Mahani ke Lata mo e Agaga mo e Moui Fakatatau ke he Tukuleleaga Haau
“Kia mahani a mutolu ke lata mo e [a]gaga, ti nakai eke ai e mutolu e tau manako lahi he tino.”—KALA. 5:16.
1. Ko e heigoa e tau papatisoaga ne hoko he aho Penetekoso?
KO E mogo ne vagahau e tau tutaki ha Iesu ke he tau vagahau kehekehe he Penetekoso 33 V.N., nukua fitā a lautolu he papatiso ke he agaga tapu. Ne fakakite e lautolu e mena fakaalofa kehe ue atu he agaga. (1 Kori. 12:4-10) Ko e heigoa e lauiaaga he mena fakaalofa nei mo e lauga ne foaki he aposetolo ko Peteru? Tokologa ne “hukia ai ha lautolu a tau loto.” Ha ko e fakaohooho a Peteru, ati tokihala mo e papatiso a lautolu. Ne pehē e fakamauaga tuai: “Ati papatiso ai a lautolu ne talia hana kupu mo e fiafia; ko e aho foki ia kua lafi ai po ke tolu e afe tagata.” (Gahua 2:22, 36-41) Tuga ne fakaako e Iesu, to papatiso a lautolu he vai ke he higoa he Matua, Tama, mo e agaga tapu.—Mata. 28:19.
2, 3. (a) Fakamaama e kehekehe he papatiso he agaga tapu mo e papatiso ke he higoa he agaga tapu. (e) Ko e ha kua amanaki ki a lautolu oti ne eke mo tau Kerisiano mooli he vahā nei ke papatiso he vai?
2 Pete ia, kua fai kehe kia e papatiso he agaga tapu mo e papatiso ke he higoa he agaga tapu? E. Ko lautolu ne papatiso he agaga tapu kua liu foki fanau ko e tau tama he Atua ne fakauku he agaga. (Ioane 3:3) Kua fakauku a lautolu mo tau patuiki mo e tau ekepoa lagomatai anoiha ke he Kautu he Atua he lagi, ti ko e vala a lautolu he tino fakaagaaga he Keriso. (1 Kori. 12:13; Kala. 3:27; Fakakite. 20:6) Ti ko e papatisoaga nei—ne papatiso he agaga tapu—ne taute e Iehova he aho Penetekoso mo e magaaho fakamui, he fifili e ia e tau tagata takitokotaha ke eke mo tau hakeaga fakalataha mo e Keriso. (Roma 8:15-17) Ka e kua e papatiso he vai ke he higoa he agaga tapu, ko e mena taute tumau he tau toloaga mo e tau fonoaga he tau tagata ha Iehova he vahā ha tautolu?
3 Ko e papatiso he vai ko e lakaaga ne taute he tau Kerisiano mooli ke fakamailoga ha lautolu a tukulele katoatoa ki a Iehova ko e Atua. Taute pihia e lautolu ne moua e uiaga ke he lagi. Ka ko e papatiso he vai ko e lakaaga kua latatonu foki ma e toko miliona he tau tagata taane mo e tau fifine he vahā nei ko lautolu kua moua e amaamanakiaga mogonei he moui tukulagi ke he lalolagi. Pete ne amaamanakiaga he tagata, ko e papatiso he vai ke he higoa he Matua, mo e Tama, mo e agaga tapu ko e lakaaga kua latatonu mooli ke taute he tagata ke talia ke he Atua. Ko e tau Kerisiano oti ne papatiso kua amanaki ki ai ke ‘mahani ke lata mo e agaga.’ (Totou Kalatia 5:16.) Kua mahani nakai a koe ke lata mo e agaga ti moui fakatatau ke he tukuleleaga haau?
Kakano he ‘Mahani ke Lata mo e Agaga’
4. Ko e heigoa e matapatu kakano he ‘mahani ke lata mo e agaga’?
4 ‘Kia mahani ke lata mo e agaga’ kua putoia e talia he gahuahua he agaga tapu ki luga haau, he fakaatā e agaga tapu ke fakaohooho a koe. Liga pehē a koe, kua kakano ai ke omoomoi he agaga tapu e tau matagahua haau he tau aho takitaha. Ne fakakite he Kalatia veveheaga 5 e kehekehe he fakaohooho he agaga tapu mo e fakaohooho he tino.—Totou Kalatia 5:17, 18.
5. He haia ke he fakaohoohoaga he agaga tapu kua putoia e fakamamao mai he tau gahua fe?
5 Ka haia a koe he fakaohoohoaga he agaga tapu, lali a koe ke fakamamao mai he tau gahua he tino. Putoia ai ke he tau mena ia e ‘faivao, feuaki, mahani kelea, matahavala, hufeilo ke he tupua, eke lagatau he taulaatua, feitaaki, taufetoko, ita tafuā, vale, lagalagahou, feveheveheaki, tau veveheaga, mahekeheke, keli tagata, konahia, tafeauhi.’ (Kala. 5:19-21) Kakano, kua ‘kelipopo e koe e tau mahani he tino ke he agaga.’ (Roma 8:5, 13) To lagomatai ai ke tokaloto e koe e tau mena he agaga mo e kaufakalataha ke he tau takitakiaga, ka e nakai mahala a koe ke pule he tau manako he tino.
6. Fakatai e mena kua latatonu ke maeke ke fakakite e fua he agaga.
6 He gahuahua e agaga tapu ia koe, kua fakakite e koe e tau mahani Atua, “ko e fua he [a]gaga.” (Kala. 5:22, 23) Ka e mailoga e koe, kua lata e mena nei ke lali ki ai a koe. Ke fakatai: Ne taute he tagata gahua fonua e kelekele. Mooli, kua latatonu e laā mo e vai; ka noa mo e tau mena ia to nakai amanaki a ia ke fai fua ka helehele mai ai. Liga fakatatai e tautolu e agaga tapu ke he laā. Kua lata ai ke moua e tautolu e agaga tapu ke fakakite e fua he agaga. Ka ko e heigoa ka fua mai ka nakai gahua malolō e tagata gahua fonua? (Fakatai 10:4) E, ko e puhala ne taute aki e koe e kelekele he loto haau ka fakakite e mitaki mo e lahi he fua he agaga tapu ia koe. Ti hūhū ki a koe ni, ‘Kua fakaatā nakai e au e agaga tapu ke fakatupu e fua ia ia au he gahua fakalataha ai?’
7. Ko e ha kua aoga lahi e fakaako mo e manamanatu fakahokulo ka manako a koe ke feaki e fua he agaga tapu?
7 Ke moua e heleheleaga mitaki, lata he tau tagata gahua fonua ke fakamalū e tau fua he fonua ha lautolu. Ke maeke ke feaki e fua he agaga, kua lata ia koe ke moua e tau vai he kupu mooli ne moua i loto he Tohi Tapu mo e kua fakatoka mai he fakapotopotoaga Kerisiano he vahā nei. (Isaia 55:1) Liga kua talahau e koe ke he tau tagata tokologa ko e tau Tohiaga Tapu ko e punaaga he agaga tapu. (2 Timo. 3:16) Foaki mai foki he vahega fekafekau fakamoli mo e loto matala e maamaaga kua lata lahi he tau vai tavana he kupu mooli he Tohi Tapu. (Mata. 24:45-47) Kua maama e fakagahuaaga. Ke haia he fakaohoohoaga he agaga tapu, kua latatonu ia tautolu ke totou mo e manamanatu fakahokulo ke he Kupu he Atua. Ka taute e koe e mena ia, kua muitua a koe ke he tau fifitakiaga mitaki he tau perofeta ne “hūhū ki ai mo e kumi fakamakutu ai” ke he tau fakailoaaga ne ha ha ai. Mailoga na fakakite foki he tau agelu e fiafia lahi mahaki ke he tau kupu mooli fakaagaaga hagaao ke he Tega ne mavehe mo e fakapotopotoaga Kerisiano ne fakauku.—Totou 1 Peteru 1:10-12.
Fakaohooho Fēfē he Agaga?
8. Ko e ha kua aoga ke ole a koe ki a Iehova ma e agaga haana?
8 Nakai ni ko e fakaako he tau Tohiaga Tapu mo e manamanatu fakahokulo. Kua lata ia koe ke ole tumau ma e lagomatai mo e takitakiaga a Iehova. Maeke a ia “ke eke e tau mena oti kua mua ke he tau mena ke ole atu, po ke manamanatu ai a tautolu.” (Efeso 3:20; Luka 11:13) Ka e tali atu fēfē a koe ka hūhū taha tagata, “Ko e ha kua lata ia au ke fakatumau ke ole ane mai kua fitā he iloa he Atua e ‘tau mena kua nofogati ai au ka e nakaila ole atu au ki a ia’?” (Mata. 6:8) Taha mena, ko e liogi ma e agaga tapu, kua fakakite e koe kua falanaki a koe ki a Iehova. Ma e fakatai, ka finatu taha tagata ki a koe ke ole lagomatai, to taute e koe e tau mena oti kua maeke ia koe ke lagomatai a ia, taha kakano ne ole a ia ki a koe ke lagomatai a ia, kua fakakite e mauokafua ki a koe. (Fakatatai Tau Fakatai 3:27.) Pihia foki, kua fiafia a Iehova ka ole a koe ki a ia ma e agaga tapu haana, mo e to foaki atu e ia ki a koe.—Fakatai 15:8.
9. Maeke fēfē he fakalataha ke he tau feleveiaaga Kerisiano ke lagomatai a koe ke haia he fakaohoohoaga he agaga he Atua?
9 Maeke ia koe ke loto fakaaue lahi ko e taha puhala ke haia he fakaohoohoaga he agaga he Atua kua putoia e tau feleveiaaga, tau toloaga, mo e tau fonoaga ha tautolu. Aoga lahi he eketaha ke fakalataha atu ki ai mo e fanogonogo ke he fakaholoaga. He taute pihia ka lagomatai a koe ke maama e “tau mena hokulo ia he Atua.” (1 Kori. 2:10) Ha ha i ai foki e tau aoga he fakatumau ke tali. Liu manamanatu ke he tau feleveiaaga ne fina atu a koe he fa e faahi tapu kua mole. Lagafiha e hiki e lima haau ke tali, he fakakite e tua haau? Kitia nakai e koe e mena kua lata ke holo ki mua he vala nei? Ka kitia e koe, fifili e mena haau ka taute he tau faahi tapu i mua. To kitia e Iehova e fakamakai haau ke tali mo e to foaki e agaga tapu haana, ka lagomatai a koe ke aoga lahi mai he tau feleveiaaga ne fano a koe ki ai.
10. He mahani ke he agaga kua putoia e fakalaulahi he uiina fe ke he falu?
10 He mahani ke lata mo e agaga kua putoia e talia e uiina ne totou e tautolu ia Fakakiteaga 22:17: “Kua pehe mai foki e [a]gaga mo e kitofaitane, Ati hau ā; kia pehe atu foki a ia kua fanogonogo, Ati hau ā; ko ia foki kua fia inu kia hau a ia, katoa foki mo ia kua manako ki ai, kia uta noa e ia e vai he moui.” Ko e agaga ne gahuahua puhala he vahega fakauku he kitofaitaane, kua fakalaulahi e uiina nei hagaao ke he vai he moui. Ka talia e koe e uiaga nei ke “hau ā” kua eketaha nakai a koe ke talahau, “Hau ā”? Ko e lilifu mooli ke maeke ke fakalataha ke he gahua laveaki moui nei!
11, 12. Putoia fēfē e agaga tapu ke he gahua fakamatala?
11 Ko e gahua aoga nei hane taute mogonei he takitakiaga he agaga tapu. Kua totou e tautolu e puhala ne putoia e agaga tapu ke he senetenari fakamua he hafagi e tau fonua foou ma e tau misionare. Ko e aposetolo ko Paulo mo e tau hoa gahua haana “kua hataki he [a]gaga [t]apu, ua talahau atu e kupu i Asia”; ti nakai fakaatā foki a lautolu ke o atu ki Pitunia. Nakai iloa mitaki e tautolu e puhala ne taofi he agaga a lautolu neke o atu ke he tau matakavi nei, ka kua maaliali ai ko e agaga ne takitaki a Paulo ke he fonua lahi mahaki ha Europa. Ne moua e ia e fakakiteaga he tagata Maketonia ne ole fakamakamaka ma e lagomatai.—Gahua 16:6-10.
12 He vahā nei, kua takitaki foki he agaga a Iehova e fakamatala he lalolagi katoa. Nakai fai fakakiteaga kehe lahi kua fakaaoga ke foaki e takitakiaga; ka ko e agaga tapu kua takitaki ai e Iehova a lautolu ne fakauku. Ti omoomoi he agaga e tau matakainaga ke taute e tau mena oti kua maeke ia lautolu he fakamatala mo e fakaako atu. Nakai fakauaua kua fakalataha foki a koe ke he gahua aoga lahi nei. Maeke nakai a koe ke fakaholo ki mua e olioli haau ke he gahua fakalagalaga nei?
13. Maeke fēfē ia koe ke muitua ke he takitakiaga he agaga tapu? Fakamaama.
13 Maeke ia koe ke muitua ke he takitakiaga he agaga tapu he fakagahua e tau vala tala ne foaki ma e tau tagata he Atua. Manamanatu ke he fuata fifine ko Mihoko mai i Sapanī. Ha ko e paionia foou, ne logona hifo e ia e fakauaua ke taute e tau liu aahi atu; ne logona hifo e ia kua nakai iloa e ia e puhala ke futiaki mai e fiafia he tagata he fale. Ke he magaaho ia, ne foaki he Fekafekauaga he Kautu ha Tautolu e tau lagomataiaga ke taute aki e tau liu aahi atu fakakū. Ti taute fakailoa foki e porosua A Satisfying Life—How to Attain It. Kua aoga lahi mahaki ke he fonua Sapanī. Ne fakagahua e Mihoko e tau lagomataiaga ne foaki ke fakaaoga aki e porosua, mua atu ke he puhala ke taute e tau liu aahi atu fakakū. Nakai leva ne kamata a ia ke fakaako e Tohi Tapu mo lautolu ne liga nakai talia ke fakaako he magaaho fakamua. Pehē a ia, “loga lahi e tau fakaakoaga haaku—tokologa ke 12 he taha magaaho—ati ole au ke he falu ke fakatali!” Mooli, ka mahani a koe ke he agaga, he fakagahua e takitakiaga ne foaki ke he tau fekafekau a Iehova, maeke ia koe ke lahi e heleheleaga.
Falanaki ke he Agaga he Atua
14, 15. (a) Maeke fēfē he tau tagata nakai mitaki katoatoa ke moui fakatatau ke he tukuleleaga ha lautolu? (e) Maeke fēfē ia koe ke moua e tau kapitiga mitaki lahi mahaki?
14 Ha ko e fekafekau fakauku, ha ha ia koe e feua ke taute. (Roma 10:14) Liga logona hifo a koe kua nakaila lata katoatoa ke hahamo e tau matagahua ia. Ka e, tuga ne mena ne tupu ki a lautolu ne fakauku, ko e Atua ne kotofa a koe. (Totou 2 Korinito 3:5.) Maeke ia koe ke moui fakatatau ke he tukuleleaga haau he taute e tau mena oti kua maeke ia koe mo e falanaki ke he agaga he Atua.
15 Mooli, kua nakai mukamuka ma tautolu ko e tau tagata nakai mitaki katoatoa ke momoui fakatatau ke he ha tautolu a tukuleleaga ke he ha tautolu a Atua mitaki katoatoa, ko Iehova. Taha mena uka ko e falu ne fio fakamua mo koe kua liga ofomate ke he puhala foou he moui haau ti liga ‘vagahau kelea ai ki a koe.’ (1 Pete. 4:4) Ka kia nakai nimo na feaki e koe e tau tuaga kapitiga foou, ko laua ne mua atu e aoga ko Iehova mo Iesu Keriso. (Totou Iakopo 2:21-23.) Kua aoga lahi foki ke iloa e tau matakainaga he fakapotopotoaga haau, ko e vala he “tau matakainaga” he lalolagi katoa. (1 Pete. 2:17; Fakatai 17:17) To lagomatai e Iehova a koe puhala he agaga haana ke moua e tau kapitiga ka fakaohooho mitaki tumau ki a koe.
16. Ke tuga a Paulo, ko e ha a koe ne ‘fiafia ke he tau mena kua lolelole ai’?
16 Pete kua viko takai a koe he tau kapitiga lagomatai he fakapotopotoaga, liga uka agaia a koe ke fahia ke he tau paleko he tau aho takitaha. Ko e tau mena ne taufetului a koe ki ai he falu magaaho kua fakalolelole e logonaaga haau, ke tuga kua haia a koe he hala loa he tau lekua. Ko e magaaho tonu a ia ke haga atu a koe ki a Iehova ti ole ma e agaga tapu haana. “Ha ko e mena ka lolelole au,” he tohi he aposetolo ko Paulo, “ti malolo ai au.” (Totou 2 Korinito 4:7-10; 12:10.) Iloa e Paulo na maeke e agaga he Atua ke fakamalolō e tau tagata ka lolelole, pete ne tuaga he tau lolelole. Ati maeke he malolō gahuahua he Atua ke foaki e malolō ki a koe ka logona hifo e koe e lolelole mo e manako lagomatai. Ne tohi e Paulo na “fiafia ai [a ia] ke he tau mena kua lolelole ai.” Ko e magaaho ne lolelole a ia ne logona hifo e ia e agaga tapu ne gahuahua ia ia. Maeke ia koe ke moua foki e logonaaga ia!—Roma 15:13.
17. Maeke fēfē he agaga tapu ke lagomatai a koe ke hoko mitaki ke he mena ne fano ki ai?
17 Kua lata a tautolu mo e agaga he Atua ke maeke ke takitaki a tautolu ke he moui ne tukulele ki a ia. Manamanatu ko koe e ikivaka he toga taulā. Ko e foliaga haau ke fekafekau tukulagi ki a Iehova. Ko e agaga tapu kua tuga e matagi ne manako a koe ke moua ke takitaki a koe ke hoko mafola ke he matakavi ne fano ki ai. Kua nakai manako a koe ke havilia he agaga he lalolagi a Satani. (1 Kori. 2:12) Kua lata ia koe ke kitia mooli e matagi hako ti fano he hala ia. Ko e agaga tapu a ia. Puhala he Kupu he Atua mo e fakatokatokaaga haana ne takitaki he agaga, to omoi he agaga tapu a koe ke he puhala hako.
18. Ko e heigoa ka eketaha a koe ki ai mogonei, mo e ko e ha?
18 Kaeke kua fakaako a koe mo e Tau Fakamoli a Iehova, ti olioli e feoakiaga fakaagaaga mo lautolu, ka e nakaila taute e koe e tau lakaaga aoga lahi he tukulele mo e papatiso, hūhū hifo ki a koe, ‘Ko e ha ne fakamule ai au?’ Ka mailoga e koe e matagahua he agaga tapu he fakakatoatoa e finagalo ha Iehova he vahā nei mo e loto fakaaue ke he gahuahuaaga ia, ti taute e tau lakaaga ne iloa e koe kua hako. To fakamonuina lahi e Iehova a koe. To foaki fakamokoi e ia e agaga tapu haana ki a koe. Kaeke kua leva tuai e papatiso haau, kua moua mooli e koe e fakaohoohoaga he agaga tapu. Kua kitia mo e logona hifo e koe e puhala ne fakamalolō he Atua a koe aki e agaga haana. Maeke e mena ia ke tumau—e, ke hoko atu ke he vahā tukulagi anoiha. Kia eketaha ke mahani ke lata mo e agaga tapu.
Manatu Nakai e Koe?
• Ko e heigoa e kakano he ‘mahani ke lata mo e agaga’?
• Ko e heigoa ka lagomatai a koe ke ‘mahani ke lata mo e agaga’?
• Maeke fēfē ia koe ke moui fakatatau ke he tukuleleaga haau?
[Fakatino he lau 15]
He taute e kelekele he loto haau kua lata ke lali ki ai
[Tau Fakatino he lau 16, 17]
Fakaohooho nakai he agaga he Atua a koe?