”—Roma 1:11-16.
2 Ne fakaata e Paulo e amaamanaki taha nei he tutala ke he tau patu i Efeso. Ne fakamanatu e ia ki a lautolu: “Tali mai he aho ne hoko mai ai au ki Asia . . . nakai toka e au . . . ti fakaako atu kia mutolu ki mua he tau tagata, katoa foki mo e taha fale mo e taha fale; kua talahau fakatonu e au ke he tau tagata Iutaia, katoa mo e tau tagata Heleni.” (Gahua 20:18-21) He tau matakavi kotofa oti hana, ne foli a Paulo ke holofa e tala mitaki he fakamouiaga mo e moua e tau fua he Kautu. Ko e aga mitaki ha ia ke fifitaki!
3 Liga huhu hifo a tautolu ki a tautolu: ‘Fakakite nakai e au e amaamanaki taha ia he fakapuloa e tala mitaki he maaga haku? He nakai ono ke he gahua fakamatala ko e matafekau noa ni, kua amaamanaki nakai au ke talahau e tala mitaki ke he tau tagata tokologa? Kua manamanatu nakai au he liogi ma e tau tutuaga fakatagata haku? Kua fakagahua nakai e au e tau puhala kehekehe oti kua tutupu he matakavi ha mautolu, tuga e fakamatala he gutuhala ke he taha gutuhala, ke he puhala tu, tau matakavi gahua, he telefoni, mo e gahua katoatoa?’
4 Fakalataha Amaamanaki ia Aperila: Ko e magaaho mitaki e mahina a Aperila ke fakalahi e fakalataha fakatagata ha tautolu ke he gahua fakamatala. Ko e to hifo he tula kua lata ke fakaata e tokologa ke paionia fakaku. Liga to fakaata he tau tutuaga hau a koe ke gahua paionia fakaku ia Aperila mo Me. Po ke liga to maeke ia koe ke hu he paionia tumau, ha ko e hikiaga he fakatokaaga he tula. Kaeke ko e tagata fakailoa he fakapotopotoaga a koe, to fakaata fakalahi nakai e koe e tula nakai fa mahani ke he fekafekauaga he mahina nei mo e mahina ka hau, he lagomatai a lautolu kua maeke ke paionia? To fakafiafia he mena ia e loto a Iehova!
5 Kua lata e tau tagata fakailoa oti he Kautu ke fakatumau ke fakakite e amaamanaki he hokotia atu ke he gahua fakamatala, tuga a Paulo. He foaki katoa e mena kua maeke ia tautolu ke he fekafekauaga to ta mai ki a tautolu e olioli moli. Kua pihia e olioli ha Paulo ke he fekafekauaga tapu hana. Kua mitaki ma tautolu ke muitua ke he fakafifitakiaga mitaki ue atu hana.—Roma 11:13; 1 Kori. 4:16.