Kia Leveki Fakamitaki Tumau e Matakavi he Tapuakiaga ha Tautolu

1. Ko e heigoa e kakano he Fale he Kautu?

¹ Kua molea e 94,000 he tau fakapotopotoaga he Tau Fakamoli a Iehova ke he lalolagi katoa. Laulahi he tau fakapotopotoaga kua fakapotopoto ke fakaako Tohi Tapu mo e lafiaga faka-Kerisiano ke he Fale he Kautu, kua eke ai mo lotouho he tapuakiaga mea he matakavi ia.

2. Ko e ha kua aoga ai ke fakatumau e mea mo e lilifu he Fale he Kautu?

² Fakatumau e Setulu Fakamea: Ko e gahua ne taute ke he levekiaga he Fale he Kautu ko e vala aoga lahi he ha tautolu a fekafekauaga tapu. Ko e tohi Our Ministry tau lau 61-2 ne talahau: “Kua lata e tau matakainaga ke manamanatu ki ai ko e kotofaaga lilifu nakai ni ke lagomatai fakatupe ke he Fale he Kautu ka e pihia foki ke gahua noa ke fakatumau e mea, lilifu mo e leveki fakamitaki ai. Tatai ua a loto mo fafo, kua lata e Fale he Kautu ke eke mo hukui mitaki he fakatokatokaaga ha Iehova.” Ke he Fale he Kautu ne lagaloga e fakaaoga he tau fahi tapu takitaha, kua latatonu ke fakamea mo e leveki tumau. Fa mahani ai ko e tau tagata gahua noa mai he (tau) fakapotopotoaga ne feleveia ke he Fale he Kautu ia ka taute e tau fekau nei. Ke tuga he vaha Tohi Tapu, kua lata e tau fekafekau ha Iehova he vaha nei ke fakamakutu ke “fakafou mo e taute” ai e matakavi he tapuakiaga ha tautolu.​—2 Nofo. 34:10.

3. Fakatokatoka fefe e fakameaaga he Fale he Kautu, mo e ko hai ka limalima auloa e kotofaaga nei?

³ Ko e setulu ma e fakameaaga he fahi tapu ma e Fale he Kautu kua lata ke tau hake he lapa fakailoaaga. Kua lata e tau matakau fakaakoaga tohi oti ke fakamea fakafetokaki e fale he tau fahi tapu takitaha, he mumuitua ke he tau gahua kua tohi ke taute. Ko lautolu oti kua maeke ai kua lata ke limalima auloa e kotofaaga ia he tau fahi tapu takitaha ke mea mo e lilifu e Fale he Kautu. He leveki he tau mamatua, kua maeke ke putoia foki e tau fanau, ko e mena ia ke fakaako a lautolu ke fakakite e loto fakaaue ma e kotofaaga nei. Mua atu ka molea e taha e fakapotopotoaga ne fakaaoga e Fale he Kautu, kua latatonu ke kaufakalataha ma e levekiaga he vala aoga nei he tapuakiaga ha tautolu ka e nakai lago ke he toko gahoa ni.

4. Ko e heigoa kua lata ke taute ke iloa he fakapotopotoaga e tau mena ke taute ka fakamea e Fale he Kautu?

⁴ Lata ke tau hake e tohi he tau gahua ke taute, liga he mena ne toka ai e tau koloa fakamea. Kua lata e tohi nei ke fakamaama e tau gahua ke taute he tau fahi tapu takitaha, putoia e vacuum, kana e tau hio, tafitafi e tau efu he tau fuga lapa, ligi e tau kato veve, mopo e foloa, mo e kana e tau fakaata. Ko e falu gahua kua fa lavea ke taute, tuga e fakakikila mo e fakamomole he tau koloa akau mo e kana fakamatafeiga he tau nofoa, tau ufiufi fakamaama, mo e tau tauaga moli. Ko e tau kemikolo oti ne fakaaoga mo fakamea kua lata ke tuku fakamamao mai he tau fanau mo e lata ke leipolo fakamaaliali. Kua lata ke tohi foki e fakamaamaaga fakaku ke he puhala ke fakaaoga aki e tau kemikolo takitaha.

5. Aoga fefe e haohao mitaki, mo e ko e heigoa kua fa tivi lavea? (Kikite e puha he lau 3.)

⁵ Ko e haohao mitaki neke pakia he Fale he Kautu ko e mena kua mua atu e aoga. (Teu. 22:8) Hagaao ke he mena nei, ko e puha he lau 3 kua tohi ai e falu koloa ka tivi lavea ke puipui e tau pakia.

6. Takitaki fefe e gahua he levekiaga he Fale he Kautu?

⁶ Levekiaga he Fale he Kautu: Ko e kau he tau motua kua lago ke kitekite e levekiaga he Fale he Kautu. Fa mahani ai, ko e motua po ke fekafekau lagomatai ka kotofa ke takitaki e gahua. Ko ia ka fakatokatoka e holoaga he tau aho takitaha he Fale he Kautu, ke kitia kua tumau e mea mo e mau mitaki mo e lahi e koloa fakamea. Kua aoga ke nakai fai mena tauhele ke fakahagahaga kelea he fale po ke he fonua. Ka ua po ke loga atu e fakapotopotoaga ne fakaaoga e taha e fale, ko e tau kau he tau motua ka fifili e komiti fakagahua ke fakatokatoka e tau fakatokaaga ma e levekiaga ke he fale mo e fonua. Kua gahua e komiti nei i lalo hifo he takitakiaga he tau kau he tau motua.

7. (a) Ko e heigoa kua taute he tau tau takitaha ke kitia kua fakatumau e leveki mitaki he Fale he Kautu? (e) Ko e heigoa kua fa tivi lavea? (Kikite e puha he lau nei.)

⁷ Kua taute lagataha he tau e tivi katoatoa he Fale he Kautu. Ko e tau motua ka muitua he fakatu e tau fakatokaaga ke leveki fakamakutu e ha tauteaga kua lata. Kua maeke ke uiina e tau tagata fakailoa ke lagomatai e tau mena kua lata ke fakafou mo e leveki ai. Kua lata oti ke matakite ke he tau mena ikiiki mo e kua lata ke taute fakamafiti e tau mena kua lata.

8. Ko e magaaho fe ka liga matutaki atu e tau motua ke he Komiti Tafale he Matakavi ma e puhala he levekiaga?

⁸ Kaeke logona he tau motua kua manako hatakiaga po ke lagomataiaga ma e puhala ke he levekiaga he Fale he Kautu, maeke ia lautolu ke matutaki atu ke he Komiti Tafale he Matakavi. Liga putoia e tau mena tuga e leveki he kapete, tivi e tau koloa fakamafana mo e fakahauhau, mo e puhala ke taute aki e tau lekua he pahahu i loto he fale.

9. Ko e heigoa e puhala ke muitua ki ai ka manako ke no e taha tagata konotuleke?

⁹ Fakaaoga Fakamitaki e Tau Tupe he Fakapotopotoaga: Laulahi he tau gahua he Fale he Kautu mo e fonua kua taute ai he tau tagata gahua noa. Ko e tau malolo foaki noa ha lautolu ko e fakakiteaga mitaki he fakaalofa mo e lagomatai lahi ke fakatote hifo e totogi. Kaeke kua lata ke no taha tagata konotuleke ke taute falu gahua, tuga e puipui moko, ko e tau motua ka kumi e tau quote ma e tau gahua pihia. Taute e lautolu e mena nei he tauteute fakamua e fakamatalaaga matafeiga kua tohi ma e gahua ka taute mo e ha koloa ka fakatau. Ko e lagaki he tohi nei ka age ke he tau fakafua koloa kehekehe ke maeke ia lautolu ke tatai e maamaaga ke he tau koloa kua kumi quote ki ai. Mole e moua e tau quote kua tohi mai he tau fakafua koloa ne ligaliga ke fakatau mai i ai, maeke mogoia he tau motua ke fifili e totogi kua fahia ki ai. Ko e fakatokaaga nei kua lata ke muitua ai pete kaeke ko e matakainaga tane ne foaki ke taute e gahua po ke fakatau mai e tau koloa kua lata ke he totogi pauaki.

10. Ko e heigoa ka taute ke mailoga moli kua fakamole fakamitaki e tau tupe he fakapotopotoaga?

¹⁰ Ko e tau motua foki ke muitua ke he tau puhala kua fakatoka ke taute aki e tau rate rebate po ke falu exemption, ma e tau matakavi ne taute pihia. Ka molea e taha e fakapotopotoaga ne fakaaoga e Fale he Kautu, ko e komiti fakagahua ka toka ai e pepa tupe kehe ia mo e tufatufa ke he tau kau he tau motua takitaha e tau hokotaki fakatupe kua tohi ai he tau mahina takitaha, ke fakailoa ke he tau motua e fakamoleaga he tau tupe. Ko e tau motua kua lago ke fakamole fakamitaki e tau tupe he fakapotopotoaga.

11. Ko e heigoa kua lata ke taute kaeke lahi mahaki e levekiaga po ke fakafouaga?

¹¹ Lahi Mahaki e Levekiaga mo e Fakafouaga: Ka kitia he komiti fakagahua kua lata ke fai tauteaga lahi ke he holoaga po ke levekiaga ne matutaki ke he Fale he Kautu, to ta atu he komiti e fekau ia ke he tau kau he tau motua ma e fakatonutonuaga. Ka mauokafua moli kua lahi e gahua ke leveki po ke fakafou po ke kua manako lagomatai mai he (tau) fakapotopotoaga i fafo he tau fakapotopotoaga ne feleveia he Fale he Kautu ia, ko e tau motua ka matutaki atu ke he Komiti Tafale he Matakavi. Ko e tau matakainaga nei kua fai iloaaga ke foaki e tau manatu lagomatai mo e onoonoaga katoa he takitaki e gahua. Kaeke kua lahi e tupe ka fakaaoga, kua lata ni ke moua e tau fatifatiaga tupe hako ke fakatau aki mo e tauteute e fifiliaga ke fakailoa ke he fakapotopotoaga ke moua e taliaaga.​—Kikite e Puha Huhu he Our Kingdom Ministry ia Fepuari 1994.

12. Fakakite fefe e tautolu e loto fakaaue ha tautolu ma e kotofaaga ke o atu ke he tau feleveiaaga he Fale he Kautu?

¹² Ko e loto fakaaue lahi ha ia ha tautolu ke he kotofaaga ke feleveia auloa ke he Fale he Kautu! To nakai manako a tautolu ke fakaheu e tau feleveiaaga ha tautolu po ke fakateaga ki ai. Maeke e tau tagata oti ke kau auloa ke he kautuaga he fakaholoaga nei ma e fakamaloloaga ha tautolu he fakalataha katoatoa ke he levekiaga he ha tautolu a Fale he Kautu. Kua fakatokoluga he mena nei e tapuakiaga mea mo e tamai e lilifu ke he higoa a Iehova. Kia mauokafua a tautolu ke fakatumau e leveki fakamitaki he matakavi he tapuakiaga ha tautolu.

[Puha he lau 3]

Tohi Tivi ke Haohao Mitaki

◻ Tau koloa tamate afi kua lata ke toka fakatata ke moua vave mo e tivi lagataha he tau.

◻ Tau fakatokaaga sprinkler kua lata ke tivi ke felauaki mo e tau matafakatufono he matakavi.

◻ Tau gutuhala ka o ki fafo mo e tau sitepe kua lata ke kitia maali, maama, mo e mukamuka ka o ki ai, mo e lata ke mau e tau tapiki lima.

◻ Tau poko toka koloa, tau faletote, mo e tau poko tautau mena tui kua lata ke mea, maopoopo, mo e nakai toka ha mena ne mukamuka ke vela, tau koloa fakatagata, mo e muhu veve.

◻ Ko e tuafale mo e tau hala vai kua lata ke tivi mo e fakamea tumau.

◻ Tau hala o hui mo e paakaaga kua latatonu ke maama mo e nakai fai mena ke fakatupu e hekeheke po ke veveli.

◻ Tau fakatokaaga hila, fakamafana, mo e fakahauhau kua lata ke fakakia mo e tivi fakamitaki.

◻ Ko e ha tutulu kua lata ke taute fakamafiti ke puipui mai he tau lekua he pahahu.

◻ Kua lata e fale ke loka ka nakai fai tagata i ai.

[Puha he lau 4]

Levekiaga ke he Fale mo e Fonua

◻ Fafo: Kua mau mitaki nakai e tuafale, tau paka kaupa, vali, tau fakamaama, mo e matahigoa he Fale he Kautu?

◻ Fonua: Kua leveki fakamitaki nakai e fonua? Hagahaga mitaki nakai e tuaga he tau hala o hui, he pa, mo e paakaaga?

◻ Loto: Lilifu nakai e kapete, tau puipui fakamaama, tau nofoa, tau tauaga moli, vali po ke uufi kaupa, tau puha toka tohi, mo e poko tautau mena tui?

◻ Tau koloa fakaaoga: Gahua mitaki nakai e tau moli, fakatokaaga leo fakatagi, fakamafana, mo e fakahauhau?

◻ Tau faletote: Mea mo e gahuahua mitaki nakai e tau fale nei?

◻ Tau tohi he fakapotopotoaga: Fou mo e hako nakai e tau tohi corporation po ke trusteeship? Ka felauaki, kua taute nakai e tau laupepa property-tax-exemption lagataha he tau?