‘Ke he Higoa he Agaga Tapu’
“Hanei, kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he . . . Agaga Tapu.”—MATAIO 28:19.
1. Ko e heigoa e fakailoaaga fou ne fakaaoga e Ioane Papatiso hagaao ke he agaga tapu?
HE TAU 29 he Vaha Nei ha tautolu, kua gahua lahi a Ioane Papatiso i Isaraela he tauteute e puhala ma e Mesia, mo e he magahala he hana fekafekau, ne fakailoa e ia e taha mena fou hagaao ke he agaga tapu. E moli, kua fita he iloa he tau Iutaia ko e heigoa e tau mena ne talahau he tau Tohiaga Tapu Heperu hagaao ke he agaga. Kua liga ne ofogia a lautolu, ka e, he magaaho ne pehe a Ioane: “Ko au ni kua papatiso atu e au a mutolu ke he vai kia tokihala; ka ko ia ka mui mai kia au, . . . ko ia haia ke papatiso a mutolu ke he Agaga Tapu mo e afi.” (Mataio 3:11) Ko e fakailoaaga fou e ‘papatiso ke he agaga tapu.’
2. Ko e heigoa e fakailoaaga fou kua putoia ai e agaga tapu ne fakailoa e Iesu?
2 Ko ia ka hau ko Iesu. He vaha he hana moui he lalolagi, ne nakai papatiso e Iesu a taha ke he agaga tapu, pete ni kua loga e tau magaaho kua vagahau a ia hagaao ke he agaga. Ko e taha mena foki, he mole mai hana liu tu mai, ne pehe a ia hagaao ke he agaga tapu ke he taha puhala fou foki. Ne tala age e ia ke he hana tau tutaki: “Hanei, kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga Tapu.” (Mataio 28:19) Ko e fakailoaaga “ke he higoa he” kua kakano “ke mailoga ai.” Ko e papatiso he vai ke he mailogaaga ke he Matua, ke he Tama, mo e ke he agaga tapu kua eke tuai ke kehe mai foki he papatisoaga ke he agaga tapu. Kua eke foki mo fakailoaga fou kua putoia ai e agaga tapu.
Ne Papatiso ke he Agaga Tapu
3, 4. (a) Ne taute he magaaho fe e papatisoaga fakamua ke he agaga tapu? (e) Ke kehe mai he papatisoaga a lautolu, fefe e tau gahua he agaga tapu ne taute ke he tau tutaki a Iesu i Penetekoso 33 V.N.?
3 Hagaao ke he papatisoaga ke he agaga tapu, ne mavehe a Iesu ke he hana tau tutaki ato haele hake a ia: “Ka ko mutolu, to papatiso a mutolu ke he Agaga Tapu, ka e nakai la mole e tau aho loga.” (Gahua 1:5, 8) He nakai leva he mole atu e mena ia, ne fakamoli ai e maveheaga ia. Ne haele hifo e agaga tapu ki luga he 120 he tau tutaki ne tolo ke he poko luga i Ierusalema he taute e Iesu, mai he lagi hana papatisoaga fakamua ke he agaga tapu. (Gahua 2:1-4, 33) Mo e heigoa e fua ne moua? Kua taute ai e tau tutaki mo taha vala he tino fakaagaga a Keriso. Tuga he fakamaama mai he aposetolo ko Paulo, “ha ko e mena tokotaha foki e Agaga kua papatiso ai a [lautolu] oti ke he tino taha.” (1 Korinito 12:13) Ka e he magaaho taha, ne fakauku ai a lautolu ke eke he vaha i mua mo tau patuiki mo e tau ekepoa he Kautu he Atua i luga he lagi. (Efeso 1:13, 14; 2 Timoteo 2:12; Fakakiteaga 20:6) Ne fakaaoga foki e agaga tapu tuga e fakamau fakamua mo e mena fakaalofa he tufaaga lilifu ue atu ia he vaha i mua, ka e nakai kuenaia.—2 Korinito 1:21, 22.
4 He tau tau gahoa he magaaho ku fakamua, ne pehe a Iesu ki a Nikotemo: “Ka nakai liu foki fanau e tagata, ti nakai maeke ke kitia e ia e kautu he Atua. . . . kaeke kua nakai fanau e tagata ke he vai mo e Agaga, ti nakai maeke ke hao a ia ke he kautu he Atua.” (Ioane 3:3, 5) He magaaho nei kua 120 e tau tagata ne liu foki fanau mai. Kakano ha ko e agaga tapu, kua fita he hiki a lautolu mo tau tama tane fakaagaga he Atua, ko e tau matakainaga a Keriso. (Ioane 1:11-13; Roma 8:14, 15) Ko e tau gahua oti nei he agaga tapu ke he ha lautolu a puhala kua mua atu e homo ue atu mai he tau mana. Ko e taha mena foki, he nakai tuga e tau mana fakalagataha, ne nakai oti e agaga tapu he mole atu e mamate he tau aposetolo ka e fakatumau ke gahuahua ke he puhala nei ati hoko mai ke he ha tautolu a vaha. Ko e monuina ni he Tau Fakamoli a Iehova ke ha ha i ai ia lautolu e tau tagata he tino a Keriso ne fakauku, mo e kua fekafekau a lautolu nei tuga e tau “tupa fakamoli mo e lotomatala” ke foaki mai e tau mena kai fakaagaga he tau magaaho tonu.—Mataio 24:45-47, NW.
Papatiso “ke he Higoa he . . . Agaga Tapu”
5, 6. Ne takitaki atu fefe he papatiso ke he agaga tapu e tau papatisoaga ke he vai?
5 Ka e kua e maveheaga he papatisoaga he vai ke he higoa he Matua, he Tama, mo e ke he agaga tapu? Ko e tau tutaki fakamua ia ne papatiso ke he agaga ne nakai taute e papatisoaga pihia ke he vai. Ne fita he moua e lautolu e papatisoaga he vai mai ia Ioane, mo e tali mai he magaaho ia kua maeke ia Iehova ke talia, ne nakai lata a lautolu ke liu papatiso foki. Ka e he Penetekoso he tau 33 V.N., ne moua ai he tau solu mai he moto tagata tokologa e papatisoaga fou ke he vai. Ne tupu fefe e mena nei?
6 Ko e papatisoaga he 120 ke he agaga tapu kua fita he hoko fakalataha mai mo e go lahi ne futiaki ai e moto tagata. Ne ofomate a lautolu nei he logona e tau tutaki he vagahau ke he tau alelo, ko e mena ia, ke he tau vagahau he tau motu kehe ne maama e lautolu ne ha ha i ai. Ne fakamaama mai he aposetolo ko Peteru ko e fakamoliaga mai he mana nei kua fita e agaga he Atua he liligi hifo e Iesu, ha kua fita a ia he matike mai he mate mo e ke he magaaho nei kua nofo ke he fahi matau he Atua i luga he lagi. Ne fakamalolo e Peteru a lautolu ne fanogonogo ki a ia: “Kia iloa tonu he fale oti kana a Isaraela kua taute ua he Atua a ia mo Iki mo e Keriso, ko Iesu nei ne fakatautau e mutolu.” Ti fakaoti ai hana kupu he pehe: “Kia tokihala a, mo e kia taute a mutolu takitokotaha ke papatiso ke he higoa a Iesu Keriso ma e fakamagaloaga he tau agahala ha mutolu, mo e to moua ai e mutolu e mena foaki noa he agaga tapu.’ ” Hagaao ke 3,000 e tau solu ne talia.—Gahua 2:36, 38, 41, NW.
7. Ke he puhala fe ne papatiso e 3,000 i Penetekoso he tau 33 V.N. he papatiso ke he higoa he Matua Tane, he Tama Tane, mo e he agaga tapu?
7 Kua maeke nakai ke pehe ne papatiso a lautolu nei ke he higoa (ha ko e mailogaaga) ke he Matua, ke he Tama, mo e ke he agaga tapu? E. Pete he nakai tala age e Peteru ki a lautolu ke papatiso ke he higoa he Matua, kua fita he mailoga e lautolu a Iehova ko e Iki ne Pule Katoatoa, ha ko e tau tagata Iutaia a lautolu he tino, ko e tau tagata he motu ne tukulele ki a Ia. Kua pehe a Peteru: ‘Kia papatiso ke he higoa he Tama.’ Ti kua fakamailoga he papatiso ha lautolu e mailogaaga ha lautolu ki a Iesu ko e Iki mo e Keriso. Ko lautolu he magaaho ia ko e hana tau tutaki mo e talia e fakamagaloaga he tau agahala ha kua maeke ni mai ia ia. Ti hoko ai fakahiku, ko e mailogaaga ke he agaga tapu e papatisoaga, mo e kua taute ai he talia e maveheaga ko e to moua e lautolu e agaga ko e mena foaki noa.
8. (a) Ke lafi atu ke he papatisoaga he vai, ko e heigoa e taha papatisoaga ne moua he tau Kerisiano ne fakauku? (e) Ko hai ne kehe mai he 144,000 ne moua e papatisoaga he vai ke he higoa he agaga tapu?
8 Ko lautolu ne papatiso ke he vai he aho Penetekoso he tau 33 V.N. ne papatiso foki ke he agaga, he fakauku ai ke eke he vaha i mua mo tau patuiki mo e tau ekepoa he Kautu i luga he lagi. Hagaao ke he tohi a Fakakiteaga, kua 144,000 ni hokoia a lautolu nei. Ti ko lautolu ne papatiso ke he agaga tapu mo e ke he fakahikuaga kua ‘fakamau’ ai mo tau hakeaga he Kautu ne numela hokoia ni ke 144,000. (Fakakiteaga 7:4; 14:1) Ka e pete ni, ko e tau tutaki fou oti kana—ko e heigoa ni ha lautolu a amaamanaki—ne papatiso ke he vai ke he higoa he Matua, ke he Tama, mo e ke he agaga tapu. (Mataio 28:19, 20) Ti, ko e heigoa mogoia, kua fakahaha mai he papatisoaga ke he higoa he agaga tapu ma e tau Kerisiano oti kana, pete ni ko e “fuifui mamoe gahoa” po ke falu he “mamoe kehe”? (Luka 12:32; Ioane 10:16) Fakamua ato tali e mena ia, kia lata a tautolu ke mailoga e falu he tau gahua he agaga he vaha Kerisiano.
Ko e Tau Fua he Agaga
9. Ko e heigoa e gahua he agaga tapu kua aoga lahi ke he tau Kerisiano oti kana?
9 Ko e gahua aoga lahi he agaga tapu ko e lagomatai a tautolu ke ati hake e tau mahani Kerisiano takitokotaha. Moli, ha kua nakai mitaki katoatoa kua nakai maeke a tautolu ke kalo kehe mai he agahala. (Roma 7:21-23) Ka ko e magaaho ka tokihala fakamoli a tautolu, fakamagalo e Iehova a tautolu he fakave ke he poa a Keriso. (Mataio 12:31, 32; Roma 7:24, 25; 1 Ioane 2:1, 2) Ka e taha e mena foki, ne amaamanaki foki a Iehova ki a tautolu ke taufetului ke totoko atu ke he tau aga mukamuka ha tautolu ke agahala, mo e lagomatai he agaga tapu a tautolu ke taute e mena nei. Ne pehe a Paulo “kia mahani a mutolu ke lata mo e Agaga, ti nakai eke ai e mutolu e tau manako lahi he tino.” (Kalatia 5:16) Ne fakaholo atu a Paulo ke fakakite kua maeke e agaga ke fakatupu mai e tau fuafuaaga mitaki lahi i loto ia tautolu. Ne tohia e ia: “Ko e tau fua he agaga ko e fakaalofa, loto olioli, mafola, fakamanavalahi, mahani totonu, mahani mitaki, tua, mahani molu, taofi e ia a ia.”—Kalatia 5:22, 23, NW.
10. Ati hake fefe e tau fua he agaga i loto he tau Kerisiano oti kana?
10 Kua taute fefe he agaga ke maeke ke ha ha i ai e tau fua i loto he Kerisiano? Kua nakai amanaki ni ti tupu noa e mena ia ha ko e tau Kerisiano tukulele mo e papatiso a tautolu. Kua lata ni a tautolu ke gahua ke he mena ia. Ka e kaeke ke feoaki a tautolu mo e falu Kerisiano kua fakakitekite e tau fuafuaaga nei, kaeke kua liogi a tautolu ke he Atua ma e hana agaga ke lagomatai a tautolu ke ati hake e tau fuafuaaga pauaki, kaeke kua kalo kehe mai a tautolu he tau feoaki kelea mo e fakaako ke he Tohi Tapu ma e fakatonutonuaga mo e tau fakafifitakiaga mitaki, ati tupu ai e tau fua he agaga i loto ia tautolu.—Fakatai 13:20; 1 Korinito 15:33; Kalatia 5:24-26; Heperu 10:24, 25.
Ne Kotofa he Agaga Tapu
11. Ke he puhala fe ne kotofa he agaga tapu e tau momotua?
11 He magaaho ne vagahau atu a Paulo ke he tau motua i Efeso, ne fakakite atu e taha gahua he agaga tapu he magaaho ne pehe a ia: “Kia matakite a mutolu ki a mutolu ni mo e ke he fuifui oti kana, ko e mena ne kotofa he agaga tapu a mutolu mo tau leveki kia lautolu, ke leveki mamoe ke he fakapotopotoaga he Atua, ko e mena ne fakafua mai e ia he toto he Tama hana ni.” (Gahua 20:28, NW) E, ko e tau leveki he tau fakapotopotoaga, po ke tau momotua, ne kotofa he agaga tapu. He puhala fe? Ko e tau momotua kua lata ke fakafeleveia e tau mena kua lata ne fakakite mai he Tohi Tapu. (1 Timoteo 3:1-13; Tito 1:5-9) Kua maeke ni a lautolu ke ati hake e tau mena ia kua lata ka fakalataha ni hokoia mo e lagomatai he agaga tapu. Ke lafi ki ai, ko e matakau he tau momotua ne pehe kua lata e motua fou ti kua liogi ma e takitakiaga he agaga ke iloa tonu kua lata nakai a ia ke fakafeleveia e tau mena kua lata po ke nakai. Mo e ko e kotofaaga moli kua taute ni i lalo he levekiaga he tupa fakamoli mo e lotomatala ne fakauku he agaga.
Kia Takitaki he Agaga
12. Maeke fefe he agaga ke futiaki a tautolu he puhala mai he Tohi Tapu?
12 Kua mailoga he tau Kerisiano ne tohia e tau he Tohiaga Tapu i lalo he malolo he agaga tapu. Ti kua, kumikumi fakahokulo a lautolu ki loto ha lautolu ma e pulotu ne omoi mai he agaga, ke tuga ni e Tau Kerisiano fakamoli a Iehova he vaha fakamua ato vaha Kerisiano. (Fakatai 2:1-9) Kua totou e lautolu, manamanatu fakalahi ki a lautolu, mo e toka a lautolu ke takitaki ha lautolu a tau momoui. (Salamo 1:1-3; 2 Timoteo 3:16) Ti kua lagomatai ai he agaga a lautolu ke ‘kumi hifo ke he tau mena hokulo he Atua.’ (1 Korinito 2:10, 13; 3:19) Ke takitaki e tau fekafekau he Atua ke he puhala nei ko e gahua aoga lahi he agaga he Atua he vaha a tautolu.
13, 14. Ko e heigoa ne fakaaoga e Iesu ke taute aki e tau lekua i loto he fakapotopotoaga, mo e taute fefe e ia e mena taha ia he vaha nei?
13 Ko e taha foki, i loto he tohi a Fakakiteaga, ko Iesu ne liu tu mai ne fakafano atu e tau fekau ke he tau fakapotopotoaga fitu i Asia Tote. (Fakakiteaga, tau veveheaga 2 mo e 3) I loto ia lautolu ne fakakite mai e ia kua fita he tivi e ia e tau fakapotopotoaga mo e kua iloa tuai ha lautolu a tutuaga fakaagaga. Ko e falu, ne moua e ia, kua taute e tau fakafifitakiaga mitaki lahi he tua. Ka ko e falu, ne fakaata he tau momotua e feveheveheaki ke he vahega lotu, mahani feuaki, mo e mafanafana ke fakakelea e fuifui. Ko e fakapotopotoaga i Sarataisa, kua mate fakaagaga ka e kehe mai he tau solu fakamoli gahoa. (Fakakiteaga 3:1, 4) Ne taute fefe e Iesu e tau lekua nei? Fakalataha mo e agaga tapu. He magaaho kua foaki fakatonutonuaga ke he tau fakapotopotoaga fitu, ko e tau kupu fakahiku a Iesu ki a lautolu takitaha mo e fakailoaga: “Kia toka a ia kua fai teliga ke logona e tau mena kua talahau mai he agaga ke he tau fakapotopotoaga.”—Fakakiteaga 2:7, 11, 17, 29, NW; Fakakiteaga 3:6, 13, 22.
14 He vaha nei foki, ne tivi e Iesu e tau fakapotopotoaga. Mo e he magaaho ka iloa e ia e tau lekua, kua taute agaia e ia a lautolu mai he agaga tapu. Kua maeke e agaga ke lagomatai a tautolu ke mailoga mo e kautu mai he tau lekua ka puhala fakahako mai ni he totou e tautolu e Tohi Tapu. Kua maeke foki e lagomatai ke puhala mai he tau tohi faka-Tohi Tapu ne taute he tau tupa fakamoli mo e lotomatala ne fakauku he agaga. Po ke kua maeke ai ke hau he tau momotu ne kotofa he agaga i loto he tau fakapotopotoaga. Ko e heigoa ni e mena, pete ni ko e fakatonuaga ke he tau tagata takitokotaha po ke ke he tau fakapotoptoaga katoa, kua fanogonogo nakai a tautolu ke he tau kupu a Iesu: “Kia toka a ia kua fai teliga ke logona e tau mena kua talahau mai he Agaga”?
Ko e Agaga mo e Gahua Fakamatala
15. Kua gahua fefe e agaga ki a Iesu hagaao ke he gahua fakamatala?
15 He taha magaaho ne fakamatala a Iesu i loto he taha sunako i Nasareta, ne fakakite foki e ia e taha gahua he agaga. Kua talahau mai he fakamauaga ki a tautolu: “Mo e ne fofola ai e ia e tohi vakai, mo e moua ai e mena ne tohia: ‘Kua ha ha i luga ia au e agaga a Iehova, ha kua fakauku e ia a au ke tukuogo e tala mitaki ke he tau nonofogati, ne fakafano mai e ia au ke fakamatala e tokanoaaga ke he tau pagota mo e liu ke ala e tau matapouli, ke fakafano kehe a lautolu kua loto malipilipi mo e ke fakatokanoa.’ Ne kamata ai a ia ke pehe ki a lautolu: ‘He aho nai ko e tohiaga tapu nei ne kua logona e mutolu kua fakamoli tuai.’ ” (Luka 4:17, 18, 21, NW; Isaia 61:1, 2) E, ne fakauku he agaga tapu a Iesu ke fakamatala e tala mitaki.
16. I loto he senetenari fakamua, ne putoia hokulo fefe e agaga tapu ke he fakamatalaaga he tala mitaki?
16 He magaaho ku ato hoko hana mate, ne talahau tuai e Iesu e gahua fakamatala lahi ka oti he taute he tau tagata ne muitua ki a ia. Ne pehe a ia: “To fakamatala fakamua foki e vagahau mitaki ke he tau motu oti kana ke lata ai.” (Mareko 13:10) Kua ha ha i ai e tau fakamoliaga fakamua he tau kupu nei ke he senetenari fakamua, mo e ko e vala ne taute he agaga tapu kua mua atu e lata ke mailoga. Ko e agaga tapu ne takitaki a Filipo ke fakamatala ke he eunuka Aitiope. Ko e agaga tapu ne takitaki a Peteru ki a Konelio, mo e ko e agaga tapu ne takitaki a Paulo mo Panapa e tau aposetolo ne fakafano mai i Aneteoka. He magaaho fakamui, he mogo ne manako a Paulo ke fakamatala i Asia mo Pitunia, ke he taha puhala ne fakalavelave atu he agaga tapu a ia. Ne manako e Atua ke uta e gahua fakamoli ki Europa.—Gahua 8:29; 10:19; 13:2; 16:6, 7.
17. He vaha nei, ne putoia fefe e agaga tapu ke he gahua fakamatala?
17 He vaha nei, kua liu foki hokulo lahi e agaga he putoia ke he gahua fakamatala. I loto he taha fakamoliaga he Isaia 61:1, 2, ne fakauku he agaga a Iehova e tau matakainaga a Iesu ke fakamatala. I loto he fakamoliaga fakahiku a Mareko 13:10, ko lautolu nei ne fakauku, ne lagomatai he moto tagata tokologa, ne taute moli e fakamatala he tala mitaki ke he “tau motu oti.” (Fakakiteaga 7:9) Mo e kua lalago he agaga a lautolu oti kana ke he mena nei. Tuga he senetenari fakamua, kua hafagi hake e tau matakavi fonua mo e takitaki e laulahi e fakaholoaga he gahua. Kua fakamalolo e tau tagata takitokotaha, he lagomatai a lautolu ke kautu mai he mahani ma mo e ati hake ha lautolu a iloilo ke fakaako. Ke lafi ki ai, ne tala age e Iesu ke he hana tau tutaki: “Ke takitaki atu foki a mutolu ki mua he tau iki mo e tau patuiki ha ko au ni, ke eke mo talahau kia lautolu katoa mo e atu motu kehe. Ka tuku atu e lautolu a mutolu, aua neke fakaatukehe a mutolu, po ke fefe, po ke heigoa foki ke tala atu ai e mutolu; . . . Ha ko e mena nakai ko mutolu kua vagahau atu, ka ko e Agaga he Matua ha mutolu ke vagahau mai ai i loto ia mutolu.”—Mataio 10:18-20.
18, 19. Ke he puhala fe kua fakalataha atu e agaga mo e kitofaitane ke uiina a lautolu ne loto molu ke “uta noa . . . e vai he moui”?
18 I loto he tohi a Fakakiteaga, kua liu foki e Tohi Tapu ke pehi e putoiaaga he agaga i loto he gahua fakamatala. He mena ia kua hokotaki mai e aposetolo ko Ioane: “Kua pehe mai foki e Agaga mo e kitofaitane, Ati hau ā; kia pehe atu foki a ia kua fanogonogo, Ati hau ā; ko ia foki kua fia inu kia hau a ia, katoa foki mo ia kua manako ki ai, kia uta noa e ia e vai he moui.” (Fakakiteaga 22:17) Ko e kitofaitane, ne hukui ai e lautolu he 144,000 ne toe agaia he lalolagi, kua uiina atu ki a lautolu oti kana ke uta noa e vai he moui. Ka e kia mailoga la, kua pehe foki e agaga tapu “Ati hau ā!” Ke he puhala fe?
19 Ha ko e fekau ne fakamatala he vahega kitofaitane—he vaha nei ne lagomatai atu he moto tagata tokologa he falu mamoe—kua moua mai he Tohi Tapu, ne tohia i lalo he takitakiaga malolo he agaga tapu. Mo e ko e agaga taha ia ne hafagi hake e tau loto mo e tau loto manamanatu he vahega kitofaitane ke maama e Kupu ne omoi mai he agaga mo e fakamaama atu ke he falu. Ko lautolu ne papatiso fou mo tutaki a Iesu Keriso kua fiafia lahi ke uta e vai noa he moui. Mo e kua fiafia lahi a lautolu ke kau auloa mo e agaga mo e kitofaitane ke pehe atu ke he falu foki “Ati hau ā!” He vaha nei, kua lahi mai e fa e miliona ne taute fakalataha mo e agaga ke he gahua nei.
Momoui ke Lata mo e ha Tautolu a Papatisoaga
20, 21. Maeke fefe ia tautolu ke momoui tuga ha tautolu a papatisoaga ke he higoa he agaga tapu, mo e kua lata ke onoono fefe a tautolu ke he papatisoaga nei?
20 Ko e papatisoaga ke he higoa he agaga tapu ko e fakailoaaga ke he tau tagata ko e mailoga e tautolu e agaga tapu mo e talia e kotofaaga ne gahua ai ke he finagalo a Iehova. Kua fakahaha ko e to kau auloa a tautolu mo e agaga, kua nakai taute ha mena ke fakalavelave aki hana gahua i loto he tau tagata a Iehova. Ha kua pihia, mailoga e tautolu mo e kau auloa mo e tupa fakamoli mo e lotomatala. Kua kau auloa a tautolu mo e fakatokatokaaga ke he tau motua i loto he fakapotopotoaga. (Heperu 13:7, 17; 1 Peteru 5:1-4) Kua momoui a tautolu, ke he pulotu fakaagaga nakai he tino, mo e fakaata ai e agaga ke fakahakohako ha tautolu a tau mahani fakatagata, ke taute ke tuga ha Keriso. (Roma 13:14) Mo e kua matutaki atu a tautolu mo e loto katoa he fakalataha atu mo e agaga mo e kitofaitane ke pehe “Ati hau ā!” ke he tau miliona kua nakai la talia.
21 Ko e mena nakai fakateaga ni ke papatiso ‘ke he higoa he agaga tapu’! Ka e ko e monuina ha kua maeke ke moua! Mo e kia tumau la ke tupu e numela ha lautolu ka papatiso. Mo e kia fakatumau la a tautolu oti kana ke momoui tuga e kakano he papatiso ia, he fakatupa ai a tautolu ma Iehova mo e fakatumau ke “kikila lahi mo e agaga.”—Roma 12:11, NW.
Ko e Heigoa kua Manatu e Koe Hagaao ke he Agaga Tapu?
◻ Ko e heigoa e tau puhala kua gahuahua e agaga tapu ia Penetekoso he tau 33 V.N.?
◻ Maeke fefe ia tautolu ke fakakite mai e tau fua he agaga?
◻ Ke he puhala fe ne kotofa he agaga tapu e tau momotua?
◻ Ne taute fefe e Iesu e tau lekua i loto he fakapotopotoaga kakano ha ko e agaga tapu?
◻ Ne putoia hokulo fefe e agaga ke he gahua fakamatala?
[Fakatino he lau 27]
Ko e papatisoaga ne fakamatala e Peteru kua taute foki ke he higoa he Matua mo e ke he agaga tapu
[Fakatino he lau 29]
Kua hokulo lahi e putoiaaga he agaga ke he fakamatalaaga he tala mitaki