Foaki e Tau Mekasini ne Talahau e Kupu Mooli
1. Ko e heigoa e aoga he Ko e Kolo Toko mo e Awake!?
1 Ko e Kolo Toko Fakapuloaaga he Kautu a Iehova fakalataha mo e mekasini Awake! kua fakatumau ke eke mo matapatu he fakamatala he Kautu mo e gahua taute tutaki. (Mata. 24:14; 28:19, 20) Kua fiafia lahi a tautolu ke foaki tumau e tau senolo ua nei he fakalataha a tautolu ke he tau vala kehekehe he fekafekauaga he Kautu.
2. Ko e heigoa e tau hikiaga ne kua kitia ke he Ko e Kolo Toko mo e Awake!, ti ko e ha?
2 He tau tau loga kua kitia e tautolu e tau hikiaga he lahi mo e tau vala tala he tau mekasini ti pihia ke he tau puhala ne fakaaoga e tautolu ke foaki aki. Kua taute e tau hikiaga nei he foli ke mua atu e futiaki mo e lauia mitaki he tau mekasini, ke hoko e fekau he Kautu ke he tau loto he ‘tau tagata oti kana, ke liga fakamomoui mo e hokotia a lautolu ke he iloilo tonu he kupu mooli.’—1 Timo. 2:4.
3. To fakaaoga fēfē mogoia e tau mekasini he fekafekauaga?
3 Tali mai ia Ianuari 2006, kua mahani a tautolu he fakaaoga e tau fakataitaiaga ma e taha e fufuta Awake! he mahina. Mogonei to pihia foki e onoonoaga ha tautolu he foaki e fufuta ma e fonua ne kuata he Ko e Kolo Toko Fakapuloaaga he Kautu a Iehova he fekafekauaga ha tautolu. Ko e tau feleveia fakataitai ma e tau mekasini takitaha kua tohi he lau fakahiku he Ha Tautolu a Fekafekauaga he Kautu. Ne fa mahani ke fakamaama ai e vala tala fakamua he mekasini, ka ke he falu magaaho ne fakamaama e falu vala tala ne futiaki lahi. Ko e tau fakataitaiaga ne tohi i ai to lauia mitaki ka iloa mooli e tautolu e vala tala ti talahau ai ke he tau kupu ni ha tautolu he hikihiki e fakataitaiaga ke felauaki mo e fonua.
4. Ko e ha kua liga aoga foki ke fakaaoga falu fakataitaiaga ne nakai mai he tau fakataitaiaga i loto he Ha Tautolu a Fekafekauaga he Kautu?
4 Pete kua ua e manatu ne putoia he Ha Tautolu a Fekafekauaga he Kautu ma e tau mekasini takitaha, kia atāina ke fakaaoga e fakataitaiaga ne kehe mai ai. Taha kakano he taute pihia ha kua liga futiaki lahi e taha vala tala foki ke he fonua haau. Po ke manatu hifo a koe liga to lauia mitaki e fakataitaiaga ni haau he fakaaoga e vala tala ne fiafia lahi a koe ki ai.
5. Fakamua to tauteute e fakataitaiaga ma e mekasini ka fakakite, ko e heigoa kua lata ke taute e koe?
5 Puhala ke Tauteute e Fakataitaiaga Haau: Fakamua, kua lata ia koe ke iloa katoa e vala tala ne fifili e koe ke fakakite he fonua. Liga to nakai maeke tumau ia koe ke totou fakamua e tau vala tala oti i loto he mekasini to foaki ai he fekafekauaga he fonua. Pete ia, lata ia koe ke fakatātā e makutu mo e fakamooli he hagaao ke he tau vala tala ne fifili e koe ke fakakite. Kua maeke ni ia koe ke taute pihia ka iloa mitaki e vala tala he mekasini ka foaki.
6. Maeke fēfē ke tauteute ne tautolu ha tautolu a tau fakataitaiaga?
6 Taha mena foki, kia hikihiki fano po ke fakakehekehe, he tauteute e tau kupu fakafeleveia haau. Liga lata ke fakaaoga e hūhū fakalagalaga ne hagaao ke he vala tala ka kamata aki e fakatutalaaga. Falanaki tumau ke he malolō he Kupu he Atua ke aamotia e loto. (Hepe. 4:12) Fifili e kupu tohi kua latatonu ne hagaao ke he matakupu fakafeleveia haau, liga ko e kupu tohi ne tū ai po kua fatiaki i loto he vala tala hane fakakite e koe. Manamanatu ke he puhala ke matutaki e kupu tohi mo e vala tala.
7. Liga fakaholo ki mua fēfē e tautolu e tau fakataitaiaga ha tautolu?
7 He Tau Magaaho Oti: Kua lata ni ke fakaaoga e fakataitaiaga nukua lauia mitaki mooli. Fakalataha mo e fakapotopotoaga he Aho Faiumu ke fakamatala puhala he tau mekasini. Foaki e tau mekasini ke he tau tagata ne fitā e talia e falu tohi. Foaki tumau e tau mekasini ke he tau tagata fakaako Tohi Tapu haau mo e ke he falu tagata ka liga ha ha ai he magaaho ka liu aahi atu. Liga maeke ia koe ke toka hifo e tau mekasini mo lautolu ne tutala mo koe he fano a koe ke fakatau, he fano fenoga, po ke he fakatali he ofisa he toketā. Ti fakaholo ki mua e tau fakataitaiaga haau he fakaaoga ai e koe he mahina katoa.
8. Ko e tau puhala fe he Ko e Kolo Toko mo e Awake! ne kehe ue atu ai?
8 Ko e Kolo Toko mo e Awake! ko e tau mekasini kehe ue atu. Kua fakatokoluga ai a Iehova ko e Pule Katoatoa he lagi mo e lalolagi. (Gahua 4:24) Ne fakamafanatia e tau tagata puhala he tala mitaki he Kautu he Atua mo e fakamalolō e tua ki a Iesu Keriso. (Mata. 24:14; Gahua 10:43) Lafi atu, ne mataala tumau ai ke he tau mena tutupu he lalolagi he fakamooli he tau mena nei e tau perofetaaga he Tohi Tapu. (Mata. 25:13) Kia lagomatai e tau tagata takitokotaha he fonua haau ke aoga mai he tau senolo nei he tauteute ke foaki ai he tau magaaho oti kua latatonu!
9. Fakatoka fēfē e tautolu e fakavēaga ma e liu aahi atu?
9 Ka kautū a koe he foaki e mekasini, po ke ka fakatutala fakakapitiga a koe ke he tau mena fakaagaaga mo e taha tagata, kia mautali ke fai hūhū po ke talahau taha mena fakalagalaga manatu ke maeke ke liu aahi atu mo e liu fakatutala ke he tau mena fakaagaaga. Kaeke kua makutu a tautolu he tō e tau tega he kupu mooli, kua mauokafua a tautolu to hafagi e Iehova e tau loto ha lautolu ne manako mooli ke iloa mo e fekafekau ki a Ia.—1 Kori. 3:6.