Tau Tala he Kautu Nu. 38 ke Tufa ia Novema!
1. Ko e heigoa e tau hūhū he tau tagata hagaao ki a lautolu ne mamate, mo e to tali fēfē ai ia Novema?
1 Ko e mate ko e fī he tau tagata oti kana, pete ni he kehekehe e tau taofiaga ha lautolu. (1 Kori. 15:26) Tokologa ne manamanatu ko fe a lautolu ne mamate mo e to liu nakai ke kitia a lautolu ia. Ko e mena ia, to taute he tau fakapotopotoaga he lalolagi katoa e matagahua ke taha e mahina ka tufa e Tau Tala he Kautu Nu. 38, ne fakamataulu Maeke Mooli Kia a Lautolu ne Mamate ke Liu Momoui? Ko e matagahua pauaki nei to kamata ia Novema 1. Ka oti e tufa pauaki nei, ko e Tau Tala he Kautu Nu. 38 to fakaaoga ai he gahua he fonua ko e tuleke.
2. Puhala fe ne tohia ai e Tau Tala he Kautu Nu. 38?
2 Puhala ne Tohia Ai: Ko e puhala ne talaga aki e Tau Tala he Kautu Nu. 38 kua taute ai ke pepelu fakaloa ke maeke e vala i mua ke fakakite e mataulu omoomoi lahi mo e tau kupu “Ti pehē kia a koe . . . ē? nakai? liga?” Ka veveu he tagata totou e Tau Tala he kautu, to kitia e ia e talahauaga he Tohi Tapu he tali ke he hūhū he mataulu mo e ko e heigoa e kakano he maveheaga he Tohi Tapu ma haana. To kitia foki e ia e tau kakano ati maeke a ia ke talitonu ke he Tohi Tapu. Haia he lau i tua he Tau Tala he Kautu e hūhū atihake ma haana ke manamanatu ki ai mo e uiina a ia ke fakaako atu foki.
3. Puhala fe ke tufa aki e Tau Tala he Kautu Nu. 38?
3 Puhala ke Tufa Ai: Ko e matagahua nei to tatai ni mo e tau matagahua ke tufa e tau uiina Fakamanatu mo e fonoaga faahimotu. To talahau he tau motua e tau puhala ke gahua aki e fonua he fakapotopotoaga, mo e ke lautatai mo e tohi ne moua e lautolu ia Aperila 1, 2013. Ko e tau fakapotopotoaga ne tote e fonua kua maeke ke lagomatai e tau fakapotopotoaga ne tata mai ne lahi e fonua. Ka fano a koe ke moua e haau a Tau Tala he Kautu Nu. 38, manatu ke uta fakalata ni mo fakaaoga a koe he taha e faahi tapu. He mogo ka tufa ai, kua maeke ke tufa ke he toloaga tagata kaeke kua oti e tau fale he fonua ha mutolu he taute. Ka oti tuai e tau lagaki he tufa ato oti e mahina, kua lata mogoia ke fakaaoga e tau tohi foaki ne fakatoka ki ai. He Aho Faiumu fakamua, to hagaaki a tautolu ke taute e matagahua pauaki ka e nakai ke kamata e tau fakaako Tohi Tapu. He tau matahiku faahi tapu, kua lata foki ia tautolu ke foaki e tau mekasini ka hagahaga mitaki. Kua taute nakai e koe e tau fakatokatokaaga ke fakalataha katoatoa ke he matagahua pauaki nei?