Mena Foaki Noa ha Iehova e Agaga Tapu

“Ka e nakai kia mua e Matua ha mutolu ha ha he lagi ke foaki mai e Agaga Tapu kia lautolu ka ole atu ai kia ia?”​—LUKA 11:13.

1, 2. (a) Ko e heigoa e maveheaga ne taute e Iesu hagaao ke he agaga tapu, mo e ko e ha kua fakamafanatia moli e mena nei? (e) Ko e heigoa e agaga tapu?

HE VAHA mateafu he tau 32 V.N. he magaaho ne fakamatala e Iesu e tala mitaki i Iutaia, ne vagahau a ia ke he hana tau tutaki hagaao ke he lima fakaolo a Iehova. Ne fakaaoga e ia falu fakatai malolo lahi mo e ti taute ai e maveheaga homo ue atu, he pehe: “Hanai, ko mutolu ne mahani kelea, kaeke kua iloa e mutolu ke uta e tau mena mitaki mo e tau fanau ha mutolu; ka e nakai kia mua e Matua ha mutolu ha ha he lagi ke foaki mai e Agaga Tapu kia lautolu ka ole atu ai kia ia?”​—Luka 11:13.

² Ko e mafanatia ha e tau kupu ia! He fakauka a tautolu ke he fakaatukehe he tau aho fakahiku he lalolagi nei, fehagai ke he faitaua ha Satani mo e hana tau temoni, mo e felatauaki mo e tau aga kelea he tau tino ha tautolu ni, kua fakamafanatia moli ha e tau loto he iloa ko e to fakamalolo he Atua a tautolu mai he agaga hana. E moli, kua nakai maeke ke noa e fakaukaaga fakamoli mo e paletua ia. Kua fa mahani nakai a koe mo e malolo he agaga nei, ko e malolo gahuahua ni he Atua? Kua maama nakai e koe, ko e maeke lahi fefe ke lagomatai a koe? Kua fakaaoga katoatoa nakai e koe?

Ko e Malolo he Agaga Tapu

3, 4. Fakakite la e fakatai ke he malolo he agaga tapu.

³ Kia manamanatu fakamua la ke he malolo he agaga tapu. Kia liu manamanatu ke he tau 1954. Ke he magaaho ne fakato hifo e pomo haetolotene (hydrogen) ki luga he Motu Tote ko Pikini he Pasifika Toga. He magaaho taha ia ni he mole atu he pa e pomo, ne ufitia e atu motu fulufuluola i loto he polo afi kaka mo e lauia kelea he pa mahaki ne tatai e malolo ke he fakapa mahaki he 15 e tau miliona tane he TNT. Ne omai i fe e malolo moumou katoa ia? Ko e mena ne tupu mai he faliu e vala tote he uraniamu (uranium) mo e haetolotene kua tanaki aki e tega he uho he pomo. Ko e heigoa, ka pihia, kaeke kua maeke ai e tau saienetisi ke taute ke liliu ke he fahi kehe e tau mena ne taute e lautolu i Pikini? Ka pehe kua maeke a lautolu ke tapaki oti e malolo velagia ia mo e fakafaliu ai ke he tau pauna gahoa he uraniamu mo e haetolotene. Kua lahi ha e mena ka moua i ai! Ka e, kua taute e Iehova e taha mena ne tatai ki ai ka e ke he taha mena lahi mahaki he magaaho “ne eke [e ia] e lagi mo e lalolagi ke he kamataaga.”​—Kenese 1:1.

⁴ Kua lahi mahaki e fakaputuputuaga malolo lahi a Iehova. (Isaia 40:26) Ke he tufugatiaaga, liga ne hataki mai e ia e falu he malolo nei he magaaho ne taute e ia e tau mena oti kana kua tanaki aki e lagi mo e lalolagi katoatoa. Ko e heigoa ne fakaaoga e ia i loto he gahua tufugatiaaga nei? Ko e agaga tapu. Kua totou e tautolu: ‘Ko e kupu a Iehova ne eke ai e lagi; ko e kau oti ha i ai kua eke ia ke he fafagu he hana gutu.’ (Salamo 33:6) Mo e totou ai e fakamauaga ke he tufugatiaaga ia Kenese: “Ne gahuahua foki e Agaga he Atua ki luga he fuga vai.” (Kenese 1:2) Ko e lahi mahaki ha, e malolo he agaga tapu!

Tau Gahua Mana

5. Ko e heigoa e tau puhala lilifu ue atu kua taute he agaga tapu?

⁵ Ne taute gahua agaia e agaga tapu ke he tau puhala kua lilifu ue atu. Kua takitaki mo e fakahakohako e fakatokatokaaga a Iehova i luga he lagi. (Esekielu 1:20, 21) Kua tuga e malolo ne fakatoka mai he pomo haetolotene, kua maeke ai ke fakaaoga ke fakaotioti ka fakahoko e fakafiliaga ke he tau fi a Iehova, ka e kua taute gahua foki ke he falu puhala kua fakafiafia aki a tautolu ke manamanatu.​—Isaia 11:15; 30:27, 28; 40:7, 8; 2 Tesalonia 2:8.

6. Ne lagomatai fefe he agaga tapu a Mose mo e tau fanau a Isaraela ke he tau mena ne taute e lautolu mo Aikupito?

⁶ Tuga a nei, he magahala he tau 1513 F.V.N., ne fakafano atu e Iehova a Mose ke hu atu ki mua a Farao ha Aikupito ke ole fakalahi ma e tokanoaaga he tau fanau a Isaraela. Ke he tau tau 40 fakamua, ko e tagata leveki mamoe a Mose i Mitiana, ti kua lata he ha a Farao ke fanogonogo ke he tagata leveki mamoe? Ha kua hau a Mose ha ko e higoa he Atua moli hokoia, ko Iehova. Ke fakamoli aki e mena nei, ne fakamalolo e Iehova a ia ke taute e tau mana. Ne ofoofogia lahi e tau mena nei kua eke ni e tau ekepoa Aikupito ke talahau ka e nakai fia loto: “Ko e matalima he Atua!”a (Esoto 8:19, NW) Ne ta mai e Iehova e tau malaia hogofulu ki Aikupito ko e mena fakahiku kua omoi aki a Farao ke toka e tau tagata he Atua ke o kehe mai i Aikupito. He magaaho ne uluuka lahi a Farao ke tutuli atu ki a lautolu mo e hana matakau kautau, ne hao mai e tau Isaraela he magaaho ne mahafagi fakamana e puhala he Tahi Kula. Ne mumui atu e matakau kautau Aikupito ki a lautolu mo e tomo ai he tahi.​—Isaia 63:11-14; Hakai 2:4, 5.

7. (a) Ko e heigoa a falu kakano ko e ha ne taute gahua mana ai e agaga tapu? (e) Pete ni kua nakai liu e tau mana ne taute he agaga tapu ke tupu, ko e ha kua fakamafana mai e fakamauaga ha lautolu i loto he Tohi Tapu?

⁷ E, ne puhala atu e Iehova he agaga tapu hana e tau gahua mana malolo lahi ma e tau Isaraela he vaha a Mose, mo e he falu a tau vaha foki. Ko e heigoa e lagatau he tau mana nei? Ne fakalahi atu e lautolu e finagalo a Iehova, ne taute ai hana higoa ke iloa he tau tagata, mo e fakakitekite hana malolo. Mo e he falu a magaaho, tuga kua fakalataha ki a Mose, ne fakamoli ti nakai taumaleku kua ha ha he tagata ia e paletua a Iehova. (Esoto 4:1-9; 9:14-16) Ka e pete ni, ko e mena lavea ni e tau mana ne tupu mai he agaga tapu he fakamauaga katoa i tuai.b Kua liga lahi, ko e laulahi mai he tau tagata ne momoui he tau vaha faka-Tohi Tapu ne nakai kitia moli e taha, mo e he vaha nei kua nakai tutupu a lautolu. Ka e pete ni, taufetului a tautolu he vaha nei mo e tau lekua ne kua tuga ko e uka lahi, kua fakamafanatia nakai ke iloa kaeke ke ole a tautolu ki a Iehova he tua, to mai e ia ki a tautolu e agaga taha ia ne lagomatai a Mose ki mua a Farao mo e hafagi e puhala ma e tau Isaraela he Tahi Kula?​—Mataio 17:20.

Tau Tohi ne Omoi Fakaaaga

8. Ko e heigoa e gahuahuaaga he agaga tapu ke he fakamauaga he tau Fakatufono ne Hogofulu?

⁸ He mole mai ha lautolu a laveakiaga mai i Aikupito, ne takitaki atu e Mose e tau Isaraela ke he Mouga ko Sinai, ne taute ai e Iehova he kavi ia e maveheaga mo lautolu mo e age ki a lautolu e Matafakatufono hana. Ko e vala lotouho he Matafakatufono ia ne age ki a Mose ko e tau Fakatufono Hogofulu, mo e ko e tau fakamauaga fakamua nei ne tahihika i luga he tau lapa maka. Fefe? Mai he agaga tapu. Kua pehe mai e Tohi Tapu: “Kua oti atu hana a vagahau kia Mose ke he mouga ko Sinai, ti ta atu ai e ia kia ia e na lapa he fakatufono, ko e tau lapa maka kua tohia he matalima he Atua.”​—Esoto 31:18; 34:1.

9, 10. Ne gahuahua fefe e agaga tapu ke he tau mena tohi he Tohiaga Tapu Heperu, mo e fakamoli fefe e mena nei mai he tau fakailoaaga ne fakaaoga he tau tutaki a Iesu?

⁹ Ke lafi atu ke he tau Fakatufono Hogofulu, kua puhala mai e Iehova he hana agaga ti age ki a Isaraela e tau teau he tau matafakatufono mo e tau poakiaga ke takitaki aki e tau momoui he tau tagata tane mo e tau fifine fakamoli. Mo e loga foki e falu ka omai. He tau senetenari he mole atu e tau aho a Mose, ne talahau fakamoli mai e Nehemia i loto he liogi ki mua he tau tagata ki a Iehova: “Ka e fakauka ai a koe kia lautolu ke he tau tau loga, mo e akonaki ai e koe a lautolu ke he hau a Agaga ke he hau a tau perofeta.” (Nehemia 9:30) Loga e tau perofeta ne omoi mai he agaga ne talahau mai he tau perofeta ia ne fakamau hifo. Ko e taha mena foki, ne omoi he agaga tapu e tau tagata tane fakamoli ke tohi hifo e tau fakamauaga tapu tuai mo e tau lologo hoko kehe loto he fakahekeaga.

¹⁰ Kua vagahau a Paulo ke he tau mena tohi oti kana nei he magaaho ne pehe a ia: “Ko e tau Tohi Tapu oti kana mai he Agaga he Atua ia.” (2 Timoteo 3:16; 2 Samuela 23:2; 2 Peteru 1:20, 21) E moli, he magaaho ne fatiaki e tau kupu tohiaga tapu nei, ne fa mahani mau e tau tutaki ha Iesu he senetenari fakamua ke fakaaoga e tau fakailoaaga tuga e ‘ne talahau fakamua mai he Agaga Tapu ke he gutu a Tavita,’ “ne tala mai he Agaga Tapu ke he perofeta ko Isaia,” po ke pehe ni ko e “talahau mai ai he Agaga Tapu.” (Gahua 1:16; 4:25; 28:25, 26; Heperu 3:7) Ko e monuina ha, ha ko e agaga tapu taha ia ni ne fakamalolo ai ke tohi e tau kupu he Tohiaga Tapu mo e ti puipui a lautolu ti maeke ai a lautolu ke takitaki mo e fakamafana mai a tautolu he vaha nei!​—1 Peteru 1:25.

Falanakiaga ke he Agaga Tapu

11. Ko e heigoa e gahuahuaaga he agaga kua kitia hagaao ke he talagaaga he fale tapuaki utafano?

¹¹ He magaaho ne heagaapi e tau Isaraela he matapatu he Moua Sinai, ne poaki atu a Iehova ki a lautolu ke talaga e fale tapuaki utafano ke eke mo matapatu he tapuaki moli. To maeke fefe ia lautolu ke taute katoa e mena nei? Ne “pehe atu a Mose ke he fanau a Isaraela, Kitiala, kua ui e Iehova ke he hana higoa a Pesaleli, ko e tama a Auri, ko e tama ia a Huro, ko e magafaoa a Iuta; Kua fakapuke foki a ia ke he Agaga he Atua ke he iloilo mo e pulotu, mo e maama, ke eke ai e tau gahua oti kana.” (Esoto 35:30, 31) Ne fakamalolo he agaga tapu e ha iloilo tuai ne ha ha ia Pesaleli, mo e kua maeke a ia ke leveki ti kautu e talagaaga he fale mitaki kehe lahi ia.

12. Ne fakamalolo fefe he agaga e tau tagata takitokotaha ke he tau puhala ne nakai fa mahani ki ai he mole mai e vaha a Mose?

¹² He taha magaaho fakamui, ne gahuahua e agaga a Iehova ki luga a Samisoni, he age ki a ia e malolo mana nakai mai he tagata ke maeke a ia ke laveaki mai a Isaraela he tau Filisitia. (Fakafili 14:5-7, 9; 15:14-16; 16:28-30) Ke he magaaho fakamui agaia, ne tuku atu ki a Solomona e pulotu uho pauaki ko e patuiki ke he tau tagata fifili he Atua. (2 Nofoaga he Tau Patuiki 1:12, 13) I lalo ia ia, ne muhu koloa a Isaraela nakai tuga fakamua, mo e kua taute hana tutuaga fiafia mo fakafifitakiaga ma e tau fakamonuinaaga to moua ai he tau tagata he Atua e loto olioli i lalo he Pule he Afetau ha Iesu Keriso, ko Solomona Lahi ue Atu.​—1 Tau Patuiki 4:20, 25, 29-34; Isaia 2:3, 4; 11:1, 2; Mataio 12:42.

13. Ne fakamalolo aki fefe he fakamauaga he agaga ki a Pesaleli, Samisoni, mo Solomona a tautolu he vaha nei?

¹³ Ko e monuina ha a ia he taute e Iehova e agaga taha ia ke maeke ia tautolu ke moua! He magaaho ka logona e tautolu kua temotemoai ke taute e taha kotofaaga po ke ke taute e gahua fakamatala, kua maeke ia tautolu ke ole atu ki a Iehova ke foaki mai ki a tautolu e agaga taha ia ne age e ia ki a Pesaleli. He magaaho ka mamahi a tautolu he gagao po ke fakauka ke he favaleaga, ko e agaga taha ia ne age ki a Samisoni e malolo kehe ue atu ka fakamauokafua a tautolu​—ka e nakai fakamana. Mo e he magaaho ka fehagai a tautolu mo e tau lekua uka po ke kua lata ke taute e tau fifiliaga aoga lahi, kua maeke ia tautolu ke ole atu ki a Iehova, ha ko ia ne age ki a Solomona e pulotu kehe ue atu, ke lagomatai a tautolu ke pulotu e tau mena ka taute. He mogoia, ke tuga a Paulo, to pehe a tautolu: ‘Kua maeke ia au e tau mena oti kana ke he fakamalolo mai a ia kia au.’ (Filipi 4:13) Mo e to hagaao e maveheaga a Iakopo ki a tautolu: “Kaeke ha ha ia mutolu taha kua nakai fai iloilo, kia ole atu a ia ke he Atua, ko ia kua foaki mai mo e totonu ke he tau tagata oti mo e nakai tauage; ti foaki mai ai kia ia.”​—Iakopo 1:5.

14. Ko hai, he tau vaha i tuai mo e he vaha nei, kua fita he lagomatai he agaga tapu?

¹⁴ Kua ha ha ai foki e agaga a Iehova i luga ia Mose ke he hana tau gahua fakafili he motu. He magaaho ne kotofa ai e falu ke lagomatai a Mose, ne pehe a Iehova: “To uta kehe foki e au mai he agaga ha ha ia koe, mo e tuku atu ai kia lautolu; ti tauloto ai e lautolu fakalataha mo koe e kavega he motu nai, kia nakai hahamo e koe ia tokotaha.” (Numera 11:17) Ti kua, nakai taute ai e tau tagata tane ia ke gahua mai ni he malolo ha lautolu. Ne lagomatai he agaga tapu a lautolu. Ne totou atu e tautolu he tau magaaho fakamui kua ha ha i ai e agaga a Iehova i luga he falu tagata. (Fakafili 3:10, 11; 11:29) He magaaho ne fakauku e Samuela a Tavita mo patuiki a Isaraela ma e tau aho i mua, kua pehe e fakamauaga: “Ti toto ai e Samuela e lupo hoe manu ne toka ai e puke lolo, ti fakauku e ia a ia ki mua hana tau matakainaga; ti hoko ai e Agaga a Iehova kia Tavita, ne kamata mai he aho ia ni.” (1 Samuela 16:13) Ko lautolu he vaha nei kua fai kotofaaga mamafa​—fakamagafaoa, fakapotopotoaga, po ke he fakatokatokaaga​—kua maeke ai ke mafanatia he iloa kua maeke agaia e agaga he Atua ke lagomatai hana tau fekafekau he taute e lautolu ha lautolu a tau kotofaaga.

15. Ko e heigoa e puhala ne fakamalolo he agaga tapu e fakatokatokaaga a Iehova (a) he tau aho a Hakai mo Sakaria? mo e (e) he vaha nei?

¹⁵ He falu he tau afe e tau tau he mole atu e vaha a Mose, ko lautolu ne fakamoli mai he tau fanau a Isaraela ne liliu ki Ierusalema mai i Papelonia mo e fekau pauaki ke liu talaga e faituga. (Esera 1:1-4; Ieremia 25:12; 29:14) Kua tutupu hake e tau mena fakalavelave uka, ha kua pihia, mo e ne fakalolelole ai a lautolu ke he tau tau loga. Ti hoko fakamui, ne fakatutu hake e Iehova e tau perofeta ko Hakai mo Sakaria ke fakamalolo e tau Iutaia ke nakai falanaki ni ke he ha lautolu ni a malolo. Ka e to maeke fefe e gahua ke taute ke oti? “Nakai ko e toa, nakai ko e malolo, ka ko e haku Agaga, kua pihia mai a Iehova Sapaota.” (Sakaria 4:6) Mo e fakalataha mo e lagomatai he agaga he Atua, kua talaga ai e faituga. Ko e tau tagata he Atua he vaha nei kua lahi pihia e tau mena ne oti he taute. Ne fakalaulahi atu e fakamatalaaga he tala mitaki ke he lalolagi katoa. Kua miliona e tau tagata takitokotaha ne fakaako he aoga ke he kupu moli mo e tututonu. Ne fakatokatoka ai e tau fonoaga. Kua talaga ai e tau Fale he Kautu mo e tau lala ofisa. Kua lahi mai he tau mena nei ne taute ka e fehagai mo e totokoaga kelea lahi. Ka e nakai fakalolelole e Tau Fakamoli a Iehova, he iloa ko e tau mena oti ne oti he taute e lautolu ha kua, nakai mai he malolo he matakau kautau, po ke mai he malolo he tagata, ka e mai he agaga he Atua.

Agaga he Atua he Senetenari Fakamua

16. Ko e heigoa e mena ne mahani ki ai e tau fekafekau a Iehova he vaha fakamua ato vaha Kerisiano hagaao ke he gahua he agaga he Atua?

¹⁶ Tuga he kitia e tautolu, ko e tau fekafekau he Atua he vaha fakamua ato vaha Kerisiano ne iloa mitaki e malolo he agaga he Atua. Ne falanaki a lautolu ki ai ke lagomatai a lautolu ke taute fakamoli e tau kotofaaga mamafa mo e ke oti he taute e finagalo he Atua. Ne iloa foki e lautolu e Matafakatufono mo e a falu tohiaga tapu ko e omoi mai ni he agaga, kua tohia i lalo he malolo he agaga a Iehova, mo e ti ko e tau ‘Kupu he Atua’ a lautolu. (Salamo 119:105) Ka e kua e vaha Kerisiano?

17, 18. Ko e heigoa e falu he tau fakakiteaga mana he agaga i loto he vaha Kerisiano, mo e ko e heigoa e finagalo kua fekafekau e tau mena nei ki ai?

¹⁷ Ko e senetenari fakamua he ha tautolu a Vaha Nei kua kitia foki e tau gahua homo ue atu he agaga he Atua. Kua ha ha i ai e tau perofetaaga ne omoi he agaga. (1 Korinito 14:1, 3) Ko e fakamoliaga he maveheaga a Iesu ko e maeke he agaga tapu ke fakamanatu ke he hana tau tutaki e tau mena oti kana ne talahau e ia mo e kua maeke ke fakaako fakalaulahi atu a lautolu ke he falu mena foki he kupu moli, kua ha ha ai e loga he tau tohi ne tohia i lalo he malolo he agaga tapu. (Ioane 14:26; 15:26, 27; 16:12, 13) Mo e kua ha ha i ai foki e tau mana, tuga to katoatoa e fakatutala ki ai e tala ha mautolu ka mui mai. E moli, ne hoko fakalataha mai e senetenari fakamua mo e mana mitaki lahi. He matakavi he tau 2 F.V.N., kua fanau mai e tama mukemuke uho pauaki, mo e mo fakamailoga, ko e hana matua fifine kua eke ai ko e fifine taopou. Kua maeke fefe e mena ia? Kakano ha ko e agaga tapu. Kua pehe e fakamauaga: “Ne pehe e fanau mai a Iesu Keriso Mena fakatu tane hana matua fifine ko Maria kia Iosefa, ti kitia kua fatu a ia ke he Agaga Tapu, ka e nakaila fakalataha a laua.”​—Mataio 1:18; Luka 1:35, 36.

¹⁸ He magaaho ne lahi hake a Iesu, ne vega kehe e ia e tau temoni, ne fakamaulu e tau gagao, ne fakatutu foki e tau mamate mai he malolo he agaga tapu. Ne taute he falu foki ne mumui tua ki a ia e tau mana mo e tau gahua malolo lahi. Ko e tau iloilo uho pauaki nei ko e tau mena foaki noa mai he agaga. Ko e heigoa ha lautolu a kakano? Ke tuga ni e tau mana ne taute fakamua i tuai, ne fakalahi atu e lautolu e finagalo he Atua mo e ne fakakite mai hana malolo. Ke lafi ki ai, ne fakakitekite mai e lautolu ko e molioli e kupu a Iesu ko e na fakafano mai he Atua a ia; mo e he magaaho fakamui, ne fakamoli e lautolu ko e motu fifili he Atua e fakapotopotoaga Kerisiano he senetenari fakamua.​—Mataio 11:2-6; Ioane 16:8; Gahua 2:22; 1 Korinito 12:4-11; Heperu 2:4; 1 Peteru 2:9.

19. Ne fakamalolo fefe mai he fakamauaga he Tohi Tapu ke he tau mana ne taute e Iesu mo e hana tau aposetolo e tua ha tautolu?

¹⁹ Ka e pete ni, ne pehe e aposetolo ko Paulo, ko e tau fakakiteaga mana pihia he agaga ne ha ha i ai ke he vaha tamatote he fakapotopotoaga mo e kua maeke ke uta kehe, ti kua nakai maeke a tautolu he vaha nei ke kitia e tau mana pihia ne taute mai he agaga tapu. (1 Korinito 13:8-11) Ka e taha e mena, ko e tau mana ne taute e Iesu mo e hana tau aposetolo kua lahi mai he fakamanamanatu aga ke he fakamauaga tuai. Ne fakamalolo e lautolu e tua ha tautolu ke he maveheaga he Atua ko e to nakai fai nofoaga e mate i lalo he pule a Iesu he lalolagi fou.​—Isaia 25:6-8; 33:24; 65:20-24.

Lagomatai Mai he Agaga Tapu he Atua

20, 21. To maeke fefe a tautolu ke fakaata e tautolu ni a tautolu ke moua e foakiaga he agaga tapu?

²⁰ Ko e malolo lahi ha e gahuahua he agaga nei! Ka e maeke fefe e tau Kerisiano he vaha nei ke fakaata e lautolu a lautolu ki ai? Ke fakamua aki, ne pehe a Iesu kua lata a tautolu ke ole ma e mena ia, ti kua taute ai kia e mena ia? Kia liogi ki a Iehova ke atu ki a koe e mena foaki noa homo ue atu nei, nakai ni hokoia he tau magaaho fakaatukehe ka e he tau magaaho oti. Ke lafi ki ai, kia totou e Tohi Tapu ke maeke ai e agaga tapu ke vagahau atu ki a koe. (Fakatatai Heperu 3:7.) Kia manamanatu fakalahi ke he tau mena ne totou e koe mo e fakaaoga ke maeke ai e agaga tapu ke fai malolo i loto he moui hau. (Salamo 1:1-3) Ko e taha mena foki, kia feoaki​—takitokotaha, i loto he tau fakapotopotoaga mo e he tau toloaga​—mo e falu ne falanaki ke he agaga he Atua. Kua fakamauokafua lahi he agaga tapu a lautolu kua fakamonuina ha lautolu a Atua “ke he fakapotopotoaga”!​—Salamo 68:26.

²¹ Nakai kia ko e Atua lima fakaolo a Iehova? Kua pehe mai a ia ko e ha tautolu ni ke ole ma e agaga tapu mo e to foaki mai e ia e mena ia ki a tautolu. Kua goagoa ha ke falanaki ke he ha tautolu ni a pulotu mo e malolo he magaaho kua maeke a tautolu ke moua e lagomatai malolo lahi pihia! Ka e pete ni, kua ha ha ai, e falu mena hagaao ke he agaga he Atua kua eke ke lauia a tautolu ha ko e tau Kerisiano, mo e to fakatutala ke he tau mena ia i loto he tala i tua.

[Tau Matahui Tala]

Maeke Nakai ia Koe ke Tali e Tau Huhu ne Muitua Mai?

◻ Ne tufugatia fefe e Iehova e tau mena oti kana he lagi mo e lalolagi katoatoa?

◻ Ko e heigoa e falu he tau puhala ne taute gahua ai e agaga tapu he tau vaha fakamua ato vaha Kerisiano?

◻ Kua fakamafana mai fefe ki a tautolu he vaha nei he iloa ko e heigoa ne oti he taute he agaga tapu he tau vaha i tuai?

◻ Kua maeke fefe ia tautolu ke fakaata e tautolu a tautolu ni ke moua e foakiaga lagomatai he agaga tapu?

[Fakatino he lau 22]

Kua maeke e agaga ne age e malolo mua ue atu nakai mai he tagata ki a Samisoni ke mai ki a tautolu e malolo ma e tau mena oti kana