Fakapuloa he Tau Mekasini e Kautu
1 Ko e Tau Fakamoli a Iehova, kua talahaua a tautolu ha ko e fakamatala fakamakai ha tautolu hagaao ke he Kautu he Atua. Kua malolo lahi e matagahua he tau mekasini Ko e Kolo Toko mo e Awake! kua tufatufa e tautolu he lagomatai e tau tagata miliona ke ako ke he finagalo he Atua. Ko e fekau i loto kua moli ni ko e tala mitaki, ha kua fakapuloa ai e Kautu he Atua he lagi ko e amaamanakiaga naia ma e tau tagata.
2 Kua fehagai e tau mekasini mo e tau manako moli he tau tagata—logonaaga, fakalatahaaga, mo e fakaagaaga. Ha kua malolo hifo e uho he tau mahani mo e magafaoa, kua lagomatai he Ko e Kolo Toko mo e Awake! e tau tagata ke holo ki mua e aoga he tau momoui ha lautolu he fakakite age ki a lautolu e puhala ke fakaaoga e tau matapatu fakaakoaga Tohi Tapu. Ko e ha tautolu a fiafia ke foaki e tau makasini ia Aperila mo Me.
3 Kua Futiaki Moli a Lautolu: Kua moua ai e Ko e Kolo Toko mo e Awake! ke he tau vagahau kua teitei oti ke he puke tagata he lalolagi. Ha ko e mena nei, kua talahua lahi e tau mekasini ha tautolu. Hanei falu kakano kua futiaki ki ai e tau tagata:
◼ Ko e tau senolo he mahani fakamoli mo e kupu moli, kua fakakite maaliali e kehekehe he mitaki mo e kelea.
◼ Kua foaki ai e amaamanakiaga ke hoko mai e parataiso tututonu, fakave ke he maveheaga he Atua ke ta mai e lalolagi ke he pule he Kautu hana.
◼ Kua fakakite mai ai e tau mataulu tala kehekehe kua lautonu mogonei, ke futiaki e tau tagata he tau tupumaiaga mo e tau aga fakamotu oti.
◼ Ko e tau vala tala kua lautonu, fakaako, moli, mo e tokanoa mai he fili tagata mo e fakahui.
◼ Ko e tau fakataitaiaga fulufuluola kua fakatupu e fiafia mafiti, mo e puhala kua tohi aki kua taute e tau mekasini ke mukamuka ke totou.
4 Laulahi Atu Ai e Tufatufa: Ko e tufatufaaga hufia mitaki he tau mekasini kua lago lahi ke he fakalotomatala ha tautolu he tauteute e tau fakatataaga ha tautolu, setulu e magaaho ha tautolu, mo e fakatokatoka e gahua fakamatala ha tautolu. Ko e tau lagomataiaga ne foaki mai he tau fufuta he Our Kingdom Ministry ia Aperila 1996 mo e Oketopa 1996 kua mitaki ke liu fakamanatu mo e fakaaoga.
5 Fakamahani a Koe mo e Tau Mekasini: He totou e koe e tau fufuta takitaha, manamanatu ki a ia ka fakaaue ke he lagaki. Kumi e tau matapatu manatu po ke tau kupu tohi ka fatiaki e koe he fakatataaga hau. Manamanatu ke he huhu ka huhu e koe ke kamata e fakatutalaaga mo e fakaohooho e fiafia ke he matakupu.
6 Hikihiki e Fakatataaga ke he Tagata: Tauteute e fakatataaga mukamuka mo e molulu ke maeke ke hikihiki ma e tagata tane, fifine, tagata motua, po ke fuata, ko e kapitiga po ke tagata kehe.
7 Tokamata Tumau ke Foaki e Kolo Toko mo e Awake!: Ha kua hao e tau mekasini i loto he kato tau lima, po ke pokete, maeke ia tautolu ke uta e tau lagaki mo tautolu ka o fenoga po ke fakatau. Foaki ka tutala ke he tau magafaoa, tau katofia, tau tagata gahua auloa, tau kapitiga aoga, po ke tau faiaoga. Fakatoka pauaki e aho he fahitapu ma e gahua mekasini.
8 Fakakite e Fakaaueaga ma e Tau Mekasini: Nakai galo e kakano uho i loto. Kua nakai fakatote he leva he magaaho e aoga he fekau kua toka i loto. Moli, ka taute e tautolu e laliaga pauaki ke foaki oti e tau mekasini ha tautolu, ua fakaputu e tau mekasini tuai he tau fatatohi.
9 Lauia Mitaki e Fakamatala he Puhala Tu: Ko e taha a puhala anei kua mua atu ke foaki e tau mekasini ke he tau tagata tokologa. Kua gahua e falu tagata fakailoa ke he tau puhala tu lavelave he tau magaaho okioki fakaku he tau aho fakatau.
10 Fua Loga e Matakavi Pisinisi: He fakamatala he taha fale koloa ke he taha fale koloa, gahoa e nakai fai tagata ha tautolu he tau kaina. Tokologa e tau tagata pisinisi kua fai mahani, ti tokologa kua talia fiafia e tau mekasini. Fakakite e tau vala tala kua lata tonu ma e pisinisi pauaki ia.
11 Lata Lahi e Hala Mekasini Tumau: Ha kua lomi fakailoa e tau mekasini lagaua he mahina, kua lata tonu ni ke liu ahi atu ke he tau tagata ne totou ai mo e fakakite age e tau fufuta ka mui mai. Kua lata ke liu ahi atu tumau a tautolu, nakai ni ke uta he tau mekasini ka e fakatupu foki e fiafia he tagata ke he Tohi Tapu. Ko e hala mekasini tumau ko e punaaga mitaki ue atu a ia ma e tau fakaakoaga Tohi Tapu.
12 Fakaaoga Fakamitaki a Aperila mo Me: Kua moua he Ko e Kolo Toko mo e Awake! e mauokafua he tau tagata totou miliona loto fakaaue. Kua hufia mitaki ai he fakapuloa e Kautu ti kua lata ia tautolu ke uta ai mo tautolu mo e foaki ai ke he tau magaaho oti. Kia taute e tau mahina a Aperila mo Me mo fakamoli ko e tau mahina mua ue atu ma e tufatufaaga he tau mekasini!