Ko e Kolo Toko mo e Awake!—Tau Senolo he Kupu Moli he Magaaho Tonu
“Kua fakamoui e koe au, ma Iehova na e, ko e Atua [“kupu moli,” NW].”—SALAMO 31:5.
1, 2. (a) Fefe e mena ne logona hifo he matakainaga fifine ha ko e taha mena ne totou e ia i loto he The Watchtower? (e) Ko e heigoa e tau huhu ne huhu hagaao ke he tau senolo ha tautolu?
“FAKAAUE lahi mahaki,” he tohia he matakainaga fifine Kerisiano, “ma e fakailoaaga homo lahi mahaki i loto he tala he The Watchtower ‘Maeke ia Koe ke Moua e Fakamafanatiaaga he Tau Vaha Fakaatukehe.’a Kua loga lahi e tau matapatu manatu ne talahau e koe ne tatai mo e tau logonaaga ne kua eke ni au ke gahua ki ai; ti kua tuga ko e tohi pauaki mai ni e tala nei ki a au. Ti ko e magaaho fakamua ne totou e au, kua ha ha he tau mata haku e tau hihina mata. Kua homo lahi ha, he iloa ko e iloa foki he taha tagata e mena ne logona hifo e au! Kua fakaaue lahi ne loto haku ha ko e taha he Tau Fakamoli a Iehova. To maeke foki a tautolu ke moua mai i fe e tau maveheaga ke he moui tukulagi he Parataiso he vaha i mua mo e he magaaho nai, ko e lolo fakamafana ma e tau solu ha tautolu! Fakaaue lahi. Ke miliona e tau magaaho, fakaaue lahi.”
2 Kua logona hifo nakai e koe e mena pihia? Kua eke nakai e taha mena i loto he Ko e Kolo Toko po ke senolo fakahoa hana, ko e Awake!, ke tuga ko e tohia pauaki ni mau? Ti ko e heigoa he tau mekasini ha tautolu ne kua loto e tau tagata ki ai? Kua maeke fefe ia tautolu ke lagomatai e falu ke moua mai e aoga he fekau fakahao moui ne toka ia lautolu?—1 Timoteo 4:16.
Tau Mekasini ne Lagomatai e Kupu Moli
3. Ko e heigoa e kakano mitaki ne kua amotia ai he tau mekasini Ko e Kolo Toko mo e Awake! e tau loto he tau tagata tokologa ne totou tohi?
3 Ko Iehova “ko e Atua [“kupu moli,” NW].” (Salamo 31:5) Ko e hana Kupu, ko e Tohi Tapu, ko e tohi he kupu moli. (Ioane 17:17) Ne talia he tau tagata loto fakamoli e kupu moli. (Fakatatai Ioane 4:23, 24.) Taha e kakano ne kua amotia he Ko e Kolo Toko mo e Awake! e tau loto he tau tagata miliona ne totou ai, ha ko e tau senolo fakamoli mo e he kupu moli a laua. Ko e moli hanai, ko e matakupu ni ke he mahani fakamoli ke he kupu moli he Tohi Tapu ati kamata ai e Ko e Kolo Toko ke lomi fakailoaaga.
4, 5. (a) Ko e heigoa e tau tutuaga ne takitaki aki a C. T. Russell ke lomi fakailoa ai e Watch Tower? (e) Ne fakaaoga fefe he “tupa fakamoli mo e lotomatala” e senolo Kolo Toko?
4 He tau 1876, ne taute ai a Charles T. Russell ke kaugahua mo Nelson H. Barbour, mai i Rochester, i New York. Ne foaki e Russell e tau tupe ke liu e tohi lotu fakavaha a Barbour ko e Herald of the Morning ke lolomi, ti ko e matapatu etitoa a Barbour ka ko e etitoa lagomatai a Russell. He magahehala he taha mo e hafa e tau ne mole ai, kua toka i loto he fufuta tohi he Herald ia Aokuso, he tau 1878, e tala ne tohi e Barbour kua fakatikai ne kakano he liuaki maiaga uho he mate a Keriso. Ka ko Russell, kua teitei ke 30 e tau tau he tote hifo ia Barbour, ne tali aki ai i loto he fufuta tohi ne mui mai taha i tua, e tala kua lagaki hake e lukutoto, ko e mena ne hagaao a ia ki ai ko e “taha he tau fakaakoaga kua mua atu e aoga lahi he Kupu he Atua.” (Mataio 20:28) He mole he lali lagaloga ke fakamaama atu mai he Tohiaga Tapu ki a Barbour, kua fakahiku ai ni e fifiliaga a Russell ke mumutu kehe katoatoa e tau pipiaga mo e Herald. Kua kamata mai ai he fufuta senolo ia Iuni he tau 1879 e higoa a Russell, ke nakai tohi i ai ko e etitoa lagomatai. He mole e mahina he magaaho fakamui ne kamata a Russell kua 27 hana tau tau he moui, ke lomi fakailoa e Zion’s Watch Tower and Herald of Christ’s Presence (ne kua iloa he magaaho nei Ko e Kolo Toko Fakapuloaaga he Kautu a Iehova), ne kua taute mai he kamataaga ke lagaki hake e kupu moli he Tohiaga Tapu, tuga e lukutoto.
5 Mai he 114 e tau tau kua mole, kua tuga ne loea iloilo lahi e Ko e Kolo Toko, kua fakatu hake na ia ke papale e kupu moli mo e fakaakoaga he Tohi Tapu. Ti ko e mena ne moua mai kua miliona e tau tagata totou, ne tuku atu e tau loto mauokafua ki a ia. Kua malolo lahi agaia he lago ke he lukutoto. (Kikite ke he fakataiaga he fufuta tohi he The Watchtower ia Fepuali 15, 1991 [Ko e Kolo Toko, Mati 1, 1991].) Mo e taute tumau a ia mo matapatu kanavaakau he “tupa fakamoli mo e lotomatala” mo e hana Kaufakatufono he fakailoa atu e Kautu a Iehova kua fakatu mo e ke tufatufa foki e tau mena kai fakaagaga “he tau magaaho tonu.”—Mataio 24:14, 45, NW.
6, 7. Ko e heigoa e folia he The Golden Age, ne talahau mai, mo e fakakite mai he heigoa kua talia he tau tagata manamanatu hana fekau?
6 Ka e kua e mekasini Awake!? Mai he hana a kamataaga, ne lagomatai foki he Awake! e kupu moli. Ne fakahigoa ai he magaaho fakamua ko e The Golden Age, kua talaga ne mekasini nei ke tufatufa ke he tau tagata. Hagaao ke he hana foliaga, kua talahau mai he fufuta tohi fakamua, ne fakaaho ki a Oketopa 1, he tau 1919: “Ko e foliaga hana a nai, ke fakamaama mai he maama he pulotu Fakaatua e kakano moli he tau mena tutupu kehe lahi he vaha nei, mo e fakakite moli ke he tau loto manamanatu, mai he tau fakamoliaga nakai hikihikifano mo e nakai mahalohalo, kua eke ne vaha monuina lahi mahaki he tau tagata ke tata lahi mai he magaaho nei.” Ko e tau tagata manamanatu ne talia e fekau i loto he The Golden Age. Kua loga e tau tau, ne kua lahi mahaki foki hana tufa vikoaga mai he Ko e Kolo Toko.b
7 Pete ni ia, kua to muatua ne fulufuluola he Ko e Kolo Toko mo e Awake! mai he mena moli ko e fakailoa e lautolu e tau matapatu fakaakoaga moli mo e fakamaama e kakano fakaperofeta he tau tutuaga he lalolagi. Mua atu ke he taha po ke ua e hogofulu tau ne kua mole laia, ne tapaki he tau mekasini ha mautolu e tau loto he tau tagata ke he taha kakano foki.
Tau Tala he Magaaho Tonu ne Amotia e Tau Momoui he Tau Tagata
8. Ko e heigoa e hikiaga tohi ne taute e Iuta, ne fakaohooho ke he hana tau tagata totou tohi ke totoko ke he tau malolo fefe i loto he fakapotopotoaga?
8 Magahala he 30 e tau tau ne mole he mate mo e liu tu mai a Iesu Keriso, ne fehagaaki e tagata tohia Tohi Tapu ko Iuta mo e tutuaga uka lahi. Kua fakamatomo mai e tau tagata tane mahani kelea ne aga tuga e tau manu ke he vahaloto he tau Kerisiano. Ne manako a Iuta ke tohi ke he tau faoa Kerisiano hagaao ke he matapatu fakaakoaga—ko e fakamouiaga ne ha ha oti he tau Kerisiano fakauku. Ka e kehe, he takitaki he agaga tapu, kua kitia e ia kua lata lahi ni ke ole fakamakamaka ke he hana tau tagata totou tohi ke totoko ke he tau malolo kelea i loto he fakapotopotoaga. (Iuta 3, 4, 19-23) Ne hiki a Iuta ke lata mo e tuaga mo e foaki atu ai e fakatonuaga he magaaho tonu ne fakafeleveia aki e tau mena kuku he hana tau matakainaga Kerisiano.
9. Putoia e heigoa ke foaki mai e tau tala he magaaho tonu ma e tau senolo ha tautolu?
9 Ke tuga e mena ia, ko e matagahua uka ke tauteute tuai e tau tala he magaaho tonu ma e ha tautolu a tau senolo. Fa hikihikifano e tau mena he tau magaaho, mo e pihia foki ni e tau tagata—ko e ha lautolu a tau mena kuku mo e ha lautolu a talia fiafia kua nakai tuga e tau mena he taha po ke ua e hogofulu tau kua mole. Kua kitia he leveki faifano he magaaho ku kua mole: “I tuai he magaaho ne eke ai au mo Fakamoli he atu tau he 1950, kua eke ne onoonoaga ha mautolu ke he fakaakoaga Tohi Tapu mo e tau tagata, ke matapatu ni ke he tau fakaakoaga—ke fakaako ki a lautolu e kupu moli hagaao ke he Tolu Taha, afi a helo, ko e solu, mo e falu mena foki. Ka ko e magaaho nei, kua tuga, kua loga e tau mena vihi mo e tau mena uka ne ha ha he tau momoui he tau tagata, ti kua lata na tautolu ke fakaako ki a lautolu ke momoui fefe.” Ko e ha, ne pihia ai e mena nei?
10. Ko e ha, kua nakai lata a tautolu ke ofo kua tolomakina e tau mena he tagata tali mai he tau 1914?
10 Hagaao ke he “tau aho fakamui,” ne talahau tuai mai he Tohi Tapu: “Ka ko e tau tagata mahani kelea mo e tau tagata kua fakavai, to tolomaki atu a lautolu ke au atu he kelea, kua fakahehe atu ti fakaheheina foki a lautolu.” (2 Timoteo 3:1, 13) Ha ko e mena ia, kua nakai lata a tautolu ke ofomate he tolomakina tumau ne tau mena he tagata tali mai he magaaho ne kamata ai e fakahikuaga he tau 1914. Ka ko Satani, ha kua tote lahi hana magaaho ne toe, kua to ai tuai hana ita ke he kaufakalatahaaga he tagata, tuga kua nakai la pihia tali mai he vaha fakamua. (Fakakiteaga 12:9, 12) Ko e fua ne moua, kua kehe muitui ne mahani mo e tau mena uho he magafaoa mai he 30 po ke 40 e tau tau kua mole. Kua tokologa e tau tagata kua nakai hagahaga fakalotu ke tuga he vaha fakamua. He tolomaki e holifono kua taute he tau tagata e tau puipuiaga ne kua nakai iloa ke he 20 po ke 30 e tau tau kua mole.—Mataio 24:12.
11. (a) Ko e heigoa e tau tala ne ha ha he tau loto manamanatu he tau tagata, mo e gahua fefe e vahega he tupa fakamoli mo e loto matala ke he tau mena kua lata ai? (e) Mo fakataiaga, talahau la taha tala he Ko e Kolo Toko po ke Awake! ne kua amotia hau a moui.
11 Kua nakai ofo ai mogoia, kua ha ha e tau mena he logonaaga, tau matakupu he kaufakalatahaaga mo e magafaoa ke he tau loto manamanatu he tau tagata tokologa. Kua loto fakamalolo e vahega tupa fakamoli mo e loto matala ke gahua mai he Ko e Kolo Toko mo e Awake! he lomi fakailoa mai e tau tala he magaaho tonu kua gahua tonu ke he tau mena kuku moli he tau tagata mo e kua amotia moli e tau momoui ha lautolu. Kia manamanatu la ke he falu fakataiaga.
12. (a) Tauteute he ha e tau tala hagaao ke he tau magafaoa ne taha ne matua, ma e The Watchtower he tau 1980? (e) Ne fakailoa fefe he taha matakainaga fifine hana loto fakaaue ma e tau tala ke he tau magafaoa ne taha ne matua?
12 Tau matakupu fakamagafaoa. He magaaho ne fakakite mai he hokotaki he lalolagi katoa kua holo mafiti lahi ki mua e numela he tau magafaoa ne tokotaha ne matua, ati kua tauteute tuai e tau tala kua veveu hake fou e matapatu manatu “Tau Magafaoa Matua Tokotaha—Kua Kautu ke he Tau Mena Vihi” ma e fufuta tohi he The Watchtower ia Sepetema 15, he tau 1980. Kua fakafahi ua e kakano he tau tala: (1) ke lagomatai e tau mamatua ne nonofo tokotaha ke kautu mai he tau mena vihi lahi ne fehagaaki mo lautolu mo e (2) ke lagomatai e falu ke iloa mena lahi, ke maeke ai a lautolu ke fakakite e “logonaaga amotia ke he taha tagata” mo e “leveki” e tau magafaoa ne tokotaha ne matua. (1 Peteru 3:8; Iakopo 1:27, NW) Kua tokologa e tau tagata totou ne tohi ke talahau e tau fakaaue ma e tau tala. “Ne tamai moli e tau hihina mata ke he haku tau mata he magaaho ne kitia e au e kilitohi,” he tohi mai he taha matua nofo tokotaha, “mo e he magaaho ne afagi e au e mekasini mo e totou e fakailoaaga, ne puapua lahi haku loto fakaaue ki a Iehova he foaki mai e tau fakailoaaga pihia he magaaho tonu.”
13. Ko e heigoa e fakatutalaaga fakahokulo ke he fakaagitau ne lomi fakailoa ai i loto he Awake! he tau 1981, mo e heigoa ne talahau mai he taha tagata totou tohi kua hagaao ki ai?
13 Tau matakupu ke he loto logonaaga. Kua fita e tau tala he Ko e Kolo Toko mo e Awake! he fakatutala ke he fakaagitau tali mai he atu tau he 1960. (1 Tesalonia 5:14) Ke he Vala tala he kilitohi “Maeke Ia Koe ke Tau ke he Fakaagitau!” kua taute e onoonoaga fou mo e mitaki i loto he Awake! ia Sepetema 8, he tau 1981. Kua nakai leva ne maligi atu e tau tohi fakaaue ke he Kaufakalatahaaga he Kolo Toko mai he lalolagi katoa. “Kua maeke fefe ia au ke fakailoa atu he lau pepa e tau logonaaga i loto he loto haku?” he tohi mai e taha matakainaga fifine. “Kua 24 e tau tau he moui haku, mo e mai he hogofulu e tau tau kua mole, kua loga e tau vaha fakaagitau ne moua e au. Ka ko e magaaho nei kua logona e au kua tata lahi au ki a Iehova mo e fakaaue lahi e loto he tali e ia e tau mena kua lata ai mo e tau tagata fakaagitau ne moua mai ai he tau tala fakaalofa nei, mo e manako au ke tala atu ki a mutolu e mena ia.”
14, 15. (a) Kua taute fefe e tala ke he ekefakakelea tama tote i loto he senolo ha tautolu? (e) Ko e tau tala he mekasini fe, kua nava e tagata feua hekenua i Ausetalia?
14 Tau matakupu he kaufakalatahaaga. Ne talahau tuai mai he Tohi Tapu to ha ha he “tau aho fakamui” e tau tagata kua “ofaofa [ne lautolu] a lautolu ni . . . to nakai fai fakaalofa . . . to nakai taofi e tau manako he tino, to mahani favale, nakai loto ke he mitaki.” (2 Timoteo 3:1-3) Ha ko e mena ia, kua nakai lata ai a tautolu ke ofo kua fa taute tumau e mahani ekefakakelea tama tote ti ko e mena laulahi mahaki he vaha nei. Kua nakai fio e tau kupu ne kua taute ke he tala nei, ko e “Lagomataiaga ma Lautolu ne Matekelea he Feuaki e Faoa Toto Tata” i loto he The Watchtower ia Oketopa 1, he tau 1983. He valu e tau tau ne mole, ko e taha vala tala mai he kilitohi “Fakamaulu e Tau Kafokia he Ekefakakelea Tama Tote” i loto he Awake! ia Oketopa 8, he tau 1991, ko e mena kua tauteute fakamitaki lahi ke foaki mai e maamaaga mo e amaamanakiaga ma lautolu ne matekelea mo e ke fakaloto maama ai falu ke maeke a lautolu ke aoga e tau lagomataiaga ka foaki. Ko e tau valavala tala nei ne futiaki lahi mai e tau tali he tau tagata totou ne kua nakaila pihia he vaha fakamauaga tuai he senolo ha mautolu. Ne tohia he taha tagata totou: “Ko e omoiaga lahi mahaki ke he haku a fakamaloloaga e tau manamanatu fakamafanatia mo e tau kupu Tohiaga Tapu i loto he tau tala nei. Ti kua lofia lahi mahaki e hauhauaga he iloa kua nakai matulutulu hifo ha Iehova a manamanatu ki a au. Mo e tatai pihia foki ni e fakamafanatiaaga he iloa ko e nakai ko au ni hokoia.”
15 Ne hea telefoni mamao e taha tagata feua hekenua i Melbourne, i Ausetalia, ke he ofisa he Kaufakalatahaaga Kolo Toko i Sydney, ke talahau hana vihiatia lahi ke he tau mena ne ha ha he tutuaga laga nua. Ne pehe a ia, ko e oti laia hana totou he Awake! ia Mati 8, 1993, “Fakapilo Pulenoa—Ko e Mohemiti Kelea he Fifine,” mo e nakai maeke ke tali tonu ko e fai mekasini uho pihia kua maeke ke moua. Ne 30 e tau minuti ne huhu e ia e tau huhu mo e fiafia lahi he logona e tau tali kua tala age ki a ia.
16. Ko e heigoa e tau puhala kua maeke ia koe ke fakakite hau a loto fakaaue ma e tau senolo ha tautolu?
16 Ka e kua a koe? Amotia nakai hau a moui, he taha tala pauaki ne lomi fakailoa i loto he Ko e Kolo Toko mo e Awake!? Kaeke kua pihia, kua nakai fakauaua kua logona ai ni e koe e fakaaue lahi mahaki ke he tau senolo ha mautolu. To maeke fefe ia koe ke fakakite hau a loto fakaaue? He totou fakamoli e koe e tau fufuta tohi takitaha. Maeke foki ia koe ke kau auloa ke tufatufa fakalahi e tau senolo uho nei ke he mena kua maeke ke uta ki ai. Maeke fefe ke taute e mena nei?
Tufatufa a Lautolu ke he Falu!
17. Ko e heigoa kua maeke e tau fakapotopotoaga ke taute ke fakaholo ki mua e tufaaga viko he mekasini?
17 Ke fakamua aki, kua ha ha i ai e taha mena kua maeke e tau fakapotopotoaga takitaha ke taute. Ko e fufuta tohi he Informant (ko e Our Kingdom Ministry he magaaho nei) ia Oketopa he tau 1952 ne pehe: “Kua lauia mitaki e puhala tufatufa mekasini mai he taha fale ke he taha fale mo e mai he taha fale koloa ke he taha fale koloa. Ha kua pihia, kua talahau mai e Kaufakalatahaaga kua lata ke eke mo vala gahua tumau he Aho Mekasini e tau puhala tufatufa mekasini nei.” Kua aoga agaia e tomatomaaga nai he vaha nei. Maeke he tau fakapotopotoaga ke fakatoka e Aho Mekasini tumau, ko e aho kua tuku kehe pauaki ma e fakamoliaga he tau mekasini. Ke he tau fakapotopotoaga loga, kua nakai tuai fakauaua ko e tau magaaho mitaki e tau aho Faiumu ne fakatoka pauaki. E, kia toka kehe he tau fakapotopotoaga e tau aho pauaki po ke tau afiafi ma e gahua fakamatala mekasini—mai he taha fale ke he taha fale, mai he taha fale koloa ke he taha fale koloa, ke he gahua puhala tu, mo e tau lala tufa mekasini. Ke lafi ki ai, ko e heigoa kua maeke ia koe, ko e tagata fakailoa he Kautu, ke taute ke lagomatai aki e holo ki mua he tufaaga viko he mekasini?
18, 19. (a) He iloa e Ko e Kolo Toko mo e Awake! ti kua maeke fefe ke lagomatai aki a koe ke tufa e tau mekasini? (e) Kua aoga lahi he ha e fakailoaaga fakaku, ne talahau fakatonu e manatu, ka foaki e tau mekasini? (i) Ko e heigoa kua fakakite mai kua aoga lahi ke hohoko e tau mekasini ke he tau kaina he tau tagata?
18 Ko e lakaaga fakamua kia iloa e “Ko e Kolo Toko” mo e “Awake!” Totou tuai e mekasini. He totou e koe e tau tala takitaha, huhu hifo ki a koe ni, ‘Ko hai ka loto fiafia ke he tala nei?’ Manamanatu ke he falu kupu gahoa kua maeke ia koe ke talahau ke fakalagalaga aki e talia fiafia ke he tala. Ke fakalahi atu he fano ni ke lagomatai e Aho Mekasini tumau, ko e ha he nakai uta ai mo koe e tau lagakiaga tohi ke maeke ai a koe ke fakaaoga e tau magaaho oti ne moua ke tufatufa a lautolu ke he falu tagata—ka o fenoga po ke o fakatau mo e he magaaho ka tutala ke he kaugahua, tau katofia, tau tama aoga, po ke tau faiaoga?
19 Ka ko e kupu lagomatai ke ua aki, kia taute fakamukamuka. Ne talahau mai he The Watchtower ia Tesema 1, he tau 1956: “Kua mua atu e fakailoaaga fakaku, ne talahau fakatonu e manatu ka foaki e tau mekasini. Ko e foli tuai hanai, ke loga lahi e tau lagakiaga kua tufatufa. To taute ne lautolu ha lautolu a ‘fakatutalaaga.’” Kua kitia he falu tagata fakailoa kua lauia mitaki e mena ka taha ne manatu ne fifili mai he taha tala, ti tuku ai ke he tau kupu gahoa, mo e foaki e tau mekasini. He magaaho ka hohoko ki loto he loto kaina, to “tutala” e tau mekasini ke he falu tagata kehe foki mai ia ia ne uta e tau tohi ia koe. Ne totou he tama aoga fuata ne fano he aoga tokoluga atu i Ailani e fufuta tohi he Ko e Kolo Toko ia Sepetema 1, he tau 1991, ko e mena talia he hana matua tane mai he taha Fakamoli. Ko e tau tala ke he matutakiaga mo e falu tala foki ne fakaalagia mai hana loto fiafia. He mogoia ni ne oti he totou e ia e mekasini, ne telefoni atu a ia ke he Tau Fakamoli, he hea e numela ne tohi he tohi telefoni. Ati kua nakai leva kua kamata ne fakaakoaga Tohi Tapu, mo e papatiso ai e fifine fuata he Fonoaga Fahi Motu ko e “Fakaakoaga Fakaatua,” ia Iulai he tau 1993. Kua moli tuai, kia taute ai a tautolu ke hohoko atu e tau mekasini ki loto he tau loto kaina, ke maeke ai a lautolu ke “tutala” ke he tau tagata! Ne foaki he taha leveki faifano e taha kupu lagomatai mukamuka foki: “Aaki mai e tau mekasini he kato tuku tohi hau.” Kua moli, kaeke kua nakai maeke he mena ne talahau e koe ke fakalagalaga e loto fiafia he tagata he loto kaina, kua liga ko e fakatino fulufuluola he kilitohi ha lautolu ati kua uta ai e tau mekasini ia koe.
20, 21. (a) Kua maeke fefe a koe ke aga malokuloku ka fakalataha ke he gahua tufa mekasini? (e) Liga ko e heigoa hau ka taute ke loga e tau mekasini ka tufa he tau mahina takitaha?
20 Ko e kupu lagomatai ke tolu aki, kia fakamolulu. (Fakatatai 1 Korinito 9:19-23.) Tauteute tuai e falu fakatutalaaga fakaku. Kia toka loto e taha tala ka fiafia e tau tagata tane ki ai, mo e taha ma e tau fifine. Ma e tau fuata, liga to fakaaoga e koe e tala “Huhu he Tau Tagata Fuata . . . ” Kia fakamolulu foki, ke he magaaho ka fakalataha a koe ke he gahua mekasini. Ke lafi atu ke he Aho Mekasini, liga kitia e koe kua mahomo lahi e magaaho ka gahua fakamoliaga he afiafi ke foaki e tau mekasini mai he taha fale ke he taha fale.
21 Ko e kupu lagomatai ke fa aki, kia fakatoka e foliaga fakatagata. Ko e lau tohi uho “Tuhi Mai he Tau Mekasini e Puhala he Moui,” i loto he Our Kingdom Ministry ia Mati he tau 1984, ne talahau mai: “Ma e kupu lagomatai, liga fai folia pehenai e tau tagata fakailoa, ke 10 e tau mekasini he mahina, kua falanaki ai ke he ha lautolu a tau tutuaga; kua liga to lali fakalahi e tau tagata foafoa ke he 90. E moli, kua liga maeke lahi e falu tagata fakailoa ke loga e tau mekasini ne tufa he tau mahina takitaha mo e ha ko e mena ia to tokoluga ai e folia fakatagata ka fakatoka. Ka e pete ni ia, kakano ha ko e nakai tino malolo, ko e faga fonua, po ke falu kakano mitaki, kua liga tokolalo e foliaga he falu. Ka ko e ha lautolu a fekafekauaga ki a Iehova kua tatai ai e aoga. (Mata. 13:23; Luka 21:3, 4) Ka ko e mena ne mua atu e aoga ke eke ke fai foliaaga fakatagata.”
22. Ko e heigoa e tau puhala kua maeke ia tautolu ke fakakite ko e loto fakaaue lahi a tautolu ki a Iehova ma e ha tautolu a tau senolo he magaaho tonu ke he kupu moli?
22 Kua fakaaue lahi ha a tautolu he fakaaoga e Iehova, “ko e Atua [“kupu moli,” NW],” e tupa fakamoli mo e lotomatala mo e hana Kaufakatufono ke foaki mai ki a tautolu e tau senolo nei he magaaho tonu! (Salamo 31:5) Ke he mena ne finagalo a Iehova ki ai, to fakatumau e tau mekasini nei ke fakakite mai moli e tau mena moli kua lata tonu mo e tau tagata. To lagaki hake tumau e lautolu e tau puhala tokoluga a Iehova ke he mahani mitaki. To nakai oti a lautolu ke fakaohooho e tau fakaakoaga hako. Mo e to futiaki tumau ne lautolu e tau onoonoaga ke he fakamoliaga he perofetaaga kua fakamailoga aki e tau aho ha tautolu ko e magaaho ka pule e Kautu he Atua mo e taute e finagalo he Atua ke he lalolagi ke tuga ne nakaila taute pihia he vaha fakamua he tau tagata tapuaki moli a Iehova ne kua holo ki mua e numela. (Mataio 6:10; Fakakiteaga 11:15) Ko e koloa uho lahi mahaki kua ha ha ia tautolu ke he Ko e Kolo Toko mo e Awake! Ati fakaaoga fakamitaki ai e tautolu e tau magaaho oti ne moua ke foaki atu ki a lautolu ne loto holoilalo e tau senolo aoga lahi nai kua amotia e tau momoui he tau tagata mo e talahaua e kupu moli he Kautu.
[Tau Matahui Tala]
a Iulai 15, 1992, tau lau tohi 19-22.
b Kua loga e tau tau ne onoono ke he Ko e Kolo Toko ko e mekasini ni ma e tau Kerisiano fakauku. Pete ni ia, ne kamata mai he tau 1935 ke holo ki mua e pehiaga ke fakamalolo atu ke he “moto tagata tokologa,” ne amaamanaki ke moui tukulagi ke he lalolagi, ke fakatau mo e totou e Ko e Kolo Toko. (Fakakiteaga 7:9) Ke he tau tau gahoa fakamui, he tau 1940, kua foaki atu tumau e Ko e Kolo Toko ke he tau tagata he puhala tu. He mole mai ai, ne holo mafiti ki mua e uta vikoaga.
Ko e Heigoa Hau a Tali?
◻ Kua fakakite mai he heigoa ko e tau senolo he kupu moli e Ko e Kolo Toko mo e Awake!?
◻ Ne amotia fefe he Ko e Kolo Toko mo e Awake! e tau momoui he tau tagata?
◻ Ko e heigoa kua maeke he tau fakapotopotoaga ke taute ke fakaholo ki mua e tufaaga mekasini?
◻ Ko e heigoa e tau kupu lagomatai kua maeke ke lagomatai aki a koe ke loga e tau mekasini ne tufa?
[Puha he lau 29]
Falu Tala ne Amotia e Tau Momoui he Tau Tagata
Mai he tau tau kua mole kua tokologa a lautolu ne totou tohi ne tohia mai ke fakailoa e tau fakaaue ma e tau tala pauaki ne lomi fakailoa i loto he Ko e Kolo Toko mo e Awake! Kua tohi i lalo nei e tau tala gahoa, mai he tau tala loga ne kua lauia ha mautolu a tau tagata totou. Kua hikitaki nakai e lautolu nei po ke falu tala foki, hau a moui?
The Watchtower
“Talia e Lagomatai he Atua ke Kautu mai he Tau Mahani Hepe Fufu” (Aperila 15, 1985)
“Taute Tumau e Mahani Atua Fakamoli ke he Tau Mamatua Momotua” (Iuni 1, 1987)
“Fakalataha e Fakaakoaga mo e Kakano” (Ko e Kolo Toko, Novema 1, 1992)
Awake!
“Maeke ia Koe ke Tau ke he Fakaagitau!” (Sepetema 8, 1981)
“Magaaho Ka Mate e Taha Tagata ne Ofania e Koe . . . ” (Aperila 22, 1985)
“Puipui Hau a Fanau!” (Oketopa 8, 1993)
[Fakatino he lau 30]
I Kanata—fakamatala mai he taha fale ke he taha fale mo e tau mekasini
[Fakatino he lau 31]
I Maianama—foaki atu e tau mekasini ne tuhi ke he puhala he moui