Fakaaoga e Tau Tuleke ke Folafola e Tala Mitaki
1. Kua fakaaoga fēfē he tau tagata he Atua e tau tuleke?
1 Ko e tau tuleke faka-Tohi Tapu kua leva tigahau e fakaaoga he tau tagata ha Iehova ke folafola e tala mitaki. He 1880, ko C. T. Russell mo e matakau haana ne kamata ke taute e Bible Students’ Tracts, ti age ai ke he tau tagata totou he Watch Tower ke tufa ke he tau tagata. Kua onoono ai ke he tau tuleke ko e mena aoga lahi ti he 1884 ne fakamau hifo e C. T. Russell e matakau kua fakatū matafakatufono ne nakai ke moua tupe ka e ke fakalaulahi atu e tau mena he Kautu, ko e kupu “tuleke” ne putoia ke he matahigoa ko e Zion’s Watch Tower Tract Society ne fakahigoa he mogonei ko e Watch Tower Bible and Tract Society of Pennsylvania. He 1918, molea e 300 miliona tuleke ne tufa he Tau Tagata Fakaako Tohi Tapu. Kua matutaki e tau tuleke ke lauia mitaki ke he puhala fakamatala.
2. Ko e ha e tau tuleke ne lauia mitaki?
2 Kakano ne Lauia Mitaki: Kua fulufuluola mo e lanu kehekehe e tau tuleke. Ko e fekau kū i loto kua hokulo mo e aoga lahi ai. Kua futiaki ai ke he tau tagata he kaina ne liga tehatehaua ke he mekasini po ke tohi. Mukamuka e tau tuleke ke foaki foki he tau tagata fakailoa foou mo e tau fanau. Lafi ki ai, kua ikiiki ti mukamuka e tau tuleke ke uta e tautolu.
3. Talahau e tala haau po ke vala tala ne lolomi ne fakakite e uho he tau tuleke.
3 Tokologa ne kua feleveia fakamua mo e kupu mooli ha ko e tuleke. Ma e fakatai, ko e fifine i Haiti ne mailoga e taha he tau tuleke ha tautolu he puhalatū. Ne lagaki hake ai e ia, totou ai, ti pehē, “Kua moua tuai e au e kupu mooli!” Fakahiku ne fano a ia ke he Fale he Kautu, kamata fakaako e Tohi Tapu, ti papatiso—kakano ni ha ko e malolō he Kupu he Atua i loto he tuleke.
4. Ko e heigoa e foliaga ha tautolu kaeke ko e tuleke e foaki he mahina?
4 Mai he Taha Fale ke he Taha Fale: Ha ko e tau koloa lauia mitaki e tau tuleke he gahua fakamatala, to foaki ai he falu mahina, kamata ia Novema. Ko e foliaga ha tautolu ke nakai ni tufatufa e tau tuleke ka e fakaaoga e tuleke ke kamata e tau fakatutalaaga. Ka fiafia he fina atu fakamua po ke he liu aahi atu, maeke ia tautolu ke fakatātā e fakaako Tohi Tapu he fakaaoga e tohi Fakaako he Tohi Tapu po ke taha tohi fakaako foki. Liga foaki fēfē e tautolu e tau tuleke mai he taha fale ke he taha fale? Kehekehe oti e tau tuleke, ti lata ia tautolu ke mahani mo e tau tuleke ka foaki e tautolu.
5. Maeke fēfē ia tautolu ke foaki e tau tuleke mai he taha fale ke he taha fale?
5 Lata e fakatātāaga ha tautolu ke felauaki mo e fonua ti pihia mo e tuleke ha tautolu kua fakaaoga. Maeke ia tautolu ke kamata e fakatutalaaga he age e tuleke ke he tagata he kaina. Liga fakalagalaga he kili fulufuluola e fiafia haana. Po ke fakakite e tautolu loga e tuleke ti fakaatā e tagata he kaina ke fifili e tuleke ne fiafia a ia ki ai. Ka gahua he matakavi ne tehatehaua e tau tagata ke hafagi e gutuhala ha lautolu, liga totō e tautolu e tuleke ke maeke he tagata he kaina ke kitia e kili, po ke tala age a tautolu ke huhulu e tuleke i lalo he gutuhala ke maeke ia tautolu ke iloa e manatu haana. Kaeke ko e hūhū e mataulu he tuleke, maeke ia tautolu ke hūhū ki a ia ke talahau e manatu haana ki ai. Po ke talahau e tautolu e hūhū ke fakaohooho e fiafia mo e fakalagalaga e tutalaaga. Maeke ia tautolu ke totou e vala he tau mataulu he tuleke mo e tagata he kaina, fakamanou he tau hūhū i loto ti uiina e tagata he kaina ke talahau e manatu haana. Maeke e tau matapatu kupu tohi ke totou mai he Tohi Tapu. Ka oti e tutala ke he falu vala tala, maeke ia tautolu ke fakaoti e tutala ti taute e tau fakatokaaga mauokafua ke liu atu. Ka mahani e fakapotopotoaga ke toka e tau tohi he tau kaina ne nakai fai tagata, maeke ia tautolu ke toka e tuleke he mena ne nakai mukamuka he falu ke kitia ka ai nofo e tagata i kaina.
6. Liga fakaaoga fēfē e tau tuleke he fakamatala he puhalatū?
6 Fakamatala he Puhalatū: Kua fakaaoga nakai e koe e tau tuleke he fakamatala he puhalatū? Falu tagata he puhalatū kua fakatepetepe ti nakai hihiga ke tutū ke tutala mo tautolu. Liga nakai mukamuka ke mailoga kua fiafia mooli a lautolu. He nakai age ki a lautolu e tau mekasini foou he nakaila iloa to totou e lautolu, ka e kua he age e tuleke ki a lautolu? Ha kua fulufuluola e kili mo e kū e fekau, liga omoomoi he fia iloa e tau tagata ke totou e tuleke ka fai magaaho tote a lautolu. Ka nakai fakatepetepe a lautolu, maeke ia tautolu ke tutala mo lautolu ke he falu he tau vala mataulu he tuleke.
7. Talahau e tau mena tutupu kua fakakite e puhala ke fakaaoga aki e tau tuleke ka fakamatala he magaaho noa.
7 Fakamatala he Magaaho Noa: Mukamuka ke fakamatala he magaaho noa he fakaaoga e tau tuleke. Taha e matakainaga taane ne tuku falu he kato tapulu haana ka fano a ia. Ka feleveia a ia mo e taha tagata, tuga e tagata gahua he fale koloa, ne fiafia a ia ke foaki taha mena ke totou e tagata ti age e ia e tuleke. Taha e hoa mau ne ō ki New York City ke kitekite, ne mailoga e laua to feleveia a laua mo e tau tagata mai he falu motu foki. Ti uta e laua e tohi tote Nations mo e falu tuleke he tau vagahau kehekehe. Ti ko e mogo ne logona e laua e tagata ne vagahau kehe hane sela e tau koloa he kauhala puhalatū po ke tagata ne nofo tata age ki a laua he paaka po ke fale kai, ne age e laua e tuleke he vagahau he tagata ia.
8. Ko e puhala fe kua tatai e tau tuleke mo e tau tega akau?
8 “Gana e Koe Hāu a Tau Fua Saito”: Maeke e tau tuleke ke fakatatai ke he tau fua saito [tau tega akau]. Ne gana fakaloga he tagata gahua fonua e tau tega akau haana ha kua nakai iloa e ia ko e tau tega fe ka tuputupu mo e moui. Pehē e Fakamatalaaga 11:6: “Kia gana e koe hāu a tau fua saito ke he magaaho pogipogi, ti aua neke okioki ai hāu a lima ke he afiafi; he nakai iloa po ke mena fe ke monuina, po ke mena nai, po ke mena na, po ke fakatau mitaki ai e na mena ua ia.” Ko e mena ia, kia “fakamavehevehe ai e iloilo” he fakaaoga e koloa lauia mitaki nei ke fakamatala.—Fakatai 15:7.
[Blurb he lau 3]
Ha ko e tau koloa lauia mitaki e tau tuleke ke fakamatala atu, falu magaaho to eke ai mo foaki he mahina, kamata ia Novema.