Fakaaoga e Tau Tuleke ke Kamata e Tau Fakatutalaaga
1 Nakai kia talia e koe, ko e fakamatala lauia mitaki kua falanaki lahi ke he fakailoilo hau ke kamata e tau fakatutalaaga? Ko e paleko ke talahau taha mena ke moua e fiafia he tagata mo e ke putoia foki a ia i ai. Ka e taute fefe e mena nei ke lauia mitaki?
2 Tokologa e tau tagata fakailoa ne moua he fakalataha e tau kupu gahoa ne fifili mitaki, mo e foakiaga he taha he ha tautolu a tau tuleke ne fakave ke he Tohi Tapu kua maeke ke kamata aki e tau fakatutalaaga. Ko e tau mataulu kua fulufuluola, mo e tau fakatataaga kua manaia mo e futiaki. Nakai fakapehia he tuleke e tagata, he foaki e manatu kua lahi e mena ke totou. Ka ko e fekau ku he tau tuleke kua hufia mitaki ti kua maeke foki ke fakaaoga ke takitaki ke he fakaakoaga Tohi Tapu.
3 Pehe e logonaaga fakatagata he taha Fakamoli: “He lalolagi lavelave nei, kua fa mahani e tau tagata ke nakai manako ke lahi e magaaho ke totou, ka kua loa ni e tau tuleke ke foaki e fekau aoga ka e nakai ke fuluhi kehe e tau tagata ato kikite fakamua a lautolu ki ai. Ne totou e au loga e tau tuleke, ti iloa e au he magaaho fakamui e kupu moli.” Aua neke fakateaga e malolo he Kupu he Atua tuga ne kua fakamaama he tau fekau kuku nei ne tohia.—Hepe. 4:12; fakatatai Sakaria 4:10; Iako. 3:4, 5.
4 Fa e Lakaaga Mukamuka: Tokologa ne kua olioli e kautuaga he taute e fakafeleveiaaga mukamuka. (1) Fakakite ke he tagata e tau tuleke gahoa mo e huhu ki a ia ha fe e tuleke kua fiafia a ia ki ai. (2) Ka fifili he tagata taha, huhu ki a ia e huhu tauteute mitaki kua fakamaama e matapatu manatu he tuleke. (3) He tali ke he huhu, totou e paratafa kua lata po ke kupu tohi mai he tuleke. (4) Ka moua e koe e tali fiafia, fakatumau e fakatutalaaga ke he tau mataulu he tuleke po ke hagaaki ke he fakaakoaga he porosua Manako po ke veveheaga he tohi Iloilo kua foaki falu talahauaga foki. He puhala nei kua liga maeke ia koe ke takitaki fakahako atu ke he fakaakoaga Tohi Tapu. Ko e tau manatu na ka lagomatai a koe ke tauteute e mena ka talahau hagaao ke he fa e tuleke.
5 Ko e huhu fakalagalaga e mataulu he tuleke “Ko Hai Moli kua Pule ke he Lalolagi?”.
◼ Ka tali he tagata kua tutala mo koe “Atua” po ke “Ai iloa au,” totou e tau laini ua fakamua he lau 2 mo e paratafa fakamua he lau 3. Fakamaama 1 Ioane 5:19 mo e Fakakiteaga 12:9. Ko e to fakauaua e tagata po ke nakai ki a Satani ko e Tiapolo po ke talahau e fakaohooho hana ke he lalolagi, maeke ia koe ke peehi e manatu ne moua i lalo he mataulu “Fakakite Maiaga he Tau Tutuaga he Lalolagi” ke matutaki e fakatutalaaga. Ka kitia e fiafia, foaki ke fakamaama ko e hau i fe e Tiapolo, he fakaaoga e tau manatu he lau 3 mo e 4 he tuleke.
6 Ko e tuleke “Ko e Heigoa e Amaamanakiaga ma e tau Fakahelehele Kua Mamate?” ka fakalagalaga mafiti e fiafia: Liga kamata e koe e fakatutalaaga he huhu:
◼ “Manatu nakai a koe to liu a tautolu ke kitia e tau fakahele ha tautolu ne mamate?” Ka oti e tali he tagata, fakakite ke he paratafa ke ua he lau 4 he tuleke mo e totou e Ioane 5:28, 29. Ti fakamaama kua lagomatai ai ke maama “Ko e Mate, mo e Ko e Heigoa ka Tupu ka Mamate a Tautolu,” ne ko e mataulu fakamua he tuleke. Foaki ke fakatutala tokoua.
7 Ko e tuleke “Kia Olioli e Moui he Magafaoa” kua futiaaki ke he lalolagi katoa ma e tau magafaoa: Fakaaoga ai, he talahau pehe a koe:
◼ “Liga talia a koe kua hoko e moumou ke he tau magafaoa he vaha nei. Ko e heigoa he manatu e koe ke taute ke fakamalolo aki e pipiaga he magafaoa?” He mole e tali he tagata, hagaaki hana kitiaaga ke he tau manatu he paratafa fakamua he lau 6. Fifili taha e kupu tohi he lau 4 mo e 5 he tuleke, ti fakamaama e kakano. Ti tala age ko e lagotataiaga mo e mena kua talahau he tuleke, kua manako a koe ke foaki e fakaakoaga Tohi Tapu nakai fai totogi he kaina.
8 Ko e tuleke “Ko e ha Ne kua Lata ai ia Koe ke Falanaki ke he Tohi Tapu” ka liga fakaaoga mo e fakatataaga nei:
◼ “Tokologa e tau tagata ne logona e tala ki a Kaino mo Apelu, ne moua he tohi fakamua he Tohi Tapu. Kua hagaao foki e tala ia Kenese, ke he hoana a Kaino. Kua manamanatu nakai a koe na hau a ia i fe?” Fakaaoga e paratafa fakahiku he lau 2 he tuleke ke foaki e tali. Fakamaama kua tutala foki e tuleke ke he talahauaga aoga he Tohi Tapu hagaao ke he mena kua fakatoka he vaha anoiha ha tautolu. Kamata he paratafa tolu he lau 5, matutaki e fakatutalaaga, fakaaoga e tau kupu tohi ke lagomatai aki.
9 Ko e foaki he tau tuleke Tohi Tapu kua leva lahi, ko e puhala lauia mitaki he foaki e tala mitaki. Ha kua lata ni e lahi mo e mukamuka ke uta fano mo koe, maeke ia koe ke fakaaoga lauia mitaki ai he gahua he taha gutuhala ke he taha gutuhala mo e ka fakamatala nakai mautali. Aoga lahi e matagahua ne taute he tau tuleke ke fakahoko aki e fekafekauaga ha tautolu. Manatu ke uta e tau tuleke kehekehe mo e fakaaoga fakamakau ai ke kamata e tau fakatutalaaga.—Kolo. 4:7.