Fakaaoga Fakamitaki he Ko e Kolo Toko mo e Awake!
1 Ko e Kolo Toko mo e Awake! e tau mekasini kua mua atu e uho mo e aoga lahi ke totou he tau tagata he vaha nei. Ko e ha? Ha ko e tau kupu moli fakaagaga nukua moua e lautolu kua ha ha ai e lauia tukulagi ma e mitaki ke he tau momoui he tau tagata. Pete ia, tokologa e tau tagata ne manamanatu katoatoa ke he tau manako fakaagaga ha lautolu, po kua nakai iloa e lautolu e matakavi ke kumi e makonaaga ia. Ko e kotofaaga ha tautolu ke fifitaki e aposetolo ko Paulo he lagomatai e tau tagata ke hafagi ha lautolu a tau mata fakaagaga.—Mata. 5:3; Gahua 26:18.
2 Kia Mauokafua mo e Tauteute Fakamitaki: Liga ke fai tagata tuga e tau mamoe he matakavi hau ka talia e kupu moli. Liga lata e falu mo e fakamaloloaga totonu ke totou e tau mekasini. Ko e mena ia, kia mauokafua mo e fakamafoki ka foaki a koe he Ko e Kolo Toko mo e Awake! Kia uta mau e tau mekasini mo e fakaaoga e tau magaaho oti ke foaki ai, pihia foki ka fakakite age e falu tohi.
3 Ko e heigoa kua taute a tautolu ke lauia mitaki lahi he foaki e tau mekasini? Ke kamata aki, kua lata ia tautolu ke loto fakaaue moli a tautolu ni ke he uho lahi he tau mekasini. Kua lata ke mahani a tautolu mo e tau vala tala he tau mekasini kua foaki e tautolu ti to fakamalolo he mena nei e mauokafua ha tautolu mo e fakamakai ha tautolu ke foaki ai. Kia toka mau e manatu nei he kamata totou e koe a lautolu. Kia mataala he fifili e tau manatu ke talahua he fekafekauaga. Huhu kia koe ni: ‘To futiaki pauaki ki a hai e vala tala nai? To loto fakaaue la nakai e hoana nofo kaina, tagata fuata, po ke tagata pisinisi? To fakalagalaga la nakai he manatu nei e tagata fakaako, ke he tagata fai tokoua, ke he taha ne kapaletu ke he takatakaiaga?’ Ke lauia lahi moli, kua lata ia tautolu ke tututala fakamalolo ke he tau mekasini fakave ke he iloilo faka-tagata ha tautolu mo e olioli e tau vala tala magaaho tonu.
4 Fakaaoga Fakamitaki e Tau Lagaki Tuai: Manatu, nakai galo e uho lahi he Ko e Kolo Toko mo e Awake!, pete ni e nakai foaki oti he taha po ke ua e mahina, fakatatau atu ke he tau aho he lagaki. Ko e vala tala i loto kua aoga lahi mahaki mo e vala magaaho, ti nakai lata ke fakauaua a tautolu ke fakaoga e tau lagaki tuai ka maopoopo agaia. Kua fata loga e tau mekasini tuai mo e nakai fakaaoga ko e fakakite he nakai loto fakaue ma e tau kanavaakau uho lahi nei. Igatia e mekasini mo e kupu moli nukua lata ke fakaala aki mo e fakamakona aki e tau manako fakaagaga. He nakai tuku kehe e tau lagaki tuai mo e fakanimonimo ki ai, nakai kia mitaki he lali fakalahi ke foaki ai ke he tau lima he tau tagata fiafia po ke toka hifo ai he mena galo ka nakai fai tagata i kaina?
5 Kua lagomatai he mekasini Awake! e tokologa ne nakai ko e tau tagata hagahaga fakaagaga ke he kamataaga ke manamanatu ke he manako fakaagaga ha lautolu. Ko e Kolo Toko e matapatu kanavaakau he fakaholoaga fagai fakaagaga he tau tagata ha Iehova. Kua felauaki mitaki tokoua e tau mekasini nei, ti aoga lahi foki e matagahua ne taute e lautolu he fakamatala e tala mitaki.
6 He fakaaoga fakamitaki e tautolu e tau magaaho oti ke foaki e tau mekasini, ha ha ia tautolu e mauokafua katoatoa he lauia mitaki he tau mekasini ke hokotia ke he tau manako fakaagaga ha lautolu ne tuga e tau mamoe. Manako a tautolu ke fakatumau e aga mauokafua, tauteute fakamitaki, mo e tumau ke he fekafekauaga. Ha ko e tau tagata fakailoa he tala mitaki, kia igatia a tautolu oti mo e fakaaoga fakamitaki tumau e tau mekasini Ko e Kolo Toko mo e Awake!