Takitaki he Agaaga he Atua he Senetenari Fakamua mo e Vahā Nei
“Kua gahua ni e tau mena oti ia ke he Agaga taha ia ni.”—1 KORI. 12:11.
1. Ko e heigoa e tau manatu ka fakatutala a tautolu ki ai he fakaakoaga nei?
PENETEKOSO. Ko e tau mena tutupu ofoofogia mooli ka fakamanatu he kupu ia! (Gahua 2:1-4) Ko e liligi he agaaga tapu he magaaho ia he senetenari fakamua ne fakamailoga e hikiaga aoga he tau fehagaiaga he Atua mo e tau fekafekau haana. He vala tala kua mole, kua fakatutala a tautolu ke he falu he tau puhala ne fakamalolō he agaaga he Atua a lautolu ne tua fakamooli i tuai ke taute e tau matagahua uka mo e matafeiga. Ka ko e heigoa e kehekehe he puhala ne gahuahua e agaaga he Atua he tau vahā ato faka-Kerisiano mo e puhala ne gahuahua he senetenari fakamua? Ti aoga fēfē e tau Kerisiano mai he gahuahua he agaaga tapu he Atua he vahā nei? Kitekite la tautolu ki ai.
‘Kitiala, ko e Fekafekau ha Iehova’
2. Kitia fēfē e Maria e lauiaaga he agaaga tapu?
2 Ne fakalataha a Maria he poko lahi tapa ki luga i Ierusalema he magaaho ne liligi e agaaga tapu ne mavehe mai. (Gahua 1:13, 14) Ka e molea e tolu e hogofulu tau ato tupu e mena ia, ne kitia e ia e lauiaaga he agaaga tapu a Iehova ke he tau puhala mua ue atu. Ne hiki e Iehova e moui he Tama haana mai he lagi ke he lalolagi, ti fakatupu ke fai tama he nofoaga tama a Maria ka e taopou agaia a ia. Ati fatu ai a ia “ha ko e [a]gaga [t]apu.”—Mata. 1:20.
3, 4. Ko e heigoa e aga ne fakakite e Maria, ti liga fifitaki fēfē e tautolu a ia?
3 Ko e ha ne fifili a Maria ke foaki ki ai e lilifu homo ue atu ia? He mole e fakamaama age he agelu e finagalo a Iehova ki a Maria, ne pehē a ia: “Kitiala, ko au nai ko e fekafekau he Iki, kia hoko mai kia au tuga ne vagahau hau.” (Luka 1:38) He talahau e tau manatu he puhala ia, ne fakakite e Maria e aga he loto kua fitā he mailoga he Atua. Ko e tali mafiti haana ne fakakite kua mautali a ia ke talia e finagalo Haana ke he mena ka tupu. Ne nakai hūhū a ia hagaao ke he onoonoaga he tau tagata he maaga ke he fai tama haana po ke ka lauia e fakafetuiaga haana mo e tagata ne fakatutane a ia ki ai. He hagaao ki a ia ko e tupa ne mua ue atu e tokolalo he tau fekafekau, ne fakakite e Maria kua falanaki katoatoa a ia ki a Iehova ko e Iki haana.
4 Kua fa logona nakai e koe he falu magaaho e tupetupe lahi ha ko e tau paleko po ke tau matagahua he fekafekauaga he Atua? Lata ke igatia a tautolu mo e hūhū hifo ki a ia ni: ‘Falanaki katoatoa nakai au ki a Iehova ke takitaki e tau mena oti ke lagotatai mo e finagalo haana? Kua fakatātā mooli nakai e au e aga fakamakai?’ Kia mauokafua kua foaki he Atua e agaaga haana ki a lautolu kua falanaki ki a ia mo e tau loto katoa ha lautolu ti mailoga e finagalo he pule haana.—Gahua 5:32.
Lagomatai he Agaaga Tapu a Peteru
5. Ke he tau puhala fe kua kitia e Peteru e agaaga tapu hane gahuahua ato hoko e Penetekoso 33 V.N.?
5 Tuga a Maria, ne logona hifo fakatagata he aposetolo ko Peteru e gahuahua malolō he agaaga tapu he Atua ato hoko e Penetekoso 33 V.N. Ne age e Iesu ki a ia mo e falu aposetolo e pule ke vega e tau temoni. (Mare. 3:14-16) Ti pete ne nakai foaki he tau Tohiaga Tapu e loga he tau vala tala matafeiga, kua tuga na fakaaoga e Peteru e pule ia. Ne fakakite foki e malolō he Atua he magaaho ne uiina e Iesu a Peteru ke fina age ki a ia i luga he Vai ko Kalilaia, ti taute pihia e Peteru. (Totou Mataio 14:25-29.) Kitia maali ai, ne falanaki a Peteru ke he agaaga tapu ke lagomatai a ia ke taute e tau gahua lalahi. Nakai leva ko e agaaga ia to gahuahua ki luga a Peteru mo e tau tutaki haana ke he tau puhala foou.
6. Puhala he agaaga he Atua, ko e heigoa ha Peteru kua maeke ke taute he mogoia mo e he mole e Penetekoso 33 V.N.?
6 He Galue he Penetekoso 33 V.N., kua age ki a Peteru mo e falu e lotomatala fakamana ke matutaki ke he tau vagahau ne vagahau he tau tagata ahiahi ki Ierusalema. Ati, takitaki e Peteru e tutala atu ke he toloaga. (Gahua 2:14-36) E, ko e tagata nei ne ohooho po ke matakutaku he falu magaaho ne loto malolō ke fakamatala fakamalolō pete ne tau fakamatakutaku mo e favaleaga. (Gahua 4:18-20, 31) Ne moua e ia e iloilo he fakakiteaga faka-Atua. (Gahua 5:8, 9) Ti kua foaki foki ki a ia e malolō ke taute e liu tu mai.—Gahua 9:40.
7. Ko e heigoa e tau fakaakoaga ha Iesu ne maama laia e Peteru he mole e fakauku haana?
7 Ato hoko foki ke he Penetekoso, ne maama e Peteru e tau kupu mooli loga ne fakaako e Iesu. (Mata. 16:16, 17; Ioane 6:68) Ka e ha ha i ai e tau vala he tau fakaakoaga ha Iesu ne malokiloki agaia ki a ia ato hoko e Penetekoso. Tuga anei, ne nakai iloa e Peteru to fakaliu tu mai e Keriso ko e agaaga he aho ke toluaki; po ke maama e Peteru ko e Kautu to haia he lagi. (Ioane 20:6-10; Gahua 1:6) Ko e manatu kua eke e tau tagata mo tau mena momoui fakaagaaga mo e pule ai ke he Kautu he lagi ne matakehe ki a Peteru. He papatiso a ia ke he agaaga tapu ti foaki age e amaamanakiaga he lagi, ne maama e ia e kakano he tau fakaakoaga a Iesu ke he tau manatu ia.
8. Ko e heigoa e iloilo ka moua e lautolu ne fakauku mo lautolu e ‘tau mamoe kehe’?
8 Ko e maamaaga ne nakai moua he tau tutaki a Iesu he magaaho fakamua kua moua laia he mole e liligi hifo he agaaga tapu. He agaaga, ne fakamau he tau tagata tohia he Tau Tohiaga Tapu Heleni Kerisiano—ke lata mo e aoga ni ha tautolu—ko e tau vala ofoofogia he finagalo ha Iehova. (Efeso 3:8-11, 18) He vahā nei ko lautolu ne fakauku he agaaga mo lautolu e ‘tau mamoe kehe’ ne fagai fakalataha fakaagaaga, he fakaputuputu foki e tau kupu mooli nei. (Ioane 10:16) Tokiofa nakai e koe e iloilo mo e maama he Kupu he Atua kua fakatoka mai he agaaga tapu ki a koe?
Ko Paulo kua ‘Puke Foki he Agaga Tapu’
9. Ko e heigoa ne maeke ia Paulo ke taute he puhala he agaaga tapu?
9 Kavi ke he taha e tau he mole e Penetekoso 33 V.N., fai tagata foki ne moua e mena fakaalofa he Atua ko e agaaga tapu. Ko Saulo a ia ne iloa ai ko Paulo. Ne gahuahua e agaaga ki a ia he tau puhala kua aoga ki a tautolu he vahā nei. Kua omoomoi e aposetolo ko Paulo ke tohia 14 e tohi he Tohi Tapu. Tuga he tupu ai ki a Peteru, ne fakamalolō he agaaga he Atua a Paulo ke maama mo e tohi hifo fakamaaliali hagaao ke he amaamanakiaga he moui nakai liu ke mate mo e nakai popo ke he lagi. He agaaga tapu, ko Paulo ne fakamaulu, vega e tau temoni, mo e fakaliu tū mai foki a lautolu ne mamate! Ka ko e malolō ne moua he puhala he agaaga tapu ne lahi atu e aoga he kakano, ko e malolō ne moua he tau fekafekau oti he Atua he vahā nei, ka e nakai fakamana.
10. Maeke fēfē e agaaga tapu ke lauia e iloilo ha Paulo ke vagahau?
10 Ko Paulo ne ‘puke foki he Agaga Tapu,’ nukua vagahau fakamalolō he totoko ke he tagata taulatua. Kua lauia mooli e mena ia ke he ikipule ne mua ha Kuperu, ne fanogonogo ke he fakatutalaaga katoa! Ko e iki ia ne pule kua talia e kupu mooli, he ‘ofomate a ia ke he tau kupu ha Iehova.’ (Gahua 13:8-12) Maaliali ai, ne iloa mitaki e Paulo e aoga he agaaga tapu he Atua ka tutala ai ke he kupu mooli. (Mata. 10:20) Ne ole a ia fakamui ke he fakapotopotoaga i Efeso ke olelalo ma haana ke he ‘iloilo ke vagahau’ kua liga foaki atu kia ia.—Efeso 6:18-20.
11. Takitaki fēfē a Paulo he agaaga he Atua?
11 Nakai ni fakamalolō he agaaga tapu a Paulo ke vagahau, ka e he falu magaaho kua hataki a ia ke nakai vagahau he tau matakavi pauaki. He fano a Paulo he tau fenoga misionare haana, ne takitaki he agaaga he Atua a ia. (Gahua 13:2; totou Gahua 16:6-10.) Takitaki agaia e Iehova e gahua fakamatala puhala he haana agaaga. Tuga a Paulo, ko e tau fekafekau omaoma oti a Iehova kua fakamakamaka ke fakapuloa e kupu mooli mo e fakamalolō mo e fakamakutu. Pete ne takitakiaga he Atua kua nakai maaliali he vahā nei tuga he vahā a Paulo, maeke ia tautolu ke mauokafua kua fakaaoga e Iehova e agaaga tapu haana ke logona e lautolu ne kua latatonu e kupu mooli.—Ioane 6:44.
“Kehekehe Foki e Tau Mana”
12-14. Kua gahuahua kia e agaaga he Atua ke he tau fekafekau oti he puhala taha? Fakamaama.
12 Kua foaki kia he tau tala ke he fakamonuina ha Iehova a lautolu kua fakauku he fakapotopotoaga he senetenari fakamua e fakamalolōaga mua ue atu ke he tau fekafekau tukulele he Atua he vahā nei? Nakai fakauaua ai! Tokaloto e tau kupu omoomoi a Paulo ke he fakapotopotoaga i Korinito hagaao ke he tau mena fakaalofa fakamana he agaaga he vahā haana: “Kua kehekehe e tau mena fakaalofa, ka e taha ni e Agaga; kua kehekehe foki e tau fekafekauaga, ka e taha ni e Iki; kua kehekehe foki e tau mana, ka e taha ni e Atua, ko ia kua gahua ke he tau mena oti ke he tau tagata oti kana.” (1 Kori. 12:4-6, 11) E, maeke he agaaga tapu ke gahuahua he tau puhala kehekehe ke he tau fekafekau kehekehe he Atua ha kua fai kakano. Mooli, ko e agaaga tapu kua hafagi ke he “fuifui mamoe gahoa” he Keriso mo e ke he haana a ‘tau mamoe kehe.’ (Luka 12:32; Ioane 10:16) Ka e, nakai gahuahua tumau ai ke he puhala tatai ke he tau tagata takitaha he fakapotopotoaga.
13 Tuga anei, ko e tau motua kua kotofa he agaaga tapu. (Gahua 20:28) Ka e nakai eke oti a lautolu ne fakauku he agaaga mo tau leveki he fakapotopotoaga. Ti ko e heigoa ha tautolu ka fakaako mai he mena nei? Kua gahuahua e agaaga he Atua ke he tau puhala kehekehe ke he tau tagata he fakapotopotoaga.
14 Ko e agaaga ne fakatupu i loto ha lautolu ne fakauku ko e “[a]gaga ke hiki tama,” po ke tuga e fanau haana, ko e agaaga taha ia ne fakatū hake e Iehova e Tama fuataha haana mai he mate ke he moui tukulagi he lagi. (Totou Roma 8:11, 15.) Ko e agaaga taha ia ne tufuga e Iehova e lagi mo e lalolagi katoatoa. (Kene. 1:1-3) He agaaga tapu taha ia, ne taute e Iehova a Pesaleli ke lata ma e gahua uho ke he faituga, foaki e malolō ki a Samisoni ke taute e tau gahua kua felauaki mo e malolō, ti fakamalolō a Peteru ke fano he fuga vai. Ti ko e mena ia kua lata ia tautolu ke nakai fakagogoa he moua e agaaga he Atua mo e fakauku he agaaga he Atua, ko e vala fakahiku ko e taha ni he gahuahuaaga uho he agaaga. Ko e fakauku he agaaga kua fakavē ke he fifiliaga he Atua.
15. To matutaki tukulagi nakai e papatisoaga he agaaga tapu? Fakamaama.
15 Ko e malolō gahuahua tapu he Atua kua gahuahua ke he tau puhala kehekehe ke he tau fekafekau fakamooli haana tali mai ni he fai fekafekau fakamooli a ia, ē, ke he afe e tau tau ato kamata e fakauku he agaaga. He Penetekoso 33 V.N., kua kamata e gahuahuaaga foou ia, ka e to nakai tumau tukulagi ai. Ko e papatisoaga he agaaga to fakaoti, ka ko e agaaga tapu to gahuahua tumau ke he tau tagata he Atua ke maeke a lautolu ke taute e finagalo haana ke hoko ke he tukulagi.
16. Ko e heigoa kua taute he tau fekafekau he Atua mogonei he puhala he agaaga haana?
16 Ko e heigoa pauaki hane tupu mogonei he lalolagi he puhala mai he agaaga tapu a Iehova? Tali he Fakakiteaga 22:17: “Kua pehe mai foki e Agaga mo e kitofaitane, Ati hau ā; kia pehe atu foki a ia kua fanogonogo, Ati hau ā; ko ia foki kua fia inu kia hau a ia, katoa foki mo ia kua manako ki ai, kia uta noa e ia e vai he moui.” He omoomoi he agaaga he Atua, ko e tau Kerisiano he vahā nei kua tufatufa atu foki e uiina foaki moui a Iehova ki a “ia kua manako ki ai” ke talia e vai he moui. Kua takitaki he tau Kerisiano fakauku he taute e mena nei. Ka ko lautolu e tau mamoe kehe kua fakalataha ke tufatufa he uiina nei. Kua kaufakalataha e ua e vahega mo e agaaga tapu taha ia ke taute e gahua nei. Ko lautolu he tau vahega ua ia kua fakamailoga e tukuleleaga ha lautolu ki a Iehova he papatiso “ke he higoa he Matua, mo e Tama, mo e Agaga Tapu.” (Mata. 28:19) Ti talia oti a lautolu ke he gahuahuaaga he agaaga he Atua ke he tau momoui ha lautolu, he fakaatā ai ke fai fua mai ia lautolu. (Kala. 5:22, 23) Tuga a lautolu ne fakauku, kua fakaatā he tau mamoe kehe e agaaga he Atua ke lagomatai a lautolu. Mo e lagomatai ai, kua taute e lautolu e tau mena oti ke felauaki mo e tau poakiaga a Iehova he tapuina.—2 Kori. 7:1; Fakakite. 7:9, 14.
Kia Ole ma e Agaaga Tapu
17. Maeke fēfē a tautolu ke fakamooli kua moua e tautolu e agaaga he Atua?
17 Ti ka eke ko e amaamanakiaga haau ne foaki atu he Atua ko e moui tukulagi ke he lagi po ke he lalolagi, maeke ia Iehova ke foaki ki a koe e “lahi ue atu he malolo” ke maeke a koe ke fakatumau e mahani fakamooli mo e moua e palepale haau. (2 Kori. 4:7) Ko e fakatumau haau ke fakamatala he tala mitaki he Kautu ka tupu e vaiga. Ka e manatu “ka ekefakakelea a mutolu ha ko e higoa a Keriso, uhoaki a mutolu, ha kua nofo mau ia mutolu e Agaga lilifu he Atua; kua vagahau kelea e lautolu kia ia, ka kua fakaheke e mutolu.”—1 Pete. 4:14.
18, 19. To lagomatai fēfē e Iehova a koe puhala he agaaga tapu haana ti ko e heigoa e fifiliaga haau ke he mena nei?
18 Ko e agaaga tapu ko e mena fakaalofa noa he Atua ki a lautolu kua kumi fakamooli ki ai. Maeke ai ke fakatupu ki mua e tau lotomatala haau pihia foki mo e haau a manako ke taute katoatoa e fekafekauaga haana. “Ko e Atua ni, kua gahua ki loto ia mutolu ke tupu ai e loto ke he hana finagalo fakaalofa, kia gahua foki ki ai.” Ko e mena fakaalofa uho he agaaga tapu, fakalataha mo e tau laliaga fakamakamaka ha tautolu ke fakatumau e ‘taofi e kupu ke momoui ai,’ ka fakaatā a tautolu “kia gahua ni a [t]autolu mo e matakutaku mo e vivivivi, kia momoui ai a [ta]utolu.”—Filipi 2:12, 13, 16.
19 Fakalataha mo e mauokafua katoatoa ke he agaaga he Atua, hagaaki e loto haau ke he tau matagahua takitaha, kia lotomatala ke he mena kua tuku atu ki a koe ke taute, ti ono atu ki a Iehova ma e lagomataiaga. (Iako. 1:5) To foaki atu e ia ki a koe e mena kua lata ke maama e Kupu haana, fahia ke he tau lekua he moui, mo e fakamatala e tala mitaki. “Kia ole atu a mutolu, ti foaki mai ai kia mutolu; kia kumikumi a mutolu, ti moua ai e mutolu; kia tukituki atu a mutolu, ti vevete mai ai kia mutolu,” ti putoia he mena nei e moua he agaaga tapu. (Luka 11:9, 13) Mooli, fakatumau ke olelalo ki a Iehova ke maeke a koe ke tuga a lautolu ne tua fakamooli—lautolu i tuai mo e vahā nei—ne takitaki he agaaga tapu he Atua.
Maeke Nakai a Koe ke Fakamaama?
• Tuga a Maria, ko e heigoa e aga ka fakakite e tautolu ka tamai e tau monuina?
• Ke he puhala fe kua takitaki a Paulo he agaaga he Atua?
• Takitaki fēfē he agaga he Atua e tau fekafekau he Atua he vahā nei?
[Fakatino he lau 24]
Lagomatai he agaaga he Atua a Paulo ke kautū ke he fakaohoohoaga he tau agaaga kelea
[Fakatino he lau 26]
He vahā nei, kua hafagi e agaaga tapu ke lagomatai e tau Kerisiano, pete ne amaamanakiaga ha lautolu