Fifili e Tau Vala Tala ke Futiaki e Fiafia Pauaki he Tau Tagata
1 Tuga e tau tagata fanafiti ne fakaneinei fakatonu ha lautolu a tau mata tao, tokologa he tau tagata fakailoa mo e tau paionia i loto he fakapotopotoaga hane olioli e kautuaga mua ue atu he fakaaoga e tau vala tala kua fifili mai he Ko e Kolo Toko mo e Awake! ke futiaki e fiafia pauaki he tau tagata he matakavi ha lautolu. Kua fifili e lautolu a lautolu kua liga ke manako moli ke totou e tau vala tala pauaki mai he tau mekasini. Taute fefe e lautolu e mena nei?
2 Fakamua totou katoa e lautolu e tau fufuta takitaha. Ti huhu mogoia a lautolu ki a lautolu ni, Ha e fe e tau tagata ka liga lautonu mo e tau vala tala takitaha? Ti lali mogoia ke ahi atu ke he tau tagata oti ne kua liga ke fiafia ke totou e vala tala ia. Ka kitia ai e fufuta pauaki kua lahi e talia he matakavi ha lautolu, ti ota fakalahi atu ai e lautolu.
3 Kua Fakalilifu Lahi e Tau Mekasini ha Tautolu: Taha e tagata ne moua mekasini tumau ha tautolu kua gahua ke he mekasini kua mua atu e totou he lalolagi katoa ha Nigeria, ne talahau hagaao ke he Awake!: “Fakaaue ke he mekasini mua ue atu he lalolagi ma e tau tagata oti.” Ko e tagata makai he totou he tau mekasini ha tautolu ne mailoga: “Ko e puhalaaga homo ue atu he pulotu nakai fai fakaotiaga! Fiafia oti au ke he tau vala tala ne fakatutala i loto he tau lau he tau [senolo] nei.”
4 Kua talahau he tau mekasini e tau vala tala kehekehe, lauia ai e Tohi Tapu, tau mena tutupu he lalolagi, tau tupetupe he magafaoa, tau mena vihi he fakalatahaaga, fakamauaga tuai, saiene, tau momoui he tau manu mo e tau akau, ko e falu ni anei. Kua hagahaga atu moli ni e tagata ke totou taha mena kua tatai ke he hana tau manako, tau tutuaga, po ke feua. Ha kua tutala a tautolu ke he tau tagata tokologa, kua igatia ni a lautolu mo e tau manako pauaki mo e tau mena vihi, ti ko e fifili ai he tau vala tala pauaki ke futiaki ke he tau tagata kua feleveia mo tautolu kua lauia mitaki.
5 Mailoga e mena ne tupu he magaaho ne foaki he Tau Fakamoli tokoua e fufuta he Awake! Sepetema 8, 1996, ke he tagata tohi nusipepa. Ne tohi e ia: “Ato fai magaaho au ke talahau kua nakai manako au, ne taha ia laua ne pehe: ‘Fai vala hagaao ke he tau Initia Amerika. Iloa e maua na fa e tohi a koe hagaao ke he vala tala.’” Ne uta e ia e mekasini mo e, he magaaho kai pogipogi, kua totou e vala tala hagaao ke he tau Initia, ti talahau he magaaho fakamui kua “mitaki lahi mahaki” mo e “moli katoatoa.”
6 Ko e Heigoa kua Fiafia ki Ai e Tau Tagata he Matakavi Hau? Ko e heigoa kua kitia e koe he tau mekasini he tau mahina kua mole ne kua fiafia ki ai e tau tagata fakafua mo e tau tagata feua he matakavi hau po ke tau katofia hau, tau kapitiga gahua, mo e tau kapitiga vahega taha? Ko e heigoa kua fiafia pauaki ki ai e tau loea, tau tagata fakaako, magafaoa mo e tau tufono aoga, tau tagata leveki fuata, tau tagata foaki lagomatai gahua, mo e tau ekekafo? He tokaloto e tau tagata kua fakamatala a koe ki ai he kumikumi e koe e tau fufuta kehekehe ka foaki ki a koe e tau puhala mitaki lahi ke fakapuloa e kupu moli.
7 Ka kitia e koe e tagata kua fakakite e fiafia pauaki ke he vala tala he Kolo Toko po ke Awake! mo e kua talia ke he mekasini, liga pehe ai a koe: “Ka fai vala tala he fufuta anoiha ka logona e au kua fiafia foki a koe ki ai, to fiafia au ke ta mai e lagaki ma hau.” Liga ke maeke ia koe ke lafi e tagata ke he tagata moua mekasini tumau hau, he liu atu tumau mo e tau mekasini fou. Kua tatai e mena ia ke he mena ne taute he moua ke hafagi e uiina ke liu ahi atu ke he tau tagata kua liga fiafia pauaki ke he tau vala pauaki kua moua mai he tau mekasini ha tautolu.
8 Kia Fai Foliaga Fakaagaga: He tau tau gahoa kua mole, ko e tagata tane tu gahua ne moua e mekasini Awake! ke he vala tala ne fiafia a ia ki ai. Pete ia, ko e tagata fakalotu nei kua totou foki e tohi he Kolo Toko ne foaki fakalataha, ne moua e vala tala kua omoi a ia ke kumikumi e taofiaga hana kua leva ke he Tolu Taha. Ono e mahina he mole ne papatiso a ia! Ti ua fakauaua ke tutala ke he tau tagata totou he tau mekasini ha tautolu e tau fakatutalaaga fakaagaga. Kia talahau e koe e porosua Ko e Heigoa e Manako he Atua ma Tautolu? ti foaki ke fakatoka falu minuti gahoa ke fakatutala ke he taha e fakaakoaga he tau liu ahi atu takitaha a koe mo e sete fou he tau mekasini.
9 Kia fifili fakamitaki ko hai ia lautolu e tau liu ahi atu mo e tau tagata pisinisi hau ka liga ke lahi e fakaaue he moua e tau fufuta fou he Kolo Toko mo e Awake! Ti lali fakamakamaka ke hokotia ki a lautolu. Lali fakalahi ke matutaki mo e tokologa ke foaki e tau senolo uho nei. Ti nakai nimo ko e lali a koe ke lagomatai e tau tagata tokologa ke totou e tau mekasini ha tautolu, kua ‘liti hau a tau mena kai ki luga he vai.’ Nakai leva, to kautu a koe he moua e tau tutaki fakahele anoiha.—Fakama. 11:1, 6.