‘Tau Fifine kua Malolo ke he Gahua he Iki’
1 Mo e tau kupu i luga, ne fakamaama e Paulo a Tufaina mo Tufosa, ko e tau fifine gahua malolo tokoua he fakapotopotoaga i Roma. Ko Peresita foki taha, he talahau e ia: “Ko ia ne gahua fakalahi ke he gahua he Iki.” Nava pihia foki e talahauaga hana ki a Fipe ko e “lagomatai ke he tau tagata tokologa.” (Roma 16:2, 12) I loto he tau Tohiaga Tapu, ko Toreta kua galala fano he “loga hana tau gahua mitaki mo e tau mena fakaalofa ne eke e ia.” (Gahua 9:36) Ko e fakamonuina ha ia e tau fifine fakaagaga ke he fakapotopotoaga!
2 Loto fakaaue nakai a tautolu ke he tau matakainaga fifine ne gahua malolo ke he fakapotopotoaga ha tautolu? Ko lautolu kua hahamo lahi e gahua fakamatala, taute tau fakaakoaga Tohi Tapu, mo e lagomatai a lautolu ne fou. Ne fakaaoga foki e lautolu lahi e magaaho he lagomatai e fanau ke holo ki mua fakaagaga. Kua taute he tau fifine Kerisiano ha lautolu a vala he ati hake e agaaga he fakaalofa, olioli, mafola, mo e fakamakai he fakapotopotoaga. Kua lagomatai a lautolu ke he tau puhala loga ke maeke he tau tane ha lautolu mo e falu tagata he magafaoa ke lahi e mena ka taute ke he fekafekauaga a Iehova.
3 Tau Matakainaga Fifine he Fekafekauaga Mau: Ha ha ia lautolu ne gahua malolo lahi ke he Iki ko e tau matakainaga fifine misionare, tokologa ne limalima atu he fakatupu e gahua ke he falu motu kehe. He tau fakapotopotoaga ne fekafekau ai e tau tane ha lautolu, ko e tau hoana he tau leveki faifano kua lavelave ke he fekafekauaga he fonua, he fakamalolo e tau matakainaga fifine tokologa. Nakai nimo foki e tau matakainaga fifine he Peteli, ne gahua fakamakai ke he gahua tapu he lagomatai e fakatokatokaaga a Iehova. Mo e tau matakainaga fifine paionia tumau ha tautolu, ha ko e ha lautolu a tau laliaga tua fakamoli he fakaheke e Atua, kua lagomatai e tau tagata tokologa ke ako e kupu moli.
4 Ko e tau fifine tua fakamoli nei kua lahi e makona ne moua ha ko e ha lautolu a puhala foaki noa he moui. (1 Timo. 6:6, 8) Kua latatonu a lautolu mo e kupu navanava mo e ha fakamaloloaga mo e lagomataiaga ka foaki e tautolu ki a lautolu.
5 Kua uho moli e tau fifine Kerisiano ke he fakatokatokaaga ha Iehova, he taute tua fakamoli e gahua ne ko e monuina ki a tautolu. Kia fakatumau a tautolu ke loto fakaaue ke he tau fifine pihia mo e liogi ke fakalataha mau e fakamonuinaaga a Iehova mo lautolu he fakatumau a lautolu ke ‘malolo ke he gahua he Iki.’