Puha Huhu
◼ Ko hai kua lata ke fakamea e Fale he Kautu?
Kua fakaata fakamitaki he Fale he Kautu ne mea mo e fulufuluola e fekau ha tautolu ne fakamatala. (Fakatatai 1 Peteru 2:12.) Ko e mena aoga lahi ke mea mo e maopoopo tumau e fale, ti lata ke fakalataha oti ke fakamaopoopo ai. Nakai lata ia tautolu ke manatu ko e falu ni ka lata ke fua e kavega katoa. He fa mahani, taki igatia e tau matakau he Fakaakoaga Tohi he Fakapotopotoaga ke taute e fakameaaga, ke takitaki e ia ne fakaako po ko ia ne lagomatai ai. He tau fale ne feleveia ki ai ne molea ke taha e fakapotopotoaga, ko e tau motua ka pulupulega e tau gahua ke leveki fakalataha he tau fakapotopotoaga oti.
Maeke fefe ia tautolu ke leveki fakamitaki e matagahua nei? Kua lata e fakameaaga he Fale he Kautu ke fakalata ke he setulu kua fakatoka tuai. Tokaga kehe e tau koloa mo e tau mena kanakana ke fakaaoga he fakameaaga. Lata ke fakavahega e tau mena ka taute he lapa fakailoa ke kitia e lautolu ka fakamaopoopo. Po ke taute ke ua e fakameaaga, taha e fakameaaga mama ka oti e feleveiaaga ti fakamea kakana ke taha aho he fahitapu. Kua lata e takitaki he fakaakoaga tohi ke setulu e fakameaaga kakana ke he aho mo e magaaho ne lata mo lautolu ne tofi ki ai. Kia fakamea tumau a fafo, tau fiti lakau, mo e tau akau. Kia tumau ke fakamea e tau veve he tau hala fano hui mo e pihia he tau tokaaga motoka. He tau tau takitaha kua lata ke fakatoka kehe e aho ke fakamea pauaki, liga he magaaho he Fakamanatuaga. Ke putoia he mogoia e fakameaaga he tau fakamaama mo e tau kaupa, kana he kapete, mo e unu he tau pa fakamaama.
Moli ni, kua fakamama e tautolu e kavega ka ai fakato ha pililole po ke lau veve i loto po ke i fafo he fale. Ka oti e fakaaoga he fale tote ti fakamaopoopo, ke mea ai ma e tagata ka mui mai. Fakaeneene neke fakamalona e tau mena i ai po ke moumou ha koloa i ai. Kia mailoga ka ilaila e kapete, ka malona ha nofoa, ha lekua ke he tau paipa, ha fua moli ne pa, mo e tau mena pihia, ti mafiti ke fakailoa e tau mena nei ke he matakainaga tane ne leveki katoatoa e tau mena he Fale he Kautu.
Kia fakamakaukau a tautolu oti ke taute e tau mena nei. Kua fakafuluola he mena nei e fale tapuakiaga mo e fakakite aki a tautolu ko e tau tagata mea kua fakalilifu a Iehova ko e Atua.—1 Pete. 1:16.