Fakaaoga e Tau Mekasini he Fekafekauaga ha Mutolu
1, 2. Puhala fe ne aamotia he Ko e Kolo Toko mo e Awake! e tau momoui he tau tagata?
1 “Fuluola, felauaki tonu, mo e atihake.” “Ko e tau senolo laia kua mua e atihake ne totou e au tali mai.” Kua fakakite he tau talahauaga nei e logonaaga he tau tagata totou he lalolagi katoa ke he Ko e Kolo Toko mo e Awake! Moli, ko e tau mekasini ha tautolu ko e tau koloa kua mua atu e aoga ke hokotia e tala mitaki ke he “tau tagata oti kana.”—1 Timo. 2:4.
2 Ko e tagata tane tu gahua ne moua e mekasini Awake! ke he vala tala ne fiafia a ia ki ai. Fakamui, ne totou e ia e hoa he fufuta ia he Ko e Kolo Toko ne tu ai e vala tala ne fakaohooho a ia ke fokifoki e taofiaga hana kua leva ke he Tolu Taha. Kua fakalaga he mena nei e fiafia hana. Ono e mahina he mole ne papatiso a ia. Taha tagata tane ne moua tumau e tau mekasini ka e nakai totou. Ka ko e hoana hana mogoia, ne kalo he Tau Fakamoli ka e totou e tau mekasini ne toka ma e tane hana. Ne aamotia e loto hana ke he maveheaga he Tohi Tapu ke he lalolagi parataiso ka nonofo ai e tau tagata tututonu. Fai magaaho, ko ia, hana tama tane, mo e hana tehina ne eke ai mo tau fekafekau ha Iehova.
3. Ko e heigoa e mena mitaki he foaki fakalataha e tau mekasini?
3 Foaki Fakalataha e Tau Mekasini: Kitia mai he tau fakatai kua mole, nakai iloa moli e tautolu ko hai ka totou e tau mekasini ha tautolu po ke tau mena fe ka fakalaga aki e fiafia ha lautolu. (Fakama. 11:6) Ko e mena ia, kua mitaki ke foaki fakalataha e Ko e Kolo Toko mo e Awake!, pete kua mahani a tautolu ke fakatutala ke he taha e mekasini he fakafeleveiaaga ha tautolu. He falu tutuaga, liga mitaki ke foaki e tau fufuta kehekehe he tau mekasini ha tautolu ka ahi atu.
4. Liga setulu fefe e gahua mekasini ha tautolu?
4 Kua aoga ke fakatoka taha e aho he tau fahi tapu takitaha ke fakalataha ke he gahua mekasini. He 2005 Calendar of Jehovah’s Witnesses, kua fakatoka e tau Aho Faiumu oti ko e “Aho Mekasini.” Moli, na kehekehe e tau tutuaga he matakavi po ke he tagata, liga fakatoka he falu e taha aho kehe ke hagaaki foaki ni he tau senolo ha tautolu. Pihia nakai taha vala he setulu hau he tau fahi tapu takitaha?
5. Ko e heigoa e tau magaaho mitaki kua lata ia tautolu ke mataala ki ai, mo e ko e heigoa ka lagomatai a tautolu ke taute pihia?
5 Fakatoka e Foliaga Fakatagata: Ko e fakatoka e foliaga fakatagata he mahina ke foaki e tau mekasini ka lagomatai a tautolu ke manamanatu lahi ke he tau mekasini. Fai fakatokaaga mekasini nakai a koe? Foaki nakai e koe e tau mekasini ki a lautolu ne feleveia mo koe he fekafekauaga? Maeke nakai a koe ke foaki e tau mekasini he gahua he puhalatu, he matakavi pisinisi, mo e he tau toloaga tagata? Uta nakai e koe e tau mekasini mo koe ka fano fenoga, ke he fale koloa, mo e fano ke he fekau fakatoka tuai? Kia fakaaoga e tau magaaho mitaki oti ke lagomatai e falu ke moua e aoga mai he Ko e Kolo Toko mo e Awake!
6. Maeke fefe ia tautolu ke fakaaoga fakamitaki e tau fufuta mekasini tuai?
6 Liga foli foki a tautolu ke foaki e tau fufuta tuai ne toka agaia mo tautolu. Pete kua nakai foaki e tau mekasini he mahina ia po ke ua e mahina he mole, kua uho agaia e tau vala tala. Age ke he tau tagata ne fiafia. Ma e miliona he tau tagata, ko e tau mekasini Ko e Kolo Toko mo e Awake! ko e “tau kupu kua . . . lata ai.” (Fakatai 25:11) Kia fakaaoga e tautolu ke lagomatai e tau miliona ke iloa mo e fekafekau ki a Iehova.