Maeke Nakai a Koe ke Foaki e Lagomatai?
1 Kua tomatoma he aposetolo ko Paulo e tau matakainaga he fakapotopotoaga ke “feleoleoaki e tau fahi tino oti kana.” (1 Kori. 12:25) Naia, kua lata ia tautolu ke fakakite e feleoleoaki mo e makai ke foaki e lagomatai fakaalofa kaeke kua manako. He taha fakataiaga, falu he tau matakainaga fifine ha tautolu he vahaloto ha tautolu ne feaki hake tokotaha e tau fanau ha lautolu ke he kupu moli. Kua fua he tau matakainaga fifine nei e kavega puke he tau lagoaga ke he tau fakaakoaga fakaagaga he tau fanau ha lautolu. Moli ni kua lata lahi a lautolu mo e tau fakamafanaaga totonu ha tautolu mo e lagomatai atu ha kua “nonofogati.” (Roma 12:13a) Maeke nakai a koe ke limalima atu ki a lautolu?
2 Tau Puhala Kua Maeke Ia Koe ke Lagomatai: Kia lautolu ne fakaaoga e tau peleoafi papiliki, ka foaki age ke uta a lautolu ke he tau feleveiaaga mo e tau fonoaga to lauia mitaki ma e haohaoaga fakatupe he magafaoa ia. Ke lagomatai ai e matua fifine ke leveki e fanau ikiiki hana he tau feleveiaaga ko e puhala ke maeke a ia ke moua e aoga mai he fakaholoaga. Pihia foki, ke foaki age e lagomataiaga ka uta e ia e fanau he fekafekauaga ko e puhala ma hana ke moua e fakatotoka. Ke fiafia moli atu ke he fanau—fekapitigaaki a lautolu—ko e mena mitaki lahi ai ke ati hake e tau fuata ha tautolu ke he puhala loto mitaki. He falu magaaho uiina e magafaoa ne taha ni e matua ke kau fakalataha he fakaakoaga magafaoa ha mutolu ke ati hake e hauhau fakaagaga.
3 Kia Lotomatala: Kua lata a tautolu ke fakaeneene aua ohooho atu ke lagomatai a ia ka ai manako ki ai. Po ke nakai lata a tautolu he fakalavelave atu ke he tau mena fakamagafaoa he tagata he mogo ka lagomatai ai. Ha e moli, ko e tau matakainaga fifine mo e tau hoa fakamauaga kua lata lahi ke o ke lagomatai e matakainaga fifine ne manako ai.
4 Kua fakamafana oti e tau Kerisiano he muitua atu e “fakamalolo ke he fakaalofa” ke he tau matakainaga. (Roma 12:13e) Ko e taha puhala a ia he tau puhala loga ma tautolu ke fakakite e feofanaki faka-Keriso he vahaloto ha tautolu ke he tau matakainaga tane mo e fifine fakaagaga ha tautolu.—Ioane 13:35.