Ko e Agaga Ha Iehova Mo Tautolu
1 Ha ko e Tau Fakamoli a Iehova, ha ha ia tautolu e gahua kotofa mua ue atu. Ne pehe a Iesu: “To fakamatala fakamua foki e vagahau mitaki ke he tau motu oti kana ke lata ai.” (Mareko 13:10) Mai he onoonoaga fakatagata, to tuga kua hagahaga uka e mena nei, ka e nakai pihia. Fai malolo lahi mua ue atu a tautolu he lalolagi mo e lagi katoa ke lagomatai hake a tautolu—ko e agaga he Atua.—Mata. 19:26.
2 Fakamoliaga he Senetenari Fakamua: He fakagahua e perofetaaga a Isaia ki a ia, ne pehe a Iesu: “Ha ha i luga ia au e Agaga he Iki . . . ke fakamatala e vagahau mitaki.” (Luka 4:17, 18) Ato hake a ia ke he lagi, ne tala age a ia ke he tau aposetolo hana ko e to moua e lautolu e malolo he agaga tapu ke fakamatala “ke hoko ni ke he fakaotiaga he lalolagi.” He magaaho fakamui, ne hataki he agaga tapu a Filipo ke fakamatala ke he fekafekau ne mua i Aitiope, ko e agaga ne fekau atu a Peteru ke he takitaki tokoteau Roma, ti fakafano atu a Paulo mo Panapa ke fakamatala ke he tau Motu Kehe. Ko hai ne manatu to talia he tau tagata pihia ne tupu mai he tau tuaga ia e kupu moli? Ka e talia e lautolu.—Gahua 1:8; 8:29-38; 10:19, 20, 44-48; 13:2-4, 46-48.
3 Fakamoliaga he Vaha Fou Nei: Kua peehi he tohi a Fakakiteaga e putoiaaga he agaga tapu he gahua fakamatala he vaha nei he talahau ai: “Kua pehe mai foki e Agaga mo e kitofaitane, Ati hau ā; . . . katoa foki mo ia kua manako ki ai, kia uta noa e ia e vai he moui.” (Fakakite. 22:17) Ne omoomoi he agaga e vahega kitofaitane a Keriso mo e tau hoa “mamoe kehe” ha lautolu ke fakamatala e tala mitaki ke he tau tagata oti. (Ioane 10:16) Kua lata ke fakamalolo a tautolu ke he fakamatala ha tautolu, aua neke fakauaua ke tutala ke he tau tagata oti, kia mauokafua to lagomatai he agaga he Atua a tautolu. Kua foaki mai he 1988 Yearbook e fakamoliaga omoomoi kua fakatumau e agaga he Atua mo e tau fekafekau hana. Kitia la e fua! He ua e tau he fekafekauaga kua mole, ne avelesi ke molea e 1,000 ne papatiso he tau aho takitaha.
4 Falanaki to fakatumau e agaga he Atua mo tautolu he fakamatala atu e fekau he Kautu ne kua fioia ai e Iehova. Kia fakamalolo mo e fakaohooho he iloilo nei a tautolu ke fakatumau a tautolu ke eketaha fakamalolo ke he gahua aoga lahi he Kautu.—1 Timo. 4:10.