Ka Fai Fua Mai Ai, Kia Fakaaoga A!
1 Kua fakatumau e Ha Tautolu a Fekafekauaga he Kautu ke foaki mai ki a tautolu e tau fakafeleveiaaga kehekehe ke fakaaoga he fekafekauaga. Kua tuku mai ai ki a tautolu e tau manatu fou ke taute e fiafia ke he matafekau he Kautu. Kua liga lalilali a koe he tau mahina takitaha ke ako taha po ke fiha he tau fakafeleveiaaga nei. Ka e, liga to mailoga he falu he tau tagata fakailoa ka fai magaaho he fakaaoga e lautolu taha i ai, kua foaki foki he taha fufuta he Ha Tautolu a Fekafekauaga he Kautu e tau fakafeleveiaaga fou. Kitia maali ai, liga kua nakai maeke he tau tagata oti ke ako e fakafeleveiaaga fou ato iloa mitaki e mena fakamua.
2 Moli, kua ha ha ai e tau afe he tau paionia mo e falu he tau tagata fakailoa ne lahi e magaaho ne fakamole ke he fekafekauaga he fonua. Mua atu, kua loga e tau fakapotopotoaga ne gahua katoa e matakavi ha lautolu he tau fahi tapu gahoa oti. Ha ko e tau tutuaga nei, kua loto lahi e tau tagata fakailoa ke he tau puhala mo e tau manatu fou ke fakafeleveia aki e matafekau. Kua lagomatai he mena nei a lautolu ke fakatolomaki ha lautolu a iloilo. Kua taute ai foki ha lautolu a fekafekauaga ke fulufuluola mo e fua loga mo e lagomatai a lautolu ke feleveia mo e tau paleko ne fehagai mai.
3 Ke he ha mena ni, kaeke ke tauteute e koe e fakafeleveiaaga ne kua mitaki lahi he feaki hake e fiafia, kia fakatumau ke fakaaoga ai! Kua nakai lata ke fakaoti e fakaaoga he fakafeleveiaaga mitaki ne kua fai fua mai ai. Ka kia foaki e tohi ma e mahina ia. He moua e koe e tau fakalataaga ne foaki mai he Ha Tautolu a Fekafekauaga he Kautu, kia kumi e tau manatu kua lata ne manako a koe ke lafi ke he hau a fakafeleveiaaga.
4 Ti he magaaho ka moua e koe e fufuta fou he Ha Tautolu a Fekafekauaga he Kautu, kia manatu ko e tau fakafeleveiaaga i loto ko e tau fakalataaga ni a ia. Kaeke ke fakaaoga e koe, mitaki a ia. Ka e kaeke kua fita he fai fakafeleveiaaga a koe ne fai lauiaaga he hau a matakavi, kia fakaaoga ai! Ko e mena ne mua ko e “fakakatoatoa ni hāu a feua” he puhala mitaki, he kumi e tau tagata kua lata mo e lagomatai a lautolu ke eke mo tau tutaki.—2 Timo. 4:5.